25.05.2017 莎蘭盃決賽 SV Elversberg - FC Saarbrücken Waldstadion Homburg 賽果：2:3 (0:3) 入場人數：6,800 （5000 FCS 球迷）
今季睇一場少一場，咁快黎到今季倒數第三場波，莎蘭盃決賽，勝方來季會獲得德國盃首圈出戰資格。上季莎蘭盃冠軍 Homburg 就抽中左第一圈對史特加，吸引左唔少球迷入場！而 Elversberg 近年亦都贏過莎蘭盃，最後抽中過 Freiburg 同 Augsburg 等等，仲晉身過第二圈架！雖然唔夠班，但呢啲鄉村球隊有德甲球隊到訪，對啲球迷黎講係一件盛事！
不過，呢場波對 Elversberg 當然係重要，但更重要係莎蘭盃決賽後三日出戰既升班附加賽。上個月 Elv 係聯賽反勝 Saarbrücken 後篤定升班附加賽席位之後，當時又已經知莎蘭盃決賽雙方會再碰頭，大家都已經話贏唔贏到莎蘭盃都已經唔重要。
當然，有得贏當然想贏啦。過去既各地地區盃決賽都係附加賽後先進行，但德國足總竟然話想係 5 月 25 日搞決賽，仲要全國都要同一日搞。要準備踢附加賽同時又晉身決賽既球隊當然強烈反對德國足總既決定啦，不過你有你反對，足總有足總當聽唔到。莎蘭足總雖然都無咩話事權去改日子，但佢地都叫負責決定比賽場地，好㨂唔㨂，佢地竟然㨂 Elv 同 FCS 都憎既 FC Homburg 主場黎做中立場！
5 月 25 日係德國係父親節，而南部亦定左呢日為公眾假期，唔同城市都有大大小小既慶祝活動，當日 Homburg 市中心就有一個大型活動，即係警察要安排人手去睇場。同時又有莎蘭盃決賽係 Homburg，令到警方要係其他城市搵多啲人手。有唔少球迷趁開波前先去市中心飲返幾杯啤酒玩下咁，亦都有 Homburg 球迷走去搵 Elv 或 FCS 既球迷搞事。你話有乜謂？？？
我地當日因為有事做所以只能直接去球場，由起身到身置球場後都完全無大戰既感覺，去到球場仲有一個鐘先開波，但 FCS 球迷大部份已經入哂場仲差唔多企滿哂作客區，我地估計有成四五千幾人。當中仲有唔少佢地既盟友 SV Austria Salzburg 到場幫手助陣！
跟球迷巴士到場既 Elv 球迷遲我地大約十分鐘先到，我地㨂左係門口附近企。因為之前有 Homburg 球迷成日都想偷襲我地，我地賽前要為呢場波可能發生既狀況部處下，最後我地決賽唔會帶組織既旗去，只會帶兩三枝細旗，一來以妨有人混入我地度偷旗，二來亦都係我地向足總抗議既一種方式。
開波前十五分鐘，天上面突然有三條友打開降落傘飛落黎，原來係大會贊助商搞既一種宣傳方式。去到就快開波時我就走去第二度準備影班作客球迷，佢地睇落會放 Pyro。果然！球員一入場佢地就開始放煙同響炮！可惜係相入面睇無咁靚，現場睇啲火光靚好多。佢地仲舉起寫住 Leuchtturm der Saar （莎蘭的燈塔）。
同時 Elv 既球迷突然向我呢個方向係咁起哄，我望向左邊先發現原來有班 Homburg 球迷入左場，仲要掛起左佢地既橫額。有 Elv 球迷想過去扯走佢，但被保安同防暴警察推走。
影夠相後我就返去同啲球迷一齊打氣。今場波 Elv 有幾位球員都係當日先首次上陣，龍門都係派出後備龍，等啲球員可以為星期日既附加賽第一回合好好休息準備。派得 B 隊出戰，輸波大家都唔會失望同意外，贏波又可以恥笑 FCS 唔夠B 隊打！不過呢，世上就無咁多童話既，開波七分鐘唔夠， FCS 就已經領先，之後 Elv 一路被禁住黎攻，到半場完結前已經落後三粒。
氣氛黎講，FCS 人多勢眾所以好大聲，我地加埋雖然可能得三十幾條友一齊打氣，但都仲做到野架！！！中間 FCS 球迷有帶起「邊個唔跳就係鬼（Homburg人）」，連我地都一齊跳埋一份，同時向住班 Homburg 球迷恥笑。唔講你未必知，Homburg 下季要降班踢高級聯賽，所以之後全場又一齊唱「Oberliga, Homburg ist dabei」（Oberliga, Homburg 黎啦）！有時敵人既敵人真係可以做到短暫朋友～
中段佢地拉起一條寫住 Krieg dem DFB 既橫額，呢個口號係早前 Dynamo Dresden 作客 Karlsruher SC 閉門戰時帶起，當時 KSC 因為作客史特加時搞破壞被足總罰佢地要閉門作賽， Dresden 既 Ultras 認為要延身為被足總迫害既球迷出聲向足總「宣戰」。過去多年足總一味只掛住搵錢搞 marketing，一直都拒絕同球迷溝通，唔肯聽球迷到底需要啲乜，有咩事就罰球會同球迷，覺得自己係「當權者」就可以操控一切！今次地區盃決賽又係咁，完全無視球迷既聲音，自己中意邊日搞就邊日搞！當 FCS 球迷舉起條橫額後就開始唱 “Fussballmafia DFB”，全場響應一齊大鬧足總係足總黑幫，有佢講無人講！ .V.
半場時大家發現到球場後既樹林有幾條友企左係度，我用相機 zoom 埋去睇下佢地邊位，見到佢地係 Homburg 某大球迷組織既成員，大家即刻變得更加謹慎，又開始被害妄想症上身咁估佢地係咪想完場又玩偷襲，硬係覺得身邊有鬼咁。搞到下半場開波後都無人出聲打氣，個個淨係掛住周圍望。
下半場 53 分鐘，Elv 靠住角球開出成功追返粒，十分鐘後又再靠禁區外罰球補射追多粒。呢個時後班球員開始越踢越有勢，果陣真係一度覺得有機會可以追和。去到九十分鐘我地又搏到一個罰球，仲以為射入左，點知原來只係網頂… 補時補到差啲以為我地係拜仁咁有得無限補時唔會完場，補左唔知幾多分鐘後，球證終於吹長雞完場。
有唔少 FCS 球迷衝左落場，有幾條友仲向住 Homburg 班友衝埋去，不過啲防暴警察都即刻衝向佢地到，無事發生！後來作客區既保安亦打開大閘比球迷慢慢落球場。事後 Elv 球迷無話特別傷心，反正大家要專心下一場波！
星期日，我地作客慕尼黑 Unterhaching，希望可以踢得好好睇！