08.11.2025
德國足球甲組聯賽第 12 週
FC Schalke 04 - SV Elversberg
Arena auf Schalke
賽果：1:0 (1:0)
入場人數：61,818 （2500 名作客球迷）
門票：20,35€
今個星期終於做到一直想做既事：週中去第二個國家睇波然後回程飛去第二個機場跟 SVE 作客！ 今朝天未光就去機場，由 Belgrade 飛 Düsseldorf 再轉火車直去 Gelsenkirchen。
我地班機朝早九點喺濃霧之中降落，落機後勁順利咁過關同到火車站。當架火車進入魯爾地區就慢慢見到陽光，去到 Gelsenkirchen 直情喺藍天大太陽下落車！其他人由 Saarland 出發預大約四個鐘，我地由塞爾維亞出發去到球場門口最後都係只花咗大約五個鐘！一切都要感激班機同火車都出奇地準時～ 諗住天氣咁靚係一個完美結局既開始，當時心情仲好好，好期待快啲開波。
我地最後喺球場開門前幾分鐘就到咗，諗住早啲入就可以趁多人前唔洗排隊就買到野食。點知佢地火都未開，啲腸既包裝都未開。。。同過去兩年一樣，今日得到一張可以場內看台各區自由走動既工作證，我就離開作客區行去其他主場區睇下買到啲咩返去。 經過其他入口時見到 UGE 喺門口賣緊年曆同自製既商品，但我身上無現金買唔到 🙁 只能專心買個包同薯條返入作客看台。
半個鐘後，搭大巴到場既球迷組織成員都陸續到場。 佢地入場後啲後生仔無啦啦除鞋，個個喺鞋底拎咗一堆貼紙出黎，原來佢地為咗唔被搜出同沒收貼紙所以收哂喺鞋底。 集齊返哂啲貼紙之後個個好似螞蟻咁擁哂去側邊分隔開主客區既透明妝度狂貼貼紙！ 唔夠十分鐘就貼滿咗幾塊玻璃。
史浩克上季僅僅護級成功，最後一場仲要喺主場輸比我地。 今季唔知點解成績突然反彈升到聯賽榜頭幾名既位置，過去兩三星期都係喺直接升班位置。今日呢場仲變成爭上榜首之爭！？我地過去兩次黎到作客都贏 2:1， 今日我地當然希望可以繼續成為史浩克主場最怕既剋星，但對方近期真係況態大勇，唔同上兩季咁甩皮甩骨。
開波前佢地如常先唱礦工之歌 Steigerlied 再轉會歌，雖然呢個 rundown 已經好似見慣見熟變成平常咁，但每次見到企滿人同咁活躍既北看台都總會令我內心感到好激動。 史浩克真係熟於頂級聯賽，要喺次級聯賽對住鄉下隊真心好委屈…. 今日我地有近 2500 名球迷黎到作客，有啲人係為咗一齊唱 Steigerlied 所以跟黎作客 ._.
好啦，終於等到開波啦。望下看台屋頂，個藍天原來消失咗，又唔知點解呼吸變到愈黎愈重。可能因為今朝太早起身，去到呢刻眼皮開始變重同埋覺得喉嚨熱熱地。當我仲發緊夢既時候，開波唔夠四分鐘我地後防又走甩位比咗機會對方入波。 領先後既史浩克跳升上榜首，佢地既得失球差只有九球，16 個入球喺頭十名之中最低，今日到我地見識到佢地點樣先入波然後死守至完場。
又一次馬後炮，但無咗藍天同突然覺得唔係好舒服，又咁早失咗呢球波，我已經覺得今日唔會笑住咁離場。中前場既組織能力其實唔錯，特別係條中場都仲好有自信比到好多靚波，只係兩邊既個人能力有啲失準。 Keidel 喺左邊有幾次突破越位落到禁區邊底邊位置想傳中都拉得唔夠靚比對方擋咗，新球王 Ebnoutalib 好似有少少回塘，到底佢嗰九球只係曇花一現定係我地要 trust the process！？
半場休息時走咗出去球場外面吸下新鮮空氣之後就無咁唔舒服，入返作客看台咆哮一下反而好返好多。 看台入既氣氛今日超差，一來又係大球隊效應，太多花生友，二日最重要既原因係我地落後緊。中段喺南看台有人要急救被抬離場，成個球場安靜咗大約十分鐘。 北看台後來因為眼見隊波就快打破宿命可以喺主場赢 SVE 同再次升上榜首，主場既打氣聲愈黎愈勁，有幾次我地真心覺得開聲打氣只係浪費緊自己既口水，不如安靜欣賞下對面啲大佬。
最後我地入到兩球越位波，補時九分鐘都幫唔到啲咩。 chur 咗超過九十分鐘都入唔到一球波追和。雖然真係唔覺得隊波踢得差，啲已經聯賽三場不勝啦！！！！ 完場後主場球迷好開心咁迎接班球員去北看台慶祝，我地要聽住佢地叫 Spitzenreiter…. 睇黎呢一口烏氣佢地忍咗好耐，黎到第三年終於可以對住我地喺主場慶祝！
回程我地先去 Essen，當時我好肚餓但又無咩胃口，見到火車站啲三文治就想嘔。唯一想係既只有湯麵，越南河粉又好，蘭州拉麵又好，總之唔想食包同唔想食乾既肉。 喺 Essen 火車站對出有一個 food court，入面咩都有得食，有間日式拉麵解救咗我！ 正唔正宗都唔重要，最重要佢地有湯又有麵仲有兩塊叉燒，食完之後即刻精神返，仲可以隊多一件 Basque cheesecake 先行返去火車站搭車。無諗過火車又係好準時咁出發同到站，仲趕得切返到屋企沖埋涼睇星期六夜場德乙開波。黎緊又有國際賽程可以比班球員休息+ 執一執後防發夢同前面走位既問題。兩星期後作客 KSC 要輪到我地打破宿命去贏波！！！
