30.11.2025
德國足球乙組聯賽 第 14 週
SV Elversberg - SV Darmstadt
Waldstadion an der Kaiserlinde
賽果：0:0
入場人數：9307 （1500 名作客球迷）
門票：季票

自大埔火災發生後，我呢幾日既情緒都好低落。喺火災入面無我認識既人，但呢件事影響到唔只係災民，而係全香港人。

黎咗德國咁多年後慢慢覺得唔應該對香港既事物有太多意見，喺德國我有我愛既人、有愛我既人、有自由、歲月靜好又有足球；一個生活喺外國既人無咩資格去講太多。直至呢場火既出現，我無諗過自己會咁心痛。 同朋友講完一堆說話就比佢地鬧返轉頭：你係香港人黎架，你無資格去講香港咁邊個有？

原來，我仍然心繫香港。呢一刻，我好掛住香港。

呢幾日我喺度諗有啲咩可以幫到大埔同香港，其中一個念頭係寫塊大字報，簡單用英文寫出香港加油。 得到既回覆係：呢場火係咪有我識既人受影響，我地無為過啲咩戰爭同衝突寫過大字報，等大家再傾下先。 呢刻突然了解到香港既事其實只係我自己既家事，同德國人無關。最後我都唔想解釋點解要拉埋啲根本唔知發生緊咩事既人去做一件佢地唔認為值得既事係無意義。 我完全無意怪佢地點諗，只係現實打醒咗我，唯一能夠斷定我係咩人就只有我出生同生長既地方，其他人有咩義務要因為我既悲痛就要一齊去為香港做啲野？

星期三火災新聞出黎既時候仲喺公司忙緊，見到有 PN 知道出事但唔得閒開黎睇，去到我另一半都問我有無睇新聞我先睇咗幾張相。好彩返工勁忙無時間玩電話，返到屋企碌 Threads 時就喊到收唔到聲，之後都唔太敢拎起部電話驚會喺公司喊。 週末本來想留喺屋企自閉但又覺得應該出去吸下新鮮空氣放鬆少少。

去到星期日呢場波，我想去睇波但完全唔想參與打氣唔想同任何人溝通。 反正入場後同大家打個招呼後就企埋一邊，早咗去主看台嗰邊坐低。 呢個球場突然變到好陌生，呢度係咪真係我既主場？

唔知係咪連個天都唔中意我，我喺主看台係無劃位，一直都係就咁入傳媒席坐。 今日如常去我個位，臨近開波有兩個肥佬話呢兩個係佢地個位。 我旁邊個球會職員阿叔叫佢地過主，連個保安都叫佢地走，話入面仲有兩個位叫佢地去嗰度坐。 點知原來椅背後面真係貼咗兩張細貼紙係劃咗比嗰兩個人， 我同個阿叔就一齊去第二個位度坐，仲好，我本身個位係睇唔到左邊角球旗，坐中間個位仲靚。 只係點解好地地坐咗超過一季既位無啦啦會比人踢走。。。。 我喺球場入面原來都係無屬於自己既位置。。。？

今個比賽週繼續有球迷抗議行動，開波後十二分鐘大家靜默抗議。 呢十二分鐘今日我解讀為大埔災民默哀，原來有時靜靜地睇波都幾好。 今日天灰灰落大雨，完全符合我既心情。 唔知係咪我既低氣壓太勁，兩邊都入唔到波無人可以歡呼。 我前面有兩個客隊既球迷電台喺度直播，我同自己講今日雖然唔打氣，但入波的話一定要對住佢地枝咪大叫。反正場波最後 0:0 完場，對我黎講係完美結局。

願大家健康平安，同身邊重要既人一齊過平淡既日子就好。