06.03.2026
德國足球乙組聯賽 第 25 週
SV Elversberg - 1. FC Magdeburg
Waldstadion an der Kaiserlinde
賽果：1:0 (0:0)
入場人數：8652 （約 700 名作客球迷）
門票：季票

今個星期返到主場迎來其中一隊我最期待既對手（球迷），可惜場波被安排喺星期五晚出賽。由 Magdeburg 黎到要四五個鐘，對方仲要最期成績極差，最後只賣出唔夠七百張飛，係佢地第一次少過一千人黎作客。 出名會誓死跟隨跟隊波去天涯海角既 FCM，竟然得「咁少」人出現。

班球迷同我地差唔多時間到場，開波前一個鐘咗右趕住掛起看台前既大旗，今日仲帶埋塊 “Sogenannte Fussballfans” 大橫幅，呢兩隻字直譯係解「所謂既球迷」，通常被啲自視為最識足球既專家用黎批評「入場唔係睇波，而係只會搞事既人」。FCM 就有好中意帶埋呢兩隻字，今日就有七百個所謂既球迷喺球隊低潮時期都會喺星期五晚山長水遠出錢出心出力黎到作客。專家們你地又喺邊呢？

對面得嗰幾百人，我地有啲擔心佢地會 hea 住打氣，好在佢地如常喺開波前仍然會舉起隻手呴哮 FUSSBALLCLUB MAGDEBURG! 黎開場。看台本來睇落中間有好多空位，但佢地成班一齊企高幾行之後就睇落仍然係一個好充實既作客區，仲有佢地 100% 既打氣參與率搭救。我地呢面就唔知點解氣氛異常地好，之前就算作客人少都唔代表我地啲球迷會有興致打氣。

上半場就踢得好一般般， FCM 同上季一樣作客踢得好過主場。 一年前佢地黎作客時喺我地領先兩球後比佢地連入五球反勝，呢場波係睇波人生其中一場見過最恐佈既賽果。今日都完全唔敢輕視對方，喺榜尾既球隊通常喺呢啲時候先會開始殺你一個措手不及。好在我地有 Kristof 守得住個龍門。

不得不再提下 Mokwa，佢係入咗三球波但佢真係仲未夾到隊波。佢染咗金毛之後就好易認到佢，今日我都特登留意下佢多啲睇下佢喺場上到底做咩。 首先係佢成日都搶唔啱位，無論個波喺邊面黎都會比對方球員搶先一腳擋走咗個波，所以幾乎無見過到底佢腳下功夫如何；然後就係成日都輸喺起跑線，佢永遠都唔會係有機會突破越位嗰個，因為佢次次都係差幾個波位先同對方條防線平排，佢企咁後又唔係因為佢跑得快，又唔係可以帶空位出黎！！！

去到下半場 60 分鐘就換走咗佢（超感恩），換入年過三十既真球王 Schnellbacher。我地既攻勢開始一浪接一浪，多咗好多起腳機會，仲帶起埋場內氣氛。 上週雲達不萊梅既球迷喺賽前叫班球迷唔好再鬧球員，因為鬧係無用；身為球迷我地既支持係可以為球隊起到作用，要改變現況就要球迷全力支持球隊，最後果然成功集氣贏波。 今日我都覺得個個都出盡力打氣，咁都贏唔到既話會接受唔到。

去到八十幾分鐘，Block C 叫場內球迷一齊企喺身後再全場大隻唱 Auf geht’s Elversberger Jungs… 以前試過幾次喺呢啲情緒最高漲既時刻失波，今日竟然可以睇住 Poreba 喺禁區頂企定定起腳，望住個波啱啱好繞過對方龍門手指邊破網！！！！ Poreba 絕對係今場 MOTM，佢話佢既職責就係做啲 dirty jobs，中場派牌係佢、掃蕩係佢、走位係佢而家連射波入波都係佢。 雖然佢只係由漢堡過黎既借將，但合約上有買斷條款，呢一百萬唔比就真係蠢！！！

好驚險咁捱埋最後嗰幾分鐘，最後一個攻勢當然係要對方開角球黎完結。正常劇本就係我地比對方追和，但今季係破宿命既一季！ 我地未喺主場贏過 FCM，黎到第三季終於贏返一次。 賽後等到球員黎到看台前，我地叫班球員坐低一齊大唱 In einem kleinen Dorf 慶祝贏波加久違既 clean sheet。星期五晚贏波既感覺真好，之後仲有星期六日可以無憂食住花生睇其他賽果。 其他球隊贏定輸對我地黎講唔重要，只要顧好自己就得！！！ Dream on!