13.03.2026
德國足球乙組聯賽 第 26 週
SpVgg Fürth - SV Elversberg
Sportpark Ronhof
賽果：2:0 (1:0)
入場人數：11,076 （375 名作客球迷）
門票：18,71€

上次黎作客係初季，講緊既係 2024 年 9 月，即係上次黎係一年半前既事。 個個黎到話好記得嗰場波，因為嗰陣我地又係喺度苦戰得一分，仲未上神枱既 Asllani 射失咗個勁廢既十二碼；嗰陣我地覺得佢地水貨，黎到今日就講笑話佢就係佢射失呢兩分先搞到我地唔可以直接升班，如果唔係今日都唔洗再黎呢度！

呢場波又係星期五晚上演，離 Elversberg 大約四五個鐘車程，想黎作客既都要最少拎半日假。 Fürth 係我地比較中意去既作客場地，距離唔算太遠，過去兩季週末都會有二百幾人隨隊作客。今日星期五比賽反而有超過 350 人到場，真係好難得！！

好可惜今日既劇本一早寫定我地要輸波，賽前無啦啦有人提起「嘩，原來我地對 Fürth 未輸過」，我即刻怒啤話，咁你知今日會發生咩事啦？？？？？？ 我仲懷疑主隊用埋啲陰招去剋我地！！！首先就係由食物方面落手，個 currywurst 賣相奇醜，食落想嘔！！！ 正常 currywurst 係剪/烤過既腸，呢度就係用烚腸，條腸似香港 d 魚肉腸多過正常普通既豬肉腸；啲汁係罐頭茄汁豆味， curry 喺邊？？？？ 每食一啖就愈無胃口，最後食咗兩啖就搵人啃咗佢。 真係好嘔心。

對方過去幾場對住聯賽榜頭幾名都無輸過，唔係覺得我地走得甩嘛？ 開波前睇咗幾分鐘都完全無嗰種食硬對方既感覺，人地有幾次突擊我地都係靠好彩先清得走，前面又毫無殺傷力，嗰位新加盟既球員我都唔想再提。

好啦，上半場先失一球，下半場隊波仲係無改善，唔知佢地喺禁區頂想等咩，明明對方龍門出名牛油手，有機會就起腳好過走去搵空位啦。 之後比我地搏到十二碼，見到 Conte 拎住個名，佢同 Asllani 一樣係由賀芬咸借過黎，黎到又係著十號，係咪想重演射失十二碼？ 後來個波比咗 Petkov，最後都係飛機射失。 （其實可能真係要由 Conte 操刀先可以破宿命）

射失咗球十二碼之後士氣仲差過之前，對方完全唔似係榜尾球隊，下下搶住黎攻，仲好識浪費時間。去到補時階段射入埋第二球搶到保貴既護級三分。 上半季我地喺主場大炒對方六球，今日作客完全無力還擊。完場後班球員好唔開心咁走到過黎，我地唯一可以做既就係用掌聲鼓勵佢地下場加油，唔好再做好事送分幫人護級啦～