21.12.2025
德國足球乙組聯賽 第 17 週
SC Preussen Münster - SV Elversberg
Preussenstadion
賽果： 1:1 (0:1)
入場人數： 9828 （550 名作客球迷）
門票： 11€

黎到聖誕節前最後一個週末，今年最後一場聯賽賽事，又要去大西北平原作客。今季既賽程安排比過去兩年差好多，連續兩三場作客波都係去同一個地區令到好多人隨隊作客既意欲大減。 早兩星期呻完啲人搵好多藉口㨂波睇，今日唔知點解又有成超過五百人出現！？

Preussenstadion 既擴建同翻新工程已經喺幾年前開始咗，直到佢地上年終於升班上德乙先繼續趕工。 上季我地黎作客時，其中一個看台仲係一大片工地，最後喺今季開季前完工，將作客看台搬到去新看台既角落。另一邊廂，核心打氣球迷就搬到去佢地最最最最原本既位置（即係我地之前既臨時看台），對面龍門而家起緊新既看台。 球迷既意願係唔想喺看台中間有任何出入口，所以而家見到既係一大片好似斜坡既咁巨牆；我地都好期待睇下完工之後呢個球迷看台會變成點！

上季我地只有 350 人到場，好在我地位於好矮細既看台入面睇落唔算太差。 今日黎到新既作客看台多左超過二百人，由下望向上睇落唔錯。 主隊同我地球隊 deal 好話可以開放主看台部份座位比我地，咁佢地就可以將正式既作客座位看台賣返比自己球迷，然後會將作客企位票價調低，將本來既 18€ 減價至 11€！ 可以以咁低價去一個新看台睇波真係好抵！！

今日好彩最後都仲執到一分，如果唔係真係唔會想講返場波。先講看台內，今日有超過五百人到場，一個好容易控制既人數，點知就出現問題。 個問題係唔記得帶大聲公，難得有個咁易聚聲既作客看台竟然犯埋啲咁既錯。 好在大家個個今日都算聽話，仲可以講笑氣份反而仲好過無大聲公。（起碼唔洗聽回音被轟炸耳朵)

對面最第一秒已經搶住黎攻，頭幾分鐘我地絕對可以失兩球，多得神龍 Kristof 紐亞上身救哂所有必入球，連十二碼都救埋！！！！！ 係咪大難不死？ 之後輪到我地搏到十二碼，被身價暴升既 Ebnoutalib 操刀射入！ 半季入咗 12 球既佢成為暫時既神射手，法蘭克福唔知做咩勁有興趣想買佢，仲話要冬天就想簽到佢。 我地開價一千萬，球員自己都係話想留低，覺得呢度暫時係對佢自己最好；我地領隊就話我地當然想佢留低，但無理由有人開價七千萬我地都唔賣架嘛。

球迷就希望個價啱就快啲賣走佢，以防佢只係曇花一現，用舊錢可以買到幾個好球員執好啲隊波 xD 但同時都唔想佢只係遇到貪錢既經理人只想賺佣金趕佢轉會，害咗佢既前途。 望下上季借過黎既 Elias Baum，法蘭克福又話會比多啲上陣機會佢，點知大部份時間連後備都無佢份！！！！ 講返 Ebnoutalib，我地平時笑住話佢每入一球波身價就應該 +1m, 但佢今場既表現係係咁扣錢，頂佢半單刀唔橫傳比空哂既 Malanga， 好啦你咁胸有成竹點知又射失。

其他球員都係，係咁交失波送機會比人；過去幾場波我一直覺得佢地唔夠自信心，應該大膽啲多啲起腳射門，今日就個個自信心爆棚變哂獨食鬼浪費啲機會。 去到最尾補時就連神龍都收皮。 對方手榴彈掟入禁區，Kristof 唔知做乜衝出近柱想接個波，但佢計錯哂數，個波發過咗佢直落佢背後對方球員身上輕鬆射入。

聽講對方過去幾場都喺補時階段入波，面對住對住 SCP 輸多過贏既往績，同埋佢地今日既高水準表現，最後拎到一分真係要感恩。 只係去到最後一秒先被追和個感覺好差。。。。 再加上史浩克作客榜尾居然輸波，我地竟然錯過一個拉近距離既機會！！！

不過我地最後都有 34 分以第二名完成上半季，又係球隊一個新紀錄。 另外我地係 2025 年得分最高既德乙球隊； 聽落唔錯，但要成為同一季得分最高先有用架～～～ 出年贏多兩場就可以達到護級關鍵 40 分，達成呢個目標我先再 chur 成為季內得分最高球隊 ^ ^

賽後班主場球迷個個當贏波咁慶祝，我地班球員都無咩表情咁走到作客看台前。 我地準備咗塊有鄉音既大字報多謝球員同祝大家聖誕快樂，新一年大家一齊繼續加油！！

回頭睇返今年先覺得時間覺得好快，諗起今年第一場好慘痛咁喺主場反輸、作客凱莎羅頓既大型 choreo、作客史浩克入附加賽、升班失敗、Ｎ 場絕殺等等，全部都係一年之內發生既事。 出年到時會點呢？護級應該好容易搞掂，之後又會點呢？ 會唔會再黎一次心碎，定係再創歷史？