德乙：Holstein Kiel – SV Elversberg – Grenzenlos Groundhopping

28.02.2026
德國足球乙組聯賽 第 24 週
Holstein Kiel - SV Elversberg
Holstein-Stadion
賽果：1:1 (0:0)
入場人數： 12086（270 名作客球迷）
門票：17,60€

德乙既對手入面有兩隊波既地點係比較有吸引力，第一係柏林，第二係 Kiel。 Kiel 本身就唔吸引既，好就好在佢只係離漢堡大約個半鐘車程，週末可以㨂喺漢堡過夜。今次我地星期四晚出發到漢堡，星期五喺酒店 WFH 提早收工再出去曬下太陽，夜晚約朋友食飯，第二朝可以食埋早餐先再出發。

但喺德國年頭出門完全唔係易事，每年呢個時候啲工會都會發動罷工。今次我地完全撞正 U-Bahn 同巴士工會罷工；好在仲有 S-Bahn 可以搭。另外漢堡同 Kiel 既鐵路工程喺星期五晚開始，變咗我地無得搭直通車，要先搭一個鐘 S-Bahn 去 Pinneberg 再轉搭一個鐘地區火車！到站後再轉穿梭巴士直達球場。

Kiel 既球場外形係全德國其中一個奇醜既球場，喺過去十年佢地都係拎住臨時許可證去踢德甲乙，每年翻新少少等德足聯批佢個牌。上年就係終於起好個作客看台由場邊搬到去龍門後既角落，成個看台都只係由鐵通搭成。

今日我地有近 300 人到場，比兩年前多好多倍！肯山長水遠黎到都係會肯出聲打氣既球迷，今日仲有太陽加乘個個都心情好靚，人少但有高參與度搭救。只可惜隊波踢得麻麻地。早一晚爭升班既競爭對手 Darmstadt 輸咗比要搶分護級既 Dresden，今日如果我地可以贏到就可以爬佢地頭。

但世事唔會如我地所願，對方早兩星期炒咗帶住球隊升班既領隊，由前漢堡領隊 Tim Walter 執教。開波後，主隊球迷準備咗好多大字報去多謝被炒既領隊，雖然最近成績唔好，但 Marcel Rapp 永遠都係為球隊創下德甲歷史既領隊。新領隊既戰術好似就係只係唔比我地有波在腳多過兩秒，的確係幾有效。我地對呢啲緊迫策略就無哂符。更大問題係前面呀 Mokwa 成日都失蹤，我地好似點走都搵唔到空位。

下半場有一腳喺左邊落底線地面傳中，個個漏哂比 Mokwa 趕到篤入，暫時佢入咗三球都係呢種餵到埋口既機會。問題係我地唔多呢一種機會呢。兩分鐘後我地自己喺中場犯錯送咗個機會比人追和。成場波唯二精彩時刻就係呢兩球波。