季前熱身賽 FC Schalke 04 - Athletic Bilbao Veltins Arena 賽果: 3:2 (2:0) 入場人數: 42,404
一到德國第二日就已經要北上睇愛隊（兩隊我都支持 ._.v）。賽前有史浩克同樂日，球場外面有多個攤位比一家大細去玩，有睇免費影即影即有，有好多減價貨品，仲有唔同既球迷組織都有擺檔籌錢，當中包括全國數一數二出名既組織 Ultras Gelsenkirchen (UGE)，當然要即刻去科水買返條頸巾同貼紙支持下！（大家去外地睇自己支持既球隊時，可以搵下當地既球迷組織既攤檔買佢地既紀念品支持下佢地。認真，球會好有錢唔洗我地啲錢架！）
入場前搵片草地野餐，食飽先入場又可以慳返啲錢～ 我地要係西閘入閘，唔知點解佢要淨係開其中一首閘，排左三個字終於入到閘之後又要排隊等安檢。男保安只可以檢查男人，通常兩至三個男保安後面都會有一個女保安。排到我既時候佢地話我要去中間排隊，但中間得兩個女保安做安檢囉，廿幾個男保安得兩個女保安，我過去既時候已經有差唔多成百個女人係度排緊隊。啲男人係咁叫啲女人直線排隊，但全部女人即刻話：大佬，排到直線先得架！啲女保安最後只係好似旺角大球場啲阿叔阿姐咁 hea check 就比你過關。
入場後搵到自己個位就坐下影下相。開波前佢地介紹球場中心既新四方電視，話係全國最大既四方電視，然後仲播返套為舊電視而製既短片講佢經歷過既時期，部新電視既畫面一開始就已經唔岩位。
因為今日係家庭同樂日，所以大部份都係一家大細同遊客咁，Nordkurve 無左 UGE 既大聲公同鼓聲（得球會派黎既鼓隊，但都無咩用），變左英式打氣靠看台入面一兩個人大叫帶頭。平時同一首chant 可以連續唱足幾分鐘，但呢日幾分鐘就唱左幾支chant。史浩克既吉祥物叫 Erwin，係咁鼓勵啲球迷打氣，但得啲小朋友係咁對佢大叫 Errrwiiiiinnn 同揮手，完全唔知原來佢咁受歡迎，周圍好多小朋友既叫聲由遠處傳黎就係為左想叫 Erwin 同佢地揮手😂
未開波我已經係咁讚美 Mikel San Jose，話佢試過做球隊第二神射手，執雞了得，高波頭鎚難唔到佢。果然！畢爾包就係靠佢開齋！！！我係座位暗暗地慶祝，因為唔敢呢頭跟 Nordkurve 唱完歌果頭就為畢爾包慶祝🙊 完場同 Erwin say bye bye 就搭車返市中心食啲野就渣車返去 lu。我已經係布拉格同馬德里睇過畢爾包作客，今次睇埋佢地作客史浩克，幾時作客對埋利物浦？ 😎