德國乙組聯賽 第十四週 1. FC Kaiserslautern - Karlsruher SC Fritz-Walter-Stadion 賽果： 0:0 (0:0) 入場人數： 28.487
係 Elversberg 過左一晚之後就一早渣車去到 Homburg 搵地方泊車之後就轉火車搭去 Kaiserslautern （波飛包埋火車呢～），一上火車就已經見到有唔少 Lautern fans 係車內隊緊啤酒。成個 Rheinland-Pfalz 州份可以話只得 FCK 一隊大球會，所以幾乎整個來自 “Pfalz” 附近既人都支持 FCK 呢隊波 。（話時話，記得唔好同科隆掉亂左， FCK 係 FC Kaiserslauern，而科隆係 FC，無 K 架！）
Kaiserslautern 呢個城市除左出名足球之外，仲出名多美國人，因為美國駐德國既最大軍事基地就係位於 Kaiserslautern 。因為好多美國人唔識讀 Kaiserslautern （又或者嫌個名太長），所以佢地會簡稱呢個城市為 K-Town。當日我地真係聽到唔少rrrrr 哂利既美式英文！
早幾日睇新聞話 FCK 球迷 10 點鐘會係市內集合，然後 11 點會開始遊行到球場，而 KSC 球迷就會分別搭兩班特別班次火車 11 點 15 分左右到 Kaiserslautern 火車站。我地一落車就已經見到好多警察係月台接車，火車站入面條隧道充滿狗味勁臭。當時11點未到，我地已經聽到火車站另一面傳來球迷既打氣聲，即係代表 FCK 球迷已經出發。到我地想趕去既時候，班球迷已經到達我之前提過既橋底。即係話佢地比完定時間提早左出發，所以當我地去到橋底時，警察已經封哂路唔比人過，我地亦都搵唔到靚位影相。到我想搵個高位影多幾張相時，有屬於 FCK 球迷組織既人行黎叫我唔好影相，所以我都即刻收返埋相機尊重返佢地。好多屬於球迷組織既人都唔想比人影相，因為佢地驚你影完相就放上網（影開球迷既人會幫人樣打格仔，保障返球迷既私隱），如果佢地比其他球隊球迷（特別係死敵）係街上點到相既話，除時比人圍毆。所以大家有時去睇波時影到啲球迷行動之後想放上網，放幫盡量唔好放樣！啲球迷組織舉行遊行或者其實球迷賽前活動時通常都會有自己既攝影師，所以唔洗幫佢地擔心影唔到靚相啦。
雖然我地影唔到靚相，但我地都見到佢地係隧道內放紅煙響炮等等。不過聲浪唔係話特別大，好似只係球迷組織既人加一大班花生球迷一齊行咁。我地估計佢地係比警察逼佢地提出發，以防佢地中途會同 KSC 球迷相遇。
FCK 主場係係山上面，從火車站果面有兩條路可以上山，一條係通往主場球迷區，另一條就係去作客球迷區。就好似加路連山路咁，主場球迷要經丹麥上大球場，作客球迷一定要經保良局先去到作客區，而 FCK 球場山下呢兩條路係一個迴旋處，如果 FCK 球迷真係照原定時間出發既話就會係迴旋處遇上 KSC 球迷，然後大家就有花生食啦。不過警察就當然唔會比呢件事發生啦，所以係 KSC 火車到站前，主場球迷已經被推哂上山。
等佢地上哂山後，我地就返去火車站隔離既多層停車場等火車到站。當我地上到頂層時，已經見到有其他花生友都係度等緊花生。
11點半 左右已經遙遠見到有架舊車埋緊站，仲有藍煙從火車冒出。班球迷一路唱住歌一路出站，仲係站內放藍煙同響炮（每次佢地放響炮我都會嚇到彈起….），第一班球迷出站後，警察就開咪歡迎佢地，通知佢地要等埋下一班火車到站齊人後先可以一齊上山。兩班火車到站後，一條警察人鏈就係前面帶住班球迷行，班球迷就一路叫 “Die Karlsruher sind da!” (The Karlsruhers are here!)。
同朋友講開去睇呢場波佢地都話：呢啲名係我地細個睇德甲時聽開既名，講起 FCK 就一定要提佢地以升班馬身份贏德甲啦。仲有佢地個球場係 2006 年德國主辦世界盃時既其中一個賽場，果然係世界級！每個小區都有一個閘口，唔洗去一個大閘排餐死先入到場。場內買小食飲品都要先買一張預付卡，賽前有好多 counter 賣卡，不過賽後你想退返張卡拎返按金既話，全場可能得兩個 counter 退卡，你有時間既可以慢慢排隊，無時間既話就焗蝕左按金比球會，所以我地食飽左先入場，咁就唔洗為張卡而煩。
開波前 KSC 球迷舉起左一塊大 banner，即係球迷準備係入面換衫包頭，然後就放 pyro。球員入場時佢地就開始放白煙同放煙花（真係向天爆果啲煙花！），成個球場即刻變到好浪漫好靚！我就希望 KSC 贏波既，因為佢地班球迷開心既話可能會放更多 pyro。可惜只係零比零完場。FCK 入左球波但被判越位，係電視睇返真係無越位囉。成場波係主隊食詐糊後氣氛特別好，其餘時間真係無咩特別。入場人數只係得二萬八千幾人，估唔到主場對佢地既最大死敵一半都坐唔滿。兩隊波而家都係中下遊位置，難怪坐開主看台既球迷都無咩心機入場。係無諗過連球迷組織既人係打比都唔係特別出力。
完場時開始肚餓，所以急急腳走人，但又想睇 KSC 球迷離場，所以我地去返火車站隔離個停車場等一陣睇下有無咩好睇。作客球迷通常會係完場後要留係球場最少十至十五分鐘先可以離場，等啲主場球迷散咁啲先可以放作客球迷出黎。我地到左停車場大約二十分鐘後，警察就開始封路，行得慢既球迷邊度都無得去，被困係山路，要等作客球迷入哂火車站先可以繼續行。最後班球迷都係好平和咁走，無咩好睇，所以我地都一齊入火車站搭車返去 lu!
有興趣可以睇下 FCK 上季對 KSC 賽前既 fan march:
https://youtu.be/GRY8JrylJnA