14.02.2026
德國足球乙組聯賽 第 22 週
SG Dynamo Dresden - SV Elversberg
Rudolf-Harbig-Stadion
賽果：1:2 (1:0)
入場人數：29155 (500 名作客球迷)
門票：19,80€
終於可以再去 Dresden！喺德國有兩個我最中意既城市，一係柏林，二係 Dresden；兩個都係充滿歷史故事既城市，市內周圍既建築都喺度講緊歷史。只要有機會我都唔會拒絕去呢兩個城市，早幾年喺丙組錯過咗黎作客既機會，定行程嗰陣仲喺地區聯賽無諗過會升班。。。今次終於可以第一次踏足 Dynamo Dresden 既作客看台。
今場波撞正情人節同埋 Fasching，好多人都會選擇去慶祝而唔去睇波。場波再次被安排喺星期六晚做精選賽事，喺免費電視台直播，我地一心諗住無咩人會跟隊作客，最後真係估唔到有 500 人黎到。 最可惜係球隊安排既球迷巴士因為唔夠人報名所以未能成行。 呢架巴士係即日來回，好多人㨂咗其他球迷會搞既三日兩夜或兩日一夜既旅行團。
而情人節對 Dresden 黎講一啲都唔浪漫，二戰期間呢個城市正正就係喺情人節前後一日被炸彈完全摧毀，當地市民住咗喺廢墟幾十年，等到東西德統一後先慢慢重建同修復多座歷史建築。 Dresden 既別名係 Elbflorenz，Elbe 河上既佛羅倫斯，淨係呢個名都已經解釋到呢度曾經有幾靚，喺文化同歷史上有幾重要。 每年既情人節都係當地大型遊行既日子，會有極右派出黎遊行，然後有大愛派話要出黎阻止佢地，總之一連三日都會好多人上街。
東德係右派 AfD 另類黨既票倉，睇黨派支持度可以睇得出東西德既邊界；同埋 SGD 亦都係出哂名排外既球迷。 外人係指唔係來自同一個城市同唔係支持同一球隊既人，所以我地就算同佢地毫無瓜葛都依然要好小心。係咁提大家喺街上千奇唔好做蠢事，唔好貼貼紙，唔好講 on9 野，因為對方真係癲佬黎！！ 而我對佢地左定右戓者排唔排外都無咩反感，反而幾欣賞佢地立場鮮明，好多野講得出做得到。
我地每次去東德都會睇下有無機會可以去波蘭或者捷克睇多一場波，今次我地星期六朝早出發，留到星期一先回程；因為星期日會去捷克。 星期六夜波其實都幾好，日頭可以喺屋企食埋早餐先出發， 幾個鐘後到達時啱啱 lunch time。 之前見過有人介紹當地有間台灣餐廳，所以到埗後就去嗰度醫肚。叫咗牛肉麵同豬扒便當，份量可以但味道就好一般，應該唔會有第二次。
喺酒店休息咗一陣就出城睇下啲地標先再行去球場，喺場外我地既球迷大使帶我去同對方既球迷大使打招呼，個人 say hi 既同時以質疑既眼光上下打量我，亦都無伸手出黎諗住握手。 令我諗起我十幾年前黎聖誕市集想買個 pin 返去做紀念時，個攤位入面條友都係咁既眼神望我，傳出「外來人黎呢度做乜」既感覺。 總之喺人地地方，佢唔 dup7 我我就已經好滿足。 佢話要等埋啲球迷巴士到達先可以同我去 K Block 嗰邊拎工作證同帶我入場。
嘩，要去 K Block！？ K Block 係SGD 既核心球迷看台，外人被「建議」連門口都唔好走近。 呢個看台有好多明文寫哂既規矩要守，咁多年後當然佢地唔洗睇字都知要做啲咩，最簡單既係九十分鐘都要出力打氣，比賽近間絕對唔可以拎電話出黎等等。唔跟規矩就後果自負，好彩就比人鬧幾句，比人踢出看台，唔好彩就真係唔知會發生咩事。
我就對進入 K Block 無咩興趣，我只想離遠睇佢地表演！！！ 等到大部份作客球迷到場後，我就跟對方既球迷大使向主看台方向行。 唔知點解佢突然釋出善意，問我黎過未，上場作客凱沙羅頓有咁多人係咪好正，故事教訓就係唔好以貎取人~去到 K Block 門口隔離既辦公室拎咗龜背之後有另一個人帶我入場同講解我可以企邊同點樣還衫。 得意既係佢地好緊張咁話我呢一刻要著住龜背同埋記得記得要還。
穿過幾道門之後就直接入到球場場邊，經過後備席就見到免費電視台 RTL 做緊賽前直播。 個女人話平時我可以企喺禁區邊都得，但今日有 RTL 黎做直播就無咁多位，又同我講喺邊個位先影到作客看台，對面有球迷組織既護旗人喺度，建議我無咩特別都唔好過去，反正個角度都唔會靚。 然後再話我知如果半場就想返入作客看台既話就可以交件龜背比個光頭佬， 心諗邊個光頭佬呀，個個都戴哂冷帽睇唔到邊個無頭髮同埋個個一樣樣！！！
零下幾度要自己一個企喺場邊個感覺特別凍，更慘既係睇住隊波竟然對住升班馬無力還擊！ 上半場係比主隊係咁搶攻，開波不久就已經領先，我地既借將 Jason Ceka 發揮 120% 水準跑前跑後，仲入咗球越位波。 唯一安慰係可以正面睇住 K Block 開心打氣，如果有人監住我既話實會覺得我係黎呃證入場，影主場球迷多過影作客球迷 😀
下半場返到入作客看台，個個都話未見過隊波可以踢得咁差，對住升班馬踢得差已經唔係出奇事。 雖然我都叫咗自己作最壞打算，但同時喺心入面係咁自言自語，想講升班就一定要入到波。 估唔到今季加盟既 Mickelson 接應後場 Rohr 既靚長傳喺左路自己踢入追和！！！！ 下半場個個脫胎換骨，搶返主導權，廿分鐘後 Petkov 喺十二碼點執雞射入反超前！！！ 癲！！ 之後我地喺電視先睇返，原來佢入波之後仲用腳趾公救咗球必入球。
最後補時八分鐘，我地班球員終於識浪費下時間，領先緊唔洗急住攻！ 最後因為我地入咗球手球詐糊要等 VAR ，補咗超過十分鐘先完場，成功打破今年暫未輸波既 SGD ，作客反勝！ 睇黎星期六夜波係吉時？
完場後唔少得同班球員慶祝一輪先離場，今日係狂歡節週末，上季我地喺主場大勝柏林一齊叫 Alleh Hopp 慶祝；今日就喺度再次一齊 Alleh Hopp! Alleh Hopp! 賽後 Petkov 做訪問提到升班唔係隊中既話題，被記者打斷話唔信佢講既野，佢就好認真咁反駁話佢地知自己係邊度黎，知自己既既質素，著眼每一場波更重要。 當然如果場場都贏到最後會升班，但而家我地唔係場場贏波所以無謂講升班。
今日最重要既係終於拎到要安全護級既 40 分，目標達成之後，希望我地班球員可以好似隊長咁講享受足球！！！
