德國甲組足球聯賽 第十七週 Bayer Leverkusen - Hertha BSC Berlin BayArena 賽果: 3:1 (2:1) 入場人數： 26.904
話咁快德甲又開波啦！上星期買完飛我地先發現原本我地未一齊去睇過德甲，係有睇過德甲球隊，但次次唔係友誼賽就係歐霸。今次係我自 2012 年年尾睇 Eintract Frankfurt 後既第一場德甲，而 P 既上一場德甲咁岩又係 2016 年年頭睇 Frankfurt。
原本我地對 Bayer Leverkusen 對 Hertha BSC 充滿期待，一黎兩隊波都未睇過，二黎好想見識下 Hertha 既球迷。點知賽前幾日，Bayer 既兩位 capo 被罰 Stadionverbot，原因係佢地上場德國盃賽作客 Pirmasens 時企左上圍欄。消息傳出後， Leverkusen 既 ultras 表示佢地係球場上作出回應。
星期日一早我地就搭火車北上，Trier 火車站早兩個月有新路線直上科隆，不過我地最後選擇搭要去 Koblenz 轉車，除左快十分鐘之外，又唔洗坐足三粒鐘，中間可以行下走下。Leverkusen 既主場 BayArena 之前已經經過好多次，每次要穿過科隆九成九都會停一個叫個 Leverkusen Mittel 既站，由呢個站開出後好快就會見到球場係你既右面出現。今次我地終於係呢個站落車啦，可以話係我地去 NRW 地區車程最短既一次。
一路車唔識路既話，跟人行就實無死，又或者跟住 “Sportpark” 既路牌行，穿過一個公園就會見到 BayArena 既大字。話時話 BayArena 個 Bay 唔係讀 Baby 個 Bay，而家 Bayern 個 Bay，唔好以為呢個係咩港灣球場，佢地玩呢個名係玩食字，BAYERena – “拜A”rena.. 呢個球場 2009 年開始啟用，唔明點解佢地可以起個咁醜既球場。球場四面都有 VIP 既入口，好似好華麗咁。
入閘後我地就要行幾層樓上去我地既山頂區，第一層係 VIP 層，只係有個保安企係度睇住門口，我八掛望下，保安叔叔就黎同我講：呢層係比球會老闆同（一堆我唔識既名）架，我地就繼續向上行。當我地入到球場後發現匕場球迷打氣區成個看台得一枝旗放左係度，欄杆上一條球迷橫額都無。球員進場後，佢地就掛上兩塊寫住「Keine Choreo, Keine Stimmung」既橫額，意思係無 choero就無氣氛。估計球會唔批准佢地搞 choreo 去抗議 Stadionverbot，所以班球迷決定唔會打氣造氣氛。如果買飛前知道佢地會靜睇既話，我地應該唔會去睇呢場波啦。。。
因為主場球迷沉默抗議，搞到變左好似係 Hertha 主場咁。
班作客球迷全場無停過打氣。我估好多人都無特別留意 Hertha 呢隊波同班球迷。先講隊波，雖然佢地係一隊來自國家首都既球隊，但當你提起德國波時，講到第幾隊波先會提起哈化柏林呢隊波？倫敦有阿仙奴，車路士；法國有巴黎聖日耳門；意大利有羅馬，去到德國，柏林有隊波踢甲組都已經可以去慶祝。
Hertha 點解好似唔係好受歡迎，以前醜聞多多，二戰後德國分裂對呢隊波既影響都好大。當年 Hertha 係位於柏林圍牆內，即係無論球員，球迷定遊客，要進出西柏林都要經過申請文件同一大輪過關手續。係東德東柏林入面最大既球會係 Union Berlin，然後係 Dynamo Berlin，仲有其他球會仔。到德國統一後，柏林變成一個有兩隊「強隊」既城市（強係指多人支持）。你以為 Hertha 既死敵係 Union? 唔只，對 Hertha 黎講，史浩克先係佢地最大死敵，但史浩克既球迷根本唔得閒理佢地。其實佢地踢乙組應該仲開心過買甲組，乙組仲多同佢地有瓜葛既球隊，球迷打氣都出力啲。
講返場波，Leverkusen 雖然無左球迷打氣，但佢地都入到三球波（後來睇重播話有兩球都係問題球）。下半場開波時，主場球迷區既球迷舉起左兩條橫額，呼籲球迷下場對 Gladbach 賽前或者上網去聯署反對 “Megastelze”。當時我地未知係咩意思，返黎睇下新聞先知佢地反對緊係 Leverkusen 市興建一條新高架高速公路既規劃。早前班球迷組織偷運左一條關於反對呢個規劃既橫額入球場並成功掛住，事後被賽會指佢地係球場展現有政治訊息既橫額而被罰全國入場禁制令加近千歐元罰款。佢地班球迷呢排真係無咩運行～～
我地住 A5 區域，除左有波睇仲睇到太陽落山，都幾浪漫！球證吹雞完場後，我地就行返去火車站返屋企，一路行一路話：以後無咩特別唔洗再黎呢個球場啦。球場有二萬九千幾個座位，呢場波既官方入場人數得二萬六千幾（應該無咁多囉）。不過又難怪，NRW 咁多球隊，近既搭十五分鐘車有科隆，一個鐘車程以內比呢隊波更多特色既大大少少球隊都有，應該真係本地人（或者員工）先會 support your local club 啦。