19.05.2017 比利時季後歐霸附加賽 第十週 Standard Liège - Lierse SK Stade Maurice Dufrasne 賽果: 2:0 (1:0) 入場人數: 約 8000 人 (300 名作客球迷)
雖然西南地區聯賽對我地黎講可以話係完左，但其他地方好多都仲未煞科！今次趁住唔洗睇 Elversberg 既週末走左去遠少少既比利時睇波！呢場係我第一場比利時波呢～
上星期得閒睇下其他聯賽既賽程，發現標準烈治咁岩會係主場出戰今季最後一場賽事，而 Liege 呢個城市離我地只有兩個小時車程，加上波飛又唔貴（只需要 15€ 就有靚位坐），我地就決定去睇呢場波啦！上網買飛時佢地個官網得法文同荷蘭文，不過買飛唔洗識外文既，都係求奇篤個位之後比錢就得啦，點知比完錢之後突然出 Error，然後我地就搵唔返 print 門票果頁（無得去球場拎，一定要 Print-at-home!）。好在球會好快覆我地 E-mail 仲 Send 埋 pdf 比我地 print。
比賽當日原本我地諗住十一點左右出發，去到 Liege 市就搵地方食午餐做下遊客，點知起身時出面落緊暴雨，天氣報告話成個西歐洲都受暴雨影響，落雨都算啦，早兩日差唔多30 度，佢咁樣落一場雨無啦啦得返8度！！！我地唯有將出發時間推後到午餐後，如果唔係落咁大雨去到比利時都唔知可以去邊！
事前我地搵左市內可以免費泊車既地方，通常唔洗比錢泊車… 要付出既就係腳力，今次亦唔例外。有免費泊車又近市中心既地方係一座小山上面，真係好近市中心，係山頂泊好架車，行一條樓就直到市中心。呢條樓梯…總共有 374 級，仲要係一大條長樓梯抖都無得抖。好在只需行一次來回，以後再返黎的話寧願比幾歐泊山腳…
做完半個鐘遊客我地就出發到球場，Liege 主場 Stade Maurice Dufrasne 位於 Liege 市外約十分鐘車程既一個屬於 “Working Class” 既地區，球場隔離正正就係一個工場。去到球場附近泊車後，一落車行到球場大街，以為自己去左英國。成條街都係紅磚屋！好有親切感！！！球場外面正正就係一間 Pub ，好多球迷賽前都係酒吧出面吹水（好好彩地場雨落到旁晚就停左仲出太陽！）
離遠見到球場時我仲係度話個球場無睇相入面咁大，但去到球場時先發現原來真係同相入面一樣咁大！入場前我地想去售票處問可唔可以用我地張 Print-at-home A4 紙換張真波飛，不過個女職員一聽到我地講英文就No no no no no。好啦，咁都無辦法，只好入場。
入場後係門口隔離已經見到有幾間薯條檔（薯條係來自比利時！），經過間 Fanshop 就入去望下，見到有面有個 counter 係 ticketing，有唔少球迷排緊隊買下季季票。反正都黎到，我地又走去排隊問下有無得換波飛，女職員一開始唔明我地講乜，搵左另一個職員黎幫手，點知佢以為我地問可唔可以換位，佢話今場波坐唔滿，開波後我地可以自由換位 -.- 我地話再解釋多次比佢聽我地想換一張你地 print 出黎既波飛，佢話唔得。女職員又好似聽得明咁，問佢同事我地講乜，佢同事解釋比佢聽，女職員竟然話可以，仲即刻走左入房幫我地 print 左張 “Duplica” 出黎，我用一口流利法語同佢講 咩事！！！！（Merci :-P)
換完波飛我地就搵自己個位，入到座位區，我又忍唔住講多次，真係好似英國既球場！連行同行之間既零空間感都同英國一模一樣。係英國，腳短既我一坐低已經掂到前面個人既背部。係德國，我可以唔洗企起身比人行過！兩個龍門後面既看台都有近年新興既 Safe Standing 企座位。最近英國既球隊都開始提起重設企位區既建議，當中提過安裝 Safe standing。
如果你有睇過德國波，你會見到德國球場既企位係一堆樓梯級咁，每幾行有一條欄杆。而 Safe Standing 就係每個座位都有一個高身欄杆，而摺合座位係無需要時可以用鎖實騰出空間出球迷可以企。呢款 Safe standing 既好處就係慳錢（長遠計）。歐洲賽事有規定要全座位，有企位看區既球隊，例如德國球隊每次要主場出戰歐洲賽時，佢地要請工人係看台上安裝座椅，完場後又要拆返座椅等聯賽時可以變返企位。而 Safe Standing 就唔洗拆黎拆去！
上星期上網買飛時，個網得返幾個位比我地㨂，我地一心諗住會起多人去睇，但係去到賽前十分鐘個球場都仲未有 1／3 滿，已經心知不妙。球員入場後，啲球迷終於慢慢咁入場，主場既主要球迷組織 Ultras Inferno 開始聚集係看台既第二層，仲掛起佢地枝大 Banner。但係… 咦，反轉左既？原本以為佢地搞錯左，但後來班 Ultras 都無特別打氣，睇佢地係有心反轉塊 Banner， 似乎想抗議某樣野。唉，點解會咁無運，之前見佢地成日準備好多 Choreo 好似有好氣勢咁所以想黎睇下，點知一黎到佢地就搞抗議～～
至於作客區，原本一路都無人，但係佢地黎下一堆，再黎下又一堆，突然坐滿左一個小區。有一班年輕 Casuals 開波後大約十分鐘先出現，佢地一出現成班作客球迷就開始出聲打氣。佢地唱既歌全部都係英國成日會聽到既歌！哈哈，完全唔知比利時足球咁受英國影響～～
開波後我先問到底呢場波有咩意義，我知係歐霸附加賽，但係咪今場贏左就拎到歐霸席位呢？咁岩今期德國既足球雜誌有一篇文講世界各地既奇怪聯賽系統，當中提到比利時時，文章第一句係「比利時聯賽既複雜程度由佢地聯賽既名開始：比利時甲組聯賽 A (Belgian First Division A)…」有 A 就即係有 B，咩話，頂級聯賽再分 A 同 B? 簡單去理解呢，甲A 係頂級聯賽，官網名稱係 Juplier Pro League，甲 B 就係乙組聯賽，正名為 Proximus League。
甲 A 總共有 16 枝球隊參賽，常規賽就有 30 場賽事，一般都會三月就完結。複雜既就係呢度啦，常規賽完結後，積分榜會分開三部份，第一部份：頭六名球隊會進入冠軍附加賽 ，即係常規賽中得分最高既球隊唔係聯賽冠軍，但球隊係常規賽贏得既積分會除二再計入附加賽中，去到附加賽再互鬥一輸得到最高分先可以分出最後聯賽冠軍誰屬。
第二部份：第 7 至 15 名球隊加埋甲 B 既頭三名球隊會分為兩組進入歐霸附加賽，即係每組會有六支球隊出戰歐霸附加賽，經過十回合後每組勝出既球隊會進行一場決賽定出附加賽冠軍。你以為咁就完？仲未！呢隊冠軍仲要再戰冠軍附加賽既第五名來定出代表比利時出戰歐霸既最後一枝球隊。第三部份：榜尾球隊就直接降班到甲 B 。（好在咁岩今季改左制，唔係仲會有降班附加賽）
而甲 B 既聯賽制度都唔簡單得去邊，乙組既常規賽分為兩大回合，各回合既得分最高球隊會進入附加賽爭取升班席位。如上面提到，乙組首三名球隊 （除升班球隊外）會同甲 A 球隊爭歐霸席位，而最後既四枝球隊就會進入降班負加賽。
我地買波飛時都無睇到呢場波既背景資料，諗住最後一場主場實好多人去睇。直到開波後我睇下呢個附加賽 A 組既形勢先發現原來呢場波根本完全無意義，因為兩隊都已經無機會可以成為附加賽冠軍去挑戰小決賽。唔怪之得無人入場啦，我係球迷都留係屋企算啦。講真，鬥完一大輪都唔知自己到底贏到啲乜！
Lierse SK 係甲 B 聯賽兩個回合都排行第二升班無望，去到歐霸附加賽又排第尾。但佢地既球迷好似完全唔覺得傷心咁！雖然全部都遲入場，但佢地由頭唱歌唱到尾，中間仲放左三次黃煙！比賽中段我地見到佢地望住街外起哄，然後有一班警察即刻起身，可惜我地個位睇唔清楚到底街外發生咩事，但班作客球迷拆埋座椅掟出街，可能係有主場球迷係球場外挑釁佢地。
Liege 呢隊波睇歐洲賽都成日見，多年前仲對過利物浦所以都有印象。最記得係以前上網見過有人問點解 Standard Liege 中文叫標準烈治，譯音譯一半唔譯一半，唔叫士單特烈治？？呢個謎我到今日都無答案！佢地上半場先領先一球，雖然入場人數唔多，但球迷慶祝既聲音仍然都係好大聲！
半場我地去買左個勁難食既漢堡包，好唔開心，早知食多包薯條算。買完野食返埋位，主隊班 ultras 唔見哂，諗住佢地可能去左飲返杯啤酒吹下水，但係到開波後成班人依然唔見影！我地見到有一堆人塞左係某一個出口，中間仲傳出 BOOM 一聲，可惜到完場我地都唔知班 Ultras 發生咩事。可能佢地半場想係街外偷運啲 pyro 入場，不過事敗然後被禁止再入場。
另一方面，作客球迷好似係另一個空間咁係咁唱歌，仲有醉酒佬係咁打關斗！完場前主場射入 2：0 時，班作客球迷仲慶祝埋一份！！！！！完場後佢地跟住球場喇叭播既歌一齊唱，唔講會以為贏波既係佢地 😀 😀
下次有機會都未必會再黎睇 Liege，反而想去睇下Lierse 主場會係點！