23.11.2025
德國足球乙組聯賽 第 13 週
Karlsruher SC - SV Elversberg 
Wildparkstadion
賽果： 2:3 (0:1)
入場人數： 31,909（2300 名作客球迷）
門票：18,59€

作客 KSC 既好處係夠近，過去兩季都有近千人隨隊；而今日更加有超過二千人到場！ 但以往績去睇就一啲都唔期待呢場波：六負二和。喺德乙對住佢地入幾多球波都會被追返，一早同自己做咗心理準備唔好抱任何希望。

喺賽前既星期三我地收到 KSC 既球迷組織聯絡話想我地參與賽前城內遊行。 喺過去兩週既國際國賽期間，多隊球迷組織無分你我一齊到萊比錫既街上遊行抗議，對政府期近想推出一堆針對球迷既政策表示不滿。 呢個遊行其中一個口號就係足球係安全的，我地要守護球迷文化。 政府近日指出好多球迷成日㒲足球黎搞事，所以要將波飛搞實名制，同埋要簡化球迷禁制令既原則之類，總總政策都係想限制球迷既自由，令到大家覺得忍無可忍，必須上街發聲。

喺萊比錫街頭上，見到敵隊既球迷企埋一齊去為共同想守護既球迷文化而發聲，呢個埸面好難得！！ 有一句說話係話我地中意既（球隊）顏色唔一樣，但有件事我地係一致既。 我地無去到萊比錫，但今日就黎到 Karlsruhe 既街上為我地相信既事上街。 本來我地預十二點先到球場，變到要十點前到達，同其他人一齊先喺球場外集合再搭巴士去市中心。 呢兩日仲要有冷鋒氣溫跌到得返 -5 度！ 好在去到上半場既時候都有個太陽曬住先無咁凍。

呢個係一個正式既人民集會同遊行，唔係普通既 Fanmarsch 出發前搞手喺架車仔講解今日遊行背景、目的同理念，中間講到我地都有黎一齊支持呢個集會，廣場上過千名 KSC 球迷擰轉頭向我地報以掌聲。 我地都有六十人到場，當中仲有幾個中年球迷黎支持！ 沿路一齊叫下口號行咗大約個半鐘就到達球場各自回歸自己既崗位。

今日邀請咗一個 Threads 友到場睇波，早兩日咁啱碌到佢黎德國睇波，叫佢如果有興趣的話可以落黎體驗下作客波！ 當時我淨係希望唔係失波得太早搞到看台內無咩氣氛會比個壞印象人地！！ 開波後既頭十二分鐘會延續賽前既遊行，喺場內靜默抗議。 對返既看台前掛起大字報寫住：你係咪想將來變成咁？ 一個無氣氛無激氣既球場將會係強行搶去球迷自由既結果！

十二分鐘過後，雙方球迷即刻開聲為自己既球員打氣。 作客看台既表現今日異常地好，企喺球場另一邊都可以清楚聽到歌聲！！！ 26 分鐘唔知點解我發緊夢，突然見到個波碌緊入網？？！？ 後來睇返先知原來對方後防唔知有鬼，比 Bamba 偷咗個波再橫傳比 Younes 射入！ 但對住 KSC 領先一球無咩意義，可唔可以快啲入多幾球比我安心下？ 上半場我地踢得好好，仲有好多機會，如果把握得好啲應該一早就入咗三四粒！

下半場返到看台內，SVE 向住我地呢邊攻。喺對面有幾次混亂下都成功護到個龍門，最後去到 62 分鐘都係頂唔住失手。 幾分鐘後 Petkov 笠死龍入靚波，我地又再領先。 中間都仲係好多只差埋門一腳既威脅！！！！ 入唔到波都同我好好地守住後面！！！ 點知就係比對方喺左路走甩一次有時間睇住黎傳中，個波精準咁落喺 Simic 頭上頂入，又再次被追和。

唉，呢一刻真係接受咗命運。唔知係魔咒定宿命，反正我地就係贏唔到 KSC 啦。 去到補時階段，我只希望可以守得住呢一分；喺我放棄咗既時候班球員仲未放棄。佢地個個出盡力去走位同追每腳波，喺左路傳中 Petkov 甩甩地但佢伸盡隻腳篤個波比 Keidel， 佢諗都無諗就起腳射波，個波拉到去遠柱入網，射入佢加盟後第一個入球，絕殺 KSC 破解宿命！！！！！ 領隊 Wagner 都開心到由後備席狂奔到作客看台前一齊慶祝，笑死！！

今季好多魔咒被破解咗咁，例如我地由唔識接應角球入波到而家靠角球入咗幾球波；作客史浩克未輸過到輸咗第一場，尾段入波呢啲極罕見既今季變咗正常事，Younes 入波但只入一球，到今日終於喺 KSC 身上第一次搶到三分。 暫時黎講今季比過去兩季仲好玩！！！

等到球證吹完場雞，有幾個球員首先衝過黎同我地慶祝先。 連續失落咗四場波，今日呢三分對挽回班球員既信超級重要！！！！不過佢地要先去球場中心圍圈聽領隊講下廢話先，然後好快就一齊衝過黎慶祝！ 有少少上季季尾贏史浩克既感覺，大家都好似完成咗一個里程碑咁！！！！呢一日實在太完美～～～～多謝班球員踢咗場好多比來自香港既客人睇！！！

黎緊既賽程完全唔易踢，全部都係對住近況大勇既球隊。 不過學領隊話齋，我地唔洗諗升班住，因為首先係要拎到四十分護級！ 而家仲差 14 分，即係最少要贏多四場波先好再講其他野。 下星期返到主場繼續加油！！！！