26.12.2025
英格蘭足球甲組聯賽 第 22 週
Luton Town - Wycombe Wanderers
Kenilworth Road Stadium
賽果： 4:0 (2:0)
入場人數：11,596 （1,092 名作客球迷）
門票：30£

呢幾年十二月去英國已經係我地既傳統，今年就遲少少先出發可以食正聖誕快車賽期，終於可以一嘗 Boxing Day Football 既氣氛！

我地喺 25 號出發，以為機場會好多人好混亂，點知幾乎所閘口都係直行直過咁！ 去到上機閘口先開始多人，我地班機係滿既，上機時空姐係咁謝口明白大家有好多禮物跟身，要用盡一切空間放行李，如果搵唔到位就唔要 offload 就唔可以準時到達 ；仲叫大家搵到自己個位就坐低，班機只係一個鐘，用恐嚇方式令到大家勁有效率咁上機坐低同起飛！ 最後仲要早咗半個鐘落機，入境又係完全無人！

由落機去到拎車只係半個鐘內既事，就連永遠多車既 M25 都暢通無阻。唔洗一個鐘就落到南部同屋企人打邊爐慶祝聖誕！第二朝一起身就有早餐食，食個自家制五香肉丁通粉就出發北上去今日既目的地 Luton。

路上既交通同尋晚係完全回兩事，愈近 M25 就愈多車，就算有五條線都係滿哂車；好多車一見有少少位就會由最左去最右再返去最左，唔係話德國無呢啲情況，但喺呢條 M25 上咁樣攝黎攝去完全係正常事。（回程返到落 M3 啲人揸車就正常返好多） 去到尾段 M1 ，導航話可以行小路快幾分鐘，我地就跟導航行，end up 係去咗啲鄉村路，即係雙程行車可以揸 60 但條路只夠一架車經過同時又唔會可以清楚見到對面有無車黎既路。 當然我地只敢龜速前進，去到某個位真係見到對路車要對方後退比我地過先，咁又解鎖一個新技能。

去到 Luton 將架車泊低喺市中心既商場停車場，見入面排哂長龍先醒起英國既商店係得 25 號先會休息， 26 號係做 Christmas sale 好多人都會出去買減價貨。有少少時間都想入啲舖頭睇下有啲咩抵，但喺門口見到地下一地都係野，全部野都好亂就完全唔想行入去。

由市中心行去球場只需大約 15 分鐘， Luton 早兩年升班上英超成為一時佳話，除咗成績之外，佢地最特別之處係個球場。喺英國，球場同住宅區只有一街之隔係極之常見，就連球場入口位於住宅之中亦都唔出奇。 Luton 既作客入口係喺兩間屋中間 （二樓已經係民居），球迷要經過人地既花園先可以入到球場。

我地唔係作客球迷無得入侵人地後花園，但我地既入口位於一條後巷之中，呢種肉眼可見足球同平民之間既親切感正正係英國足球既吸引之處，但當地人可能未必咁諗？ 數返去 1985 年既足總盃抽中對米禾爾，當時大批作客球迷嘗試湧入球場指定地方外，喺場內搞事，當時作客球迷係被分到另一邊龍門後唔洗經過民居既 Kenilworth Stand，試想像下如果比呢班友要穿過你個花園入場既話，隨時連花園都無埋。

今日係 Boxing Day，場內外都係被聖誕氣份包圍，唔少球迷戴住聖誕帽入場，有啲唔怕凍既就著住 (ugly) Xmas sweaters 同家人朋友睇住波過聖誕。作客球迷喺我地既右邊龍門後，同樣都係心情好好咁黎到睇波。 Luton 喺聯賽已經連續四場贏唔到波，今日對住喺聯賽榜只差三位既 Wycombe 應該唔會易踢。 btw 我英文不佳，之前跟人學先知 Wycombe 既讀音唔係 y-com-be，而係只有兩個音讀 wickum，更驚訝既係喺場內聽到身邊啲人大家先學識 Luton 唔係讀 Lu-ton，而係 Lu-on，好似 water 讀 wa’er 咁，係無 t 音！！

主隊好早就入咗一球波，睇下我地喺英國睇波既往績場場都係一球起兩球止，即係餘下超過 80 分鐘可以唔洗諗入球。點知完上半場對方後防送禮入多一球，下半場既氣氛好輕鬆，主場球迷好期待同一個球員再次犯錯係咁近距離恥笑佢，其餘時間都係圖書館氣氛下睇波。失咗兩球之後班作客球迷都仲會間唔中唱下歌，整體既氣氛要和應作客球迷唱既 Luton is a shithole, I want to go home。去到尾段失到第三球後就直接收皮，到失埋第四球大部份人提早離場。

完場後我地一轉身已經係出口，唔洗幾步就出返去街外，同大班球迷一齊行返去市中心拎車起程返屋企！