06.12.2025
德國足球乙組聯賽 第 15 週
SC Paderborn - SV Elversberg
Stadion Paderborn
賽果：1:2 (0:1)
入場人數：12.729 (260 名作客球迷）
門票：18,15€

睇作客人數就知又黎到其中一場唔吸引既對手，位於大西北既 Paderborn。 其實今場波唯一唔吸引既只有隊波本身同個球場，同上個月去史浩克作客相比，今日只係遠多大約 40 公里，但作客人數即刻由 2500 人跌到落 250 人。 拎出黎講，嗰啲今日坐喺梳化睇波既人又搵好多借口，哪有錢哪有時間之類。

其實直認自己係 Event fans 咪算囉，同埋去睇你所謂既「大賽」就唔好黎投訴呢樣嗰樣，話啲旗阻住視線、話一早霸咗靚位但比人趕走、話唔知大家唱緊啲乜、話氣氛唔夠好。 今日唔係大賽咩？今日既對手係排第二，高我地一位，係我地直接競爭對手。今日得 250 人但看台內參與度係 100%，唱下舊歌仲可以愈唱愈大聲、各枝大旗依然存在我就無人投訴睇唔到波。 今場係暫時唯一一場比上季更少人既作客賽事，係好失望，但其實寧願看台內人少而個個都出力支持球隊，好過企滿成個看台睇相畫面好靚但個個都一肚氣！

星期六朝早八點半出發，中途喺麥當勞食個早餐再繼續上路，大約喺開波前個半鐘入場。 Paderborn 既作客球迷攝影安排好弱智，係一張 A4 授權信咁列明我被授權只可以向作客看台影相，唔可以影場內其他野；總之就講到好嚴格咁要有呢封信先可以入場影相。 我到場時封信未到我手，我就如常用自己張飛入場，搜身時佢地話要檢查我部相機未必入得場。 有另一個保安過黎睇下我部卡片相機，用手指彈咗幾下就話 ok la 比我過關。？？？

本身其實有啲期待入場食佢份 Mantaplatte （咖喱腸加薯條），但我份麥當勞早餐仲未消化完，喺場內完全唔肚餓。。。想食都食唔落。 淨係買咗杯熱紅酒暖下身就夠。 上咗德乙之後都未試過作客 Paderborn 贏波，第一次輸波，第二次和波，繼今季既「破魔咒」理論，今日應該係時候係度贏波？

Ebnoutalib 接應角球（！）頭鎚頂入為我地開齋領先！！！呢兩星期傳法蘭克福有興趣買佢，傳我地開價一千萬，我地講笑話佢而家每入一球就應該要加價一百萬～ 佢本身就係來自法蘭克福，聽講仲係法蘭克福球迷，想返自己鄉下去踢自己支持既球隊完全合情合理～領隊話如果有人出高價想買我地既球員無咩理由阻人發展，大家都完全同意。 總之離隊前幫我地入多幾球波贏三分就夠！

下半場開波不久對方就入波追和，又係 Le Joncour 隻腳搞到個波改變方向碌去死角入波。呢啲情況當然唔可以怪佢，但呢球好似已經係今季第三球同佢有關既失波，希望佢可以快啲行完衰運！！ 幾分鐘後對方喺中場從後攔截直紅，本來 55 波變到我地開始有多啲空位去造攻勢。 Ebnoutalib 本身入咗球再次領先，大家慶祝完返到中圈等開波，球證先話 VAR 發現入波前半分鐘喺近中場位置越位，所以呢球判為詐糊。 一場歡喜後大約十分鐘 Schmahl 終於入到一球合法既波領先！

最後補時係 11 分鐘，完全唔知點樣計出黎， 6-7 分鐘都算合理，但 11 分鐘？？ 諗起德丙對 Rostock 既惡夢比人喺補時追和反勝，呢段時間好難捱！！ 班球員又上哂腦咁仲係咁攻，領先就 dum 下波鐘去角球旗浪費下時間啦！ 好在最後頂得住完場，拎到三分升上第二！

賽後班球員黎到看台前，我地要求教練團都要一齊搭膊頭大家齊齊整整咁慶祝。今日我選擇繼續自閉企喺大家後面安靜睇波；再一次確認足球真係可以治癒心情既良藥。 呢九十分鐘真係可以令我集中場波去內心既悲傷，雖然無參與打氣，但呢三個入球出現時我都不禁拍手慶祝。一直唔開心落去都幫唔到咩手，受災既人都努力走過陰霾，而家更重要既係提醒自己要珍惜身邊既一切，同散播多啲正能量！大家加油！