29.12.2025
英格蘭足球甲組聯賽 第 23 週
Bolton Wanderers - Mansfield Town
Burnden Way Stadium
賽果：0:1 (0:1)
入場人數：22320 （1306 名作客球迷）
門票：21£

喺英國南部過完聖誕之後，喺屋企打咗兩日牌，然後就一齊北上去曼市兩日旅行。出發時有兩個最期待既行程，首先係去麥當勞食早餐，過咗咁多年終於食到麥記薯餅！！！多得全家都對薯餅無興趣我可以幫佢地食哂～

四個鐘後到咗曼市就即刻開始第二個行程：食午餐！ 喺英國暫時食過最好食既茶餐廳就係曼市既跑馬地冰室，一坐低即刻叫杯凍鴛鴦；然後每人叫一份主菜再加份西多士 share。 食飽後去酒店 check in 休息一陣就同兩老先一齊行去市中心比佢地認下路先，我地兩個就出發去保頓開始今晚既行程。

難得北上唔可以只睇一場波，利市曼市附近都有好多必睇既球隊！保頓唔係啲咩頂尖球隊，但喺我睇英超既時期佢地都係一份子，仲出過唔少出名既球員；我對佢地既認識仲停留喺以 Reebok Stadium 銳步球場為主場，多年後原來啲冠名贊助名已經轉過幾次。我地喺開波前一個鐘左右就到咗，成日都唔記得喺英國波唔洗預咁多時間。 見到出面有個 fanzone 要有波飛先可以入，我地入去湊熱鬧睇下有咩做。

入場有其他比賽既直播，仲有啤酒同美食攤位，其中一間係炭火即焗 pizza，我地叫左份保頓批同兩杯 Brewdog 啤酒，喺大電視前坐低食晚飯。個 Pizza 要 14£ 有少少貴，但勁熱勁新鮮，好好味！！！ 本來諗住入場食垃圾 pie ，好在走咗入黎食即整 pizza，成個人即刻暖返同心情即刻變靚。

等到開波前十五分鐘我地先慢慢入場，去埋廁所先搵位都完全唔遲。 作客球迷喺我地既右邊，等到球員入場時放咗枝黃煙助興（wow, 估唔到可以喺英國睇煙）。 聽其他德國人講，喺英國想睇啲有氣氛既比賽要好識㨂，喺低組別黎講客隊 Mansfield 算係比較出力既一隊，我估係因為佢地當中有鼓手長期會帶動節奏，靜落黎既時間唔會太長。除此之外，佢地唔係淨係唱公廁歌，等我地可以訓練下英式英文既 listening，估下佢地唱緊咩。

只係唔知如果佢地唔係領先緊的話仲係咪會不斷唱歌，今日既場內氣氛真係只靠班作客球迷撐起。 只要佢地唔出聲既時候成個場就會變圖書館，由我地個位睇唔到啲保頓啲核心球迷其實係坐喺邊，又或者到底有無人會 9 唱下歌。去到最後十分鐘，主隊終於出力搶攻，但啲個別球員既質素奇差；總之個波到佢腳就會失去控球權。 最後以正常賽果一個入球完場。

離場時要喺場外搵 Kiosk 輸入返車牌號碼比泊車錢，再喺停車場塞咗大約十五分鐘先可以慢慢離開。 兩老本來仲話等我地返去再一齊出去，點知佢地一早就攰到提出返酒店休息。 第二日我地會有全日喺市外遊走，瞓飽第二日再去睇多一場波～