21.02.2026
德國足球乙組聯賽 第 23 週
SV Elversberg - Eintracht Braunschweig
Waldstadion an der Kaiserlinde
賽果：3:1 (2:1)
入場人數：8758 (700 名作客球迷)
門票：季票

上場作客過咗四十分之後，大家既心情都平和哂。我地都無咗嗰種緊張感，覺得今日係去食花生咁以輕鬆既心情去迎接場波。反正今日得兩個結果，一係我地大炒人，一係人地表現異常大炒我地。今個星期週中突然落咗場大雪，但今日開始終於回暖，一下由零下兩度升到有成七八度。希望冬天終於完結，等我地班球員可以走出冬眠懵懵下既狀態。

客隊今日賣唔哂作客波飛，臨近賽前退咗大半部座位門票比我地拎返黎賣。 Braunschweig 都算係德乙中其中一隊大球隊，只係近年成績真係麻麻地，季季都差啲臨尾香又死好彩護到級。加上佢地對住我地既往績除咗第一場喺主場大炒我地之外就未贏過，黎到作客一球波都未入過。啲球迷都唔睇好呢場波，慳返啲錢同時間留喺屋企睇仲好。但如果要講下今季可以預計爆冷既劇本黎睇，今日佢地應該係要贏波。

估唔到開波五分鐘左右我地就喺右路由 Petkov 扯尾柱入波領先；二十分鐘後又係佢喺右邊再射入，睇黎今場我地唔洗太過擔心。 作客球迷今日雖然企唔滿，佢地喺失波既時候都無停過打氣，但就算完半場前追入一球都無傳出慶祝既聲音。。。 下半場我開始落咒係咁鬧 Mokwa 廢，真係有好多次腳波都係喺佢腳下失，接受唔到！！！！

後來喺左腳有球靚波傳中， 企正喺龍門前既 Petkov 完全唔獨食，仲睇到 Mokwa 吉哂印個波比佢射入第三粒。呢球真係比我都射得入，而球波只係錦上添花，暫時係改變唔到佢廢既事實；快啲入多幾球波黎改變我睇法！！！！完場前我地仲有球唔知點樣得返黎既十二碼， Zimmerschied 好慢動作咁跌低，賽後啲球迷話唔明點解會比十二碼， anyway，個個大叫要球王 Schnellbacher 射，我就話應該要 Petkov 射等佢完成戴帽，佢係拎住個波但佢將個波交比好耐無落過場既 Sickinger ，我懷疑佢地想比 Sickinger 入波刷 bonus，大家開心好過自己獨食。點知佢把握唔到機會射失咗。。。

賽後等班球員黎到看台前慶祝完就大叫 Sickinger 個名等佢唔好失落，總有機會再落場同入波！！ 其他想爭升班既球隊個個都贏波，史浩克有迪斯高加盟之後場場都好似睇佢教波咁，自己入波又得、走位又得比靚傳又得。佢賽後訪問話史浩克唔屬於乙組所以會盡佢所能幫隊波升班。總之過咗今個比賽週之後聯賽榜無變過位，下場繼續努力～

最後對方未能如期爆冷，但終於成功第一次喺度作客入波，延續今季破宿命既劇本！