我地又唔死心咁睇下會唔會附近有波睇，最後發現出左足總盃外圍賽賽程，近近地既 Eastleigh 會係主場出賽迎戰比佢地低一級既 Dover

今季我地每個週末都圍繞住德乙而行，黎到年尾啲假又用得七七八八，見到呢個無比賽既週末心郁郁又想去第二度玩，最後㨂左請兩日假去英國探親，又可以帶兩老去大球場睇波。

我地一早睇中左今個週末既國際賽程，咁岩安道爾將會係主場出戰，我地就決定「順路」經過安道爾去睇返場波。

星期六晚由 Elche 返到去已經凌晨一點，第二朝我地食完早餐大約十二點又再出發南下去 Alicante，準備夜晚睇 Hercules，靴高斯～

身在西班牙先會理解到點解佢地要有午休，點解要咁晏先食飯同點解咁夜先開波！ 呢場波夜晚九點先開波，就係要等到入黑唔再有太陽涼返少少。