德國西部地區聯賽 第十六週 Rot-Weiß Oberhausen - RW Essen Niederrheinstadion 賽果 2:2 (1:0) 入場人數: 5.573
星期六睇完莎蘭盃後我地係 Elversberg 食埋晚飯就要回家，因為第二朝我地一早出發向北出發！星期日九點半就要出門口去搭火車，坐差唔多四個鐘車上 Oberhausen 睇西部地區聯賽打比！
住係德國西面既波友真係好幸福，係 NRW 呢個州入面有好多好多隊足球隊，每個城市小鎮相差只係十幾廿分鐘車程，大球會又多，小球會又多，日日都可以有波睇。不過 NRW 真係好多人呀，架火車一經過 Bonn，Köln, Düsseldorf 呢幾個站成架火車即刻爆滿，我地呢啲同綿羊做鄰居既鄉下人突然覺得好唔慣。
係 Oberhausen 火車站落車後，係火車站正門就已經係巴士站，第一個月台已經有去球場既特別巴士等緊我地啦！係巴士站見到唔少著住藍色衫或者戴住藍色頸巾既人係度吹水，呢啲全部都係史浩克球迷。Oberhausen 同史浩克係朋友，所以有史浩克球迷都會去 Oberhausen 幫手助陣！相反，Essen 就同多狗係朋友，見到有人戴住條黑黃頸巾真係想反胃。。。
巴士開車後十分鐘左右就到球場了，一落車就已經係主場球迷組織既Emscherkurve 看台入場門口。 Oberhausen 既主場位於兩條小河中間，呢個看台就係以其中一條河 Emscher 來名命。今場話係打比，但唔見保安有咩特別嚴謹，完全無人查過我個背包，早知帶多啲野食入去！
入到球場就搵個可以望到雙方球迷既位，然後。。。個天就開始落雨。出發前睇天氣預報，話有 30% 機會落雨，諗住得 30%，就算真係落雨既話應該都唔會好大雨，點知場雨越落越大，大到最後差啲連班作客球迷都見唔到。大雨大風既天氣下企係兩條河中間睇波，真！係！好！凍！仲有我發現呢個球場得三枝射燈，有 OCD 既球迷我建議唔好去呢個球場，就好似旺角場啲射燈係唔對稱一樣，每次見到都覺得好唔安樂，硬係覺得差咁啲野咁。
Rot Weiss 其實就係紅白色既德文，唔洗講你都知兩隊波既主色就係紅白色。最近好中意唱一首歌叫 Pommes Rot Weiss，個 tune 係偷某班球迷既歌改詞返黎（唔想用佢地首歌黎打氣，所以唯有自己改詞自己玩）。 係 Niederrhein 球場都有得買 Pommes Rot Weiss，即係紅白汁薯條，紅係茄汁，白係 Mayo。Pommes Rot Weiss, du bist unser Leben <3 Schlalalala
兩面球迷都無特別準備咩啲係今場打比用，大家都只係平常打氣。睇得出RWE 球迷多人好多。上期 11Freunde 就係講呢啲「小球會」場場主場都可以有幾千人入場，住係 NRW 周圍有咁多大球會，唔去支持啲德甲球隊，走黎支持踢第四級別既球隊，
呢種忠誠同熱情係啲 Glory-hunters 永遠唔會了解。而 RWO 球迷唱十首歌有八首歌都係唱衰 RWE。
場波既質素我自己覺得就麻麻，兩面都無咩攻門，同埋可能因為太凍既關係，我地只係想快啲完場，但又唔知點解場波好似踢左200 分鐘咁。主場球迷去到下半場已經無咩聲，之後比 RWE 連追兩球，成個球場得返作客球迷把聲。點知完場前幾分鐘主隊係禁區外獲得自由球，同上半場一樣，成功靠自由球入波追和！當時已經有啲球迷走左上哂巴士準備去返市區，唔知佢地係球場外聽到場內慶祝既聲有咩感覺呢。到而家都唔係好明點解啲人要早走。如果我真係趕時間，我會一路行一路睇，搵個最近出口既位置等球證吹雞先即刻奔跑離開，唔係真係好緊急既話真係唔會捨得未完場就走人。
完場後我地搭巴士返火車站，站內已經有好多警察在場戒備，仲有好多隻警犬，估計作客球迷應該會係另一個出口入火車站搭火車返 Essen ，啲警察要分隔開兩班人。最後好似都無咩特別事發生。
有位相熟既史浩克球迷第二朝問我做咩唔去睇埋史浩克先走（當日 RWO 場波 5 點幾完場，史浩克6點半開波），我話我想買飛時已經得返山頂位，仲要成 50€ 一張。佢話：企位 15€ 咋嘛。我話：我夠知啦，買到先得架。佢竟然叫我下次想去睇史浩克既話可以搵佢，睇下佢地個組織有無飛淨。呢個世界真係有好多好人！！！！ 啲人成日話史浩克球迷又自閉又 Anti-social，但我真係完全唔覺！