德國西南地區聯賽 第二十四週 1. FC Kaiserslautern II - SV Elversberg Fritz-Walter-Stadion 賽果： 0:2 (0:1) 入場人數： 480 (作客球迷：300)
咁就黎到 2016 年最後一場波啦，過埋今場波地區聯賽就正式歇冬。星期日我地十二點到 Elversberg，然後再去 Kaiserlautern。由 Elversberg 去 Kaiserslautern 既車程只需半個鐘左右，好多球迷見咁近都報名搭球迷巴士跟球隊一齊作客，球隊最後要租兩架兩架專線巴士，即係淨係搭巴士既球迷已經有近百人！
好在今次有車坐唔洗再行山，有得係正作客入口門口入。落車後竟然要排隊買飛，仲要排左成五分鐘先到我地！ 作客球迷要入球場就先要經過一道極窄既長閘（唔知啲肥人點過），等啲球迷無咁容易可以偷運違禁品入場，過左閘先要嘟飛再搜身先可以入到場。連上看台時都有保安睇一睇你張飛，唔知點解地區聯賽既保安都要咁嚴謹！
一入去就望到小食亭，開心到要叫出黎，佢地呢個地界級球場既小食亭有好多野食呀！！！！餐牌上所有列出既食物都有供應，唔係見你係地區聯賽就得返一兩樣野食咁。仲有個好處就係我地唔洗買預付卡先可以買野食，早兩個星期我地連眼尾都無望過個小食亭。除左平時既腸呀，Frikadelle 呀，仲有即炸 Schnitzel ，薯條同咖喱腸等！天寒地冬就緊係要買返杯熱紅酒，佢地呢度係賣 0,5L！連小朋友都照顧埋，唔飲得酒精既仲有 Kinderpunsch （熱果汁）。花左十分鐘排隊買野食同等野食之後，終於可以行出看台。
早兩星期睇 FCK 一隊對 Karlsruher SC 時我地坐係主看台望住班作客球迷放煙花，今日到我地企係作客球迷區望返個（吉既）球場。平時唔係跟 stadium tour 大家都未必有機會見到球場啲劃位原本係點，我地係今場無人睇既波就見到啦。
因為呢場波係聖誕前最後一場波，所以大家都帶住 holiday mood 開開心心咁黎睇波，間唔中又唱下聖誕歌咁。Elv 對住聯賽下遊球隊 FCK II 好輕鬆咁就贏左兩粒。入場人數睇落好少，得480 人，但我望去主看台果面真係唔知有無 100 人，但如果話主場球迷得 100 人既話，即係作客球迷有成 380 人，隨時可能會係今季 Elv 既作客紀錄。講真，有咩人會去睇二隊呀，所以 FCK 有 100 人會入場都算係咁啦。
上半季咁就完左啦，要等到二月尾先會再有地區聯賽睇。希望到時 Elv 可以保持個勢，季尾再打入升班附加賽，下季我要睇丙組呀！！！！！
黎緊兩星期都仲有機會即興去睇多一兩場波既，就算無足球睇，月尾我地會去睇冰曲，德國既冰曲球隊都會 ultras 場場去打氣～～我咁大個只係係布拉格睇過大學既決賽，係時候要去見識多啲！