14.12.2025
德國足球乙組聯賽 第 16 週
SV Elversberg - Fortuna Düsseldorf
Waldstadion an der Kaiserlinde
賽果：1:0 (0:0)
入場人數： 9307 （1500 名作客球迷）
門票： 季票

話咁快年尾黎到今季最後一場主場。 唔記得以前有無講過，Elversberg 個 berg 喺德文係解山，Elver(s) 有咩特別意思我就唔太清楚，但隊波咁啱就可以食正 Elf （十一）同音字，呢個名就好似為咗足球而成咁。 其實我想講唔係隊波既花名，而家個 Berg.

叫得做 Berg 即係條村喺山上面，黎到冬天一係就好好天但凍到仆街，一係就變到好似被 Elsa 冰封咗既 Arendelle 咁被封喺濃霧之中。今日由法蘭克福出發時係多雲天陰，但能見度仲係好好；當我地去到最後直路準備上山時就層霧就出現。。。 入到球場係差啲見唔到對面龍門同看台。

去到開波前大約半個鐘啲球員出黎熱身時，對面看台突然傳出打氣聲我地先知原來對面已經齊咗人。 我去主看台中線位都唔可以清楚見到作客看台！！！ 尋日場夜波波琴作客漢諾威，波琴球迷放完煙啲煙就困咗喺個球場地面，場波因為視野太差停咗差唔多十分鐘。 今日呢場波既能見度仲衰過尋日，我地好驚球證會唔肯開波。 以前地區聯賽時期，只要天氣預報話會有霧既話，場波早幾日就會宣布延期。。

等到球員入場時，客隊喺霧中展示佢地準備咗既 Choreo. 喺看台底有大字寫住 es geht um alles，然後拉起另一半大字 Fortuna。 喺層霧變到更濃既時候佢地喺大字後放紅色濃煙，啲紅煙停咗喺半空完全無郁過，仲觸動咗看台後面個煙霧器要搵消防員黎熄咗佢。 原來佢地輸輸下已經跌到落下游位置，成為要搶分護級既一份子。

上半場一開波我地搶住黎攻，有幾次把握力好少少就已經領先兩三球。對方又唔似喺下游掙扎既球隊，同樣都有好幾下有威脅既埋門。今日我都終於放棄執著，決定全心全意重投足球既懷抱，但下半場入返去 Block C 係一個錯既選擇，因為場上有層霧喺度，對眼好容易就 focus 咗落看台前既網，睇得勁辛苦！！！ 估唔到心理上好返之後會遇上物理障礙！！

仲要我地當然希望隊波長期攻緊，即係要佢地長期喺對面隱身喺霧中。 去到 80 分鐘對面無啦啦傳出慶祝聲，我地個個你眼望我眼過咗兩秒先一頭問號咁慶祝埋一份，原來漢堡借過黎既 Stange 又再後備上陣入波，叻仔！！！！！

最後成功一球定勝，保住上半場主場不敗紀錄！！！ 過咗 16 個比賽週已經有 33 分，離護級關鍵 40 分只差 7 分！！！下星期就係今年最後一場波，希望可以有個美好結局完結呢一年！