17.01.2026
德國足球乙組聯賽 第 18 週
1. FC Nürnberg - SV Elversberg
Max-Morlock-Stadion
賽果：3:2 (0:1)
入場人數：25639 （450 名作客球迷）
門票：19,80€

新年開工後啲同事問我準備好開季未，我好直接話未。望下上星期開波既德甲賽事，遇上寒流暴風雪癱瘓中北部既交通，場波可以繼續進行係一回事，可唔可安全準時出發同返屋企又係另一回事。 我仲係好想可以留喺屋企梳化做廢人，但現實係德乙黎到今個週末又開波啦！回暖咗幾日之後等到我地要去作客又再凍返。。。。

星期六朝早出發時見到日出，望住個巨大太陽吸收下維他命 D。 向東出發不久進入巴戈利亞州之後，迎接我地既係大霧同陰天，同太陽 say byebye。本來唔係特別期待呢場波既心情變到有少少不安，最大問題係隊波喺嚴寒下就會唔識踢波。。。

歇冬期間我地又有大新聞，本來話會留隊至季尾既 Ebnoutalib 喺新年前確定轉會至法蘭克福，轉會費係 8m + 2m。暫時唔知呢 2m 係點先會收到，總之就一定有 8m 先。佢係法蘭克福出世同長大，細個又去過睇訓練去等球員合照同簽名，可以返去自己屋企同為由細支持既球隊效力，唔 lur 飯應先係大傻仔！！！ 對我地黎講，我地唔知佢係咪真係奇材定咁啱好彩入到十二球波，可能上德甲會有人好好咁培育佢令佢可以成為真正既頂級射手。 見佢喺法蘭克福啲訪問全部由內心笑出黎，喺殘酷既足球世界只有極少數人可以夢想成真，仲要加盟後即刻有得正選上陣，仲仲仲要喺德甲處子之戰就入波。總之我地好為佢開心既同時又好開心收到 8m，希望來季可以喺場上再相見！

兩個波鐘既車程到達紐倫堡後，我地喺球場外既指定作客停車場泊低架車；個「停車場」位於會展對外既大長街。 對上一次黎係上季季尾五月頭，一切都仲好記憶猶新，只係由仲凍緊既春夏天變到真係好凍既冬天。 同埋今日少咗一半人入場睇波變到好冷清。

上季我地喺呢度贏波觸發升班既可能性，做 party crasher 搞壞對方既超大型正日生日慶祝活動，一整日都好美好；老實講，今日真係無可以開心返屋企既感覺。 我地既球迷大使都係中意周圍睇波既同好，聖誕期間佢去咗意大利睇咗幾場波，我地又分享下英國啲圖書館既悶事。今日有超過 450 名球迷到場，對上季係少咗啲但算係一個可以接受既數字！

主場球迷（係球迷唔係球隊！）今日準備咗一份小禮物一早放咗喺作客看台前，呢份禮物係佢地自資印製既紀念門票。 喺 capo stand 上有盒野寫住 an die Fans aus Elversberg， 入面最少有一千張精美門票（勁睇得起我地覺得我地可以有過千人黎作客？！） ，上面其實仲有封信去講帶後原因，最主要係佢地不滿紐倫堡既票價愈黎愈貴，到而家就連想要一張實體門票都要額外比錢。 波飛對好多球迷黎講唔只係單純用黎入場既物件，而係一個回憶。 球迷黎作客既車費已經係一個負擔，足球必須繼續係人人負擔得起先可以將個文化承傳落去比年輕一代。所以佢地準備咗呢張紀念門票比今日入場既球迷，用自己既方式去幫大家做個紀念。

過去兩季黎作客時，佢地既球迷大使都分享咗同球迷相處之道；例如只要有人同佢地提出要求佢地都會盡量去配合，對作客球迷（起碼對我地）都係以禮相待，話我喺場內想點都得，佢地都無咩所謂。呢個「想點都得」既前提當然係互相尊重既情況下既意思，例如你想搵個好啲既角度影相既話，唔好踩佢地既底線（去北看台影相）就唔會理我。 以前支持史浩克既我當然同樣支持紐倫堡，近年有直接接觸後好感到大大大增！

今日入場人數只有二萬五人，上層看台大部份都係吉位，上半場既氣氛就一般般，直到主場球迷視球證為黑哨同我地既球員插水之後開始有啲火花。 同埋主隊其實踢得好好，中場完全玩哂，有幾次必入球我都唔知係點樣成功點樣擋到（唔想睇返重播）。我地比啲漢堡球迷係咁咒罵唔比 Otto Stange 落場，諗住 Ebnoutalib 走咗終於到佢發揮，點知都係做後備。 下半場到佢落場，空龍射唔入，靠「黑哨」得來既十二碼又射唔入！！！！！！ 好啦，射失十二碼和波都仲可以接受既 （Asllani 都係射失十二碼之後先成材），去到完場前對方又喺左路入攝再入波絕殺反勝。到底我地後防有幾廢？？？ 諗起武肺嗰陣作客 Offenbach 連失三球都係角球開出被頂入。

對上一次喺新年頭場贏波要數到 2022 年，今日踢得咁差無野好講，陰濕既天氣同賽果完全符合。 唯有下場返到主場再黎過囉，贏多兩場先可以提早確定護級！！