30.12.2025
英格蘭足球超級聯賽 第 19 週
曼聯 對 狼隊
奧脫福球場
賽果：1:1 (1:1)
入場人數：74,197 (3039 名作客球迷）
門票：65£

好耐無留意過英超，只係喺 app 度開咗利物浦既賽果通知，同埋今季開始會因為 Woltemade 見到多咗紐卡素相關新聞。季初喺網上見到有人話曼聯廢到要開 general sale 黎清飛，我就十幾年前已經被朋友迫去睇咗場波，當時係免費飛就可以接受。而我另一半有個人生中必到既球場清單，呢個 Theatre of Dreams 就當然係清單上其一。 本來我地都諗住要等佢地踢埋啲盃賽或者外圍賽先有機會買到飛，今次見到佢地真係有 general sale，喺暑假就訂咗兩張聖誕快車期間既波飛去英國過聖誕～

當時諗住淨係我地兩個去，幾個月過後見到仲有飛剩，我就問兩老有無興趣一齊北上。雖然佢地對足球無興趣，但入場影幾張相打下卡又可以同啲朋友曬下命，反正每人身邊總有支持獌既朋友。之前夾佢地一齊去溫布萊睇國家隊都有比佢地喺朋友之間威咗一排～～

首先買飛已經勁麻煩，頭嗰兩張可以一個 account 買到兩張。 之後再買嗰兩張要一個新 AC，要出動我用黎收 spam 既 email 黎開個新戶口黎買飛。更麻煩既係佢地唔會有實體飛，所有人都要下載個獌 app 然後加張飛入 Wallet 再用電話 NFC 嘟入場。Email 仲提到無智能電話唔係藉口，市面上有好多平價智能電話，叫啲無智能電話既人去買返一部。我話我一定唔會比我既電話有獌 app 既出現，我亦都唔想全家每人都 download 個 app，最後出賣公司電話黎搞掂一切，張四張飛都 load 落一部電話。

有啲球隊都係話唔再出實體票，要 scan QR code 入場。但如果我地聯絡佢地話想要實體波飛做留念，佢地都會安排比賽日去 ticketing office 度拎飛，唔會額外收錢。低組別啲既就通常可以直接㨂 printed ticket，我地只需比郵費寄黎德國就得。 據我所知獌唔係唯一一隊搞 NFC，但係我地第一次遇上無選擇權既經驗。你想要實體門票？得，比五鎊（另加運費）就可以獲得紀念門票一張，喺賽後會寄出，未出發就已經有一個遊客/顧客睇波經驗。 早兩星期紐倫堡球迷投訴自己隊波要收一歐先可以有實體門票，然後自資整紀念門票希望可以守護人人都能夠負擔得起既足球文化，只能話一個好強烈既文化差異。

喺比賽日當日，我地朝早 Wetherspoons 食早餐然後喺市內行街，午餐去左位於 Salford 既 Queens Arms；呢間餐廳係爸媽喺 youtube 睇到所以想黎試下。佢地一間香港人開既居酒屋，我爸中意食海鮮天婦羅同炸物，所以專程揸車去試下。老闆同職員都好好招呼，最緊要屋企人食得開心～～～

返到酒店放低架車我地就慢慢向球場方向移動，喺 Piccadailly Gardens 有 Tram 搭三個字車就去到球場，落車後行十分鐘直路就到門口。途中有好多小食亭，我食完午餐仲飽緊，但我爸已經嘈住話要買份漢堡薯條食，唔係會無氣力睇波。我地想先去 fanshop 買頸巾做紀念先，我真係唔知係呢年既變化定點。間 Megastore 門口有大約十條人龍，每人都要先經過安檢先可以入內。 安檢係好似機場咁要放低個袋，要比佢地睇到部電話喺邊，然後要行過一部機，真心唔明個作用係咩。

預咗入面會好多人，入到去真係大開眼界，真係超多人，好似去咗行花市咁會比人推住行。我地目標清晰，一個去搵頸巾，其餘三個就去收銀處排住隊等。點知入面有成 30 個收銀處，排隊條人龍係流水式咁完全無停過落黎，完全唔洗排定隊先。果然係世界級傳統球隊，收錢安排做得勁好，呢方面係一個好好既顧客經驗。

出返去食完野之後就先帶爸媽入場，因為我地張飛分開買，佢地唔係同我地坐同一區。我同佢地過門口安檢先，再喺閘口幫佢地嘟飛入場。 之後我地經過作客區門口去到我地既閘口入場，當時仲有半個鐘左右就開波，喺英國好少可咁「早」個看台就差唔多滿哂。我地通常都係全行第一個入座，今日我地竟然係最後一個入座，要大家起身讓位比我地入去～～ 喺正我地後面同右邊就係作客區，可以食正作客球迷既打氣聲。

原來曼聯既「會曲」係改詞版 Take me home, country road，場內超過七萬人大合唱既場面係幾震撼。Stretford End 喺開波前既旗海亦都好靚，場內仲有好多唔同既口號，無可否認既係曼聯係一隊傳統大大大球隊，奧脫福係足球界既其中一個殿堂。回想喺細個睇英超時期以為呢世都唔會見到曼聯衰落，以為一世都要比曼聯食住；估唔到有生之年見到執教咗 26 年既費格遜退位，曼聯既傳奇終於暫時到此為止，然後慢慢成為大家既恥笑對象，英超曼聯又輸一場變成我其中一個最中意既 meme～ 希望嗰個英國獌迷呢世都唔洗剪頭髮做長髮公主！！

今日對住今季未贏過，連輸十一場既狼隊，我諗住黎到要睇獌贏波。 果然喺上半場就領先，全場傳出魚拉突！魚拉突！打氣聲，無諗過完半場前狼隊成功追和！！！ 下半場狼隊踢得似樣返啲，但兩邊都無咩入肉攻勢，令到場內氣氛愈黎愈差。 好多時間場內得返啲背景聲，我自己而家有 bias 但真心想知普通球迷係咪真係覺得咁樣已經係好好氣氛既英超賽事？ 上網睇啲片可能有一兩分鐘 mix 哂全場既打氣聲，喺 90 分鐘內加埋就真係得一兩分鐘有所謂既氣氛，通常都係錯失埋門機會之後大家會唱一兩 round 半。

最後狼隊護到呢一分，成功取得今季第三分，由連續十一場全敗變連續十二場不勝。前一日打破保頓主場不敗身，今日到幫狼隊搶分，我地係咪有啲不可告人既神力？！ 反正今日最開心就係唔洗見到獌贏波～

離場後行返去搭車返市中心，佢地既人潮管理做得唔錯，有大約十條隊然後分開一半去月台唔同既位置，我地等第二架車就已經上到車。 但我想講我去過睇咁多場波，搭過無數次巴士火車回程，喺唔同地方都係會好多人想湧入車箱好正常，但今次係第一次啲會真係用力推同迫上車，我喺正車門口本來係可以順住人潮上車，但右邊啲人係夾硬推再攝上車。希望以後唔洗再黎呢啲無文明既地方。