04/04/2017
莎蘭盃準決賽
FV Diefflen - SV Elversberg
Babelsberg-Stadion
賽果: 2:5 (1:2)
入場人數: 1.450

返到德國既第二日都未回魂，我地又走左去睇波啦。Elversberg 係莎蘭盃既準決賽既對手係第五級別聯賽既 Diefflen，同上年既準決賽戲碼一模一樣！

我地無特別同人講我地已經返左德國，星期二朝早仲係 Facebook 度 upload 緊北京既相（我地唔識爬牆～），不過我地知度班朋友會相約係市內既超市停車場，然後一齊渣車出發去 Diefflen。未出發時我已經感受到時差，開始有啲眼訓。

球場外有一大片爛地可以比球迷泊低架車，上年同樣時間落暴雨，賽後有唔少球迷要靠拖拉機拉返架車出路面！好在當日陽光普照，唔洗驚要踩泥地～

呢場波既入場費竟然要 €7!!!!! 盃賽果然係小球會掠水既好時機。場內無指定既作客球迷區，所以我地就㨂左係另一面龍門後面聚集。因為係準決賽，所以都有過千人入場睇波。Diefflen 更加有球迷帶埋大鼓掛大旗幫球隊打氣，不過佢地唔係啲咩 Ultras，只係一班飲醉酒既老友一齊大叫下唱下歌咁。

開賽初段 Diefflen 踢落有板有眼，睇落唔似係次一級聯賽既球隊。Elversberg 靠住一個角球攻擊領先，但兩分鐘後主隊立即追和！場波開始睇落有少少難踢，不過下半場 Elversberg 就開始黎料，首先係對面既龍門紐亞上身走左出禁區，被客隊既前鋒 Göttel 偷到雞射入第二球；十分鐘後客隊再攻入一球領先3：1。

之後主場既球員黎個遠射偷到雞又追返一球，不過餘下十分鐘 Elversberg 已經唔再心急，慢慢造攻勢睇住黎食射入多兩球，殺入決賽！

Elversberg 係決賽將會對 Saarbrücken，勝方可以出戰來屆既德國盃第一圈賽事，所以決賽係十分重要！！！！！！！！