06.11.2025
歐霸盃小組賽 第4週
FK Crvena Zvezda – Lille OSC
Stadion Rajko Mitić
賽果：1:0 (0:0)
入場人數：32.711 （150 名作客球迷）
門票：2600 RSD （約 22,50€)
喺足球入面十大打比其中一場包括塞爾維亞首都打比，紅星對游擊隊；好自然去睇呢場波係我人生必做清單上既其中一件事。留意咗咁多年發現呢場波既比賽時間因為啲不可預料既原因而會有變動，想去睇呢場邊的話就要可能要預埋比賽週前後幾日時間。再去到近年當地賽會對呢場波有各種限制，暫時都未有機會可以再見到以前 Belgrade-derby 既盛況就無再突然諗過去塞爾維亞。
早兩個月要開始計劃清假，睇下其他國家有啲咩吸引既賽事，碌到呢一個星期既歐洲賽程發現去塞爾維亞可以夜機去早機返。仲要平時聯賽賽事當地足總可以中意話改就改，但歐霸比賽唔會改期，我地可以放心出發；更重要既係當地有早機返德國，我地可以趕到星期六去作客史浩克。
最後我地喺某一個星期三放工後就即去機場，喺機場食埋飯班機八點準時起飛；訂既係 Air Serbia 但班機係 Air Bulgaria 既舊機，上機後冷氣同通風都無開，個個著哂衫傳出勁大陣臭汗味；我未搭過印度般空但我肯定機上呢陣味唔會輸！！！ 喺機場我買咗本雜誌入面送咗張香水試用裝，本來對香水敏感既我即刻開咗佢黎搭喺個鼻上救咗我條命！！！！
塞爾維亞唔屬於歐盟，所以出入境係要用護照的； 但我地可以行電子通道好簡單就過關；過閘後喺路中心零零舍舍有一個櫃枱，經過佢時比人大聲叫 WAIT! 原來過完通閘係要比海關吸印；佢地唔會檢查護照，求奇翻一頁出黎吸個印就完。 之後照原定安排諗住搭巴士出城，一出門口就係巴士站，上面寫住我地想搭嗰班會喺五分鐘內到達（其實到而家我都唔識睇佢地個巴士站牌，但我估係指五分鐘）。 呢度既公共交通係免費既，只有小巴先要比錢。 等咗超過五分鐘都唔見有巴士到站，但呢度等（同食煙）既人愈黎愈多，最後企咗喺度三個字都唔見有巴士；而巴士站牌上既數字已經變左 0 超過十分鐘。。。。最後放棄搭免費車，改搭小巴每人比 4€ 快啲出城去酒店好過。
第二朝食完早餐諗住搭巴士去河邊既景點觀光，點知同尋日一樣等咗好耐都等唔到巴士，最後改行路去～反正天氣好好，曬住太陽去散步都係唔錯既選擇。 去到呢刻對呢個城市都仲未有咩好感，呢度既餐廳絕大部份都可以室內食煙，個個食完飯第一件事都係點煙，好難頂。 半年前我地去完克羅城亞首都，個個都好有友善同好多野都正正常常；呢度就真係無論係啲人既行為定街上既市容都好似第三世界同大陸啲二線城市無咩分別。
好在河邊既城堡同景色都還好，有個太陽幫手加返啲分； 睇完景就經過啲住宅區行返去城中心。唯一一樣令我地開心既就係食物， 喺當地食 cevapi 或者其他燒肉真係無得輸；燒肉應該係佢地唯一會用心做既事。 食飽諗住返酒店換衫先再出發去球場，又一次等極都等唔到想搭既巴士。陣間我地只可以搭巴士去球場，好擔心最後到底去唔去得成？
最後提早咗好多出發，以防真係等唔到巴士的話要行大約一個鐘；點知等咗唔洗三分鐘架巴士就出現。車上入面差唔多全部都係女人，迫咗大約半個鐘車程就喺正紅星既球場門口落車。當時四點左右個太陽已經落緊山；我地先去睇下場外既坦克車，再去 fanshop 買紀念品。 呢度有兩大舖頭，一間係官方店，另一間係球迷組織自己開既店，店內有衫褲賣，我地入去買左一堆貼紙返去做紀念～
喺場外好有多防暴警察重裝介備，以我所見好多都係四十歲咁既阿叔，唔似其他歐洲國家會見到有後生仔；聽講當地後生一輩都唔想入紀律部隊。我地太早到就只好企喺場外等開門入場，我地個入口有好好好好多小學雞一齊喺度排隊，睇黎我地呢區啲飛最後送咗比當地既中小學生入場睇波？ 入場時保安好認真咁搜袋，對佢地黎講最重要係有無硬幣，我話我完全無現金佢用個好奇異既眼光望住我。 我睇咗上季黎作客既史特加球迷分享好多入場前要準備既野，就係千奇千奇千奇唔好帶硬幣。 當地貨幣其實係無硬幣，唔知佢地係擔心啲人會掟硬幣定其實只係想掠水。
入場後見到仍然空空如也既球場，我地終於黎到 Marakana；縱使今日唔係黎睇打比戰，能夠黎到呢個球場睇波已經係完咗半個夢。 作客區喺正我地既右手邊，今日黎作客既只係法國里爾完全唔係重點。 望向北看台上印出 cyrillic “Delije” 字眼，呢個字意指勇氣，係紅星球迷對自己既稱呼。 球場內只有一層看台，但呢一層最多有成六十行。 由最底嗰行行返上去一定勁攰！好在我地坐喺山頂，行幾步就可以返入入小食亭避風同時可以隔住玻璃窗睇住球迷慢慢入場。
東歐人通常都係最後一秒先會入場，我地今日就等住源源不絕既中小學雞分批入場。 我地嗰區充滿住小朋友既尖叫聲，旁邊又間唔中傳來作客區既大聲公叫聲蓋過咗北看台既打氣聲。 然而今場波我我地呢邊既西看台睇落全滿，搵唔到位可以逃離就只好接受。 啲球迷喺過去幾場聯賽都未禁止入場，今日係受歐州足協控制啲球迷先可以入場睇波！
北看台掛起哂啲旗後，就喺旗面再掛多一排大字，意指「踢出你最好既水準」叫啲球員出力，今季喺歐霸仲未贏過波！ 佢地仲喺看台中拉出咗一條黑色既長膠條到龍門後面，之後仲吹脹咗成為圓柱體；喺看台內見到球迷組織從側邊好似趕羊咁趕啲人一齊去中間度企，到球員入場時砌咗個我地完全睇唔明既 choreo 出黎，係一隻怪獸伸脷？到底係咩意思？？？？？ 幾日後見到有其他人放咗張靚啲既角度上網，原來係兩隻手揸住打機既遙控器，黑色嗰碌野係立體電線！！！！ ok…. 但其實想表達啲咩？比啲球迷控制球波？？ Anyway，雖然睇唔明個 choreo 但砌到出黎又係另一回事，respect!
話說之前睇 Dinamo Zagreb 喺賽前好期待睇 BBB，最後佢地人多聲細搞到好失望；今日都叫自己唔好有太大期望反而有啲驚喜。 就算我地有小學雞尖叫聲覆蓋住成個主看台，我地都間唔中聽到北看台既打氣聲；再加上主看台間唔中都加入一齊叫！ 另一方面，今日跟住球隊黎作客既都一定係超忠實球迷，就算得一百人左右，佢地喺上半場都無停過打氣。
北看台喺下半場掛起另一塊大字報，大意指「你惹我地唔起」，最後有塊上下倒轉既白底藍十字旗，上面印有 ULTRAS 字眼。 當時我地唔知係咪隊 Ultras 被搶旗。。。我睇下佢地最近既賽程都無遇上藍白色既球隊，後來得知係馬賽已成立 25 年既 Commando Ultras 既旗。佢地的確最近無喺賽場上相遇，有消息指馬賽球迷到葡萄牙時唔知喺邊度搶到一塊紅星足球隊既旗，然後倒掛起再影相放上網。 紅星出咗名係超級小氣…. 真係惹唔起。
賽上面兩隊波都喺度拉鋸，去到近完場時紅星搏到十二碼射入，最後去一球僅勝，終於喺歐洲賽場上贏到今季第一場波！賽後啲小朋友好快就離場，北看台就等啲球員一齊慶祝，比我地等到佢地於咗幾枝煙，同埋可以安靜聽到佢地唱歌！
離場後我地衝上第一架巴士落山，返到市中心再行返酒店。喺十點鐘我地叫咗一碟燒肉，好耐無試過咁夜先食飯，但喺球場吹風吹咗三個幾鐘後我只想食啲熱野，呢碟肉又救咗我地一命！！！ 第二日我地去咗 Waterfront 海旁想見識下文明，黎到新市鎮真係好似去咗第二個世界咁；個個識講英文仲會好有禮貌招呼你！？同埋我地發掘咗一個好吸引既名勝，就係 Slavija 廣場/迴旋處。 呢個迴旋處有七個出入口，個場景仲混亂過巴黎凱旋門，勁多花生食；我地特登搭咗幾次電車就係為咗可以親身經歷呢個奇景。
Belgrade 係少數我完全唔想重回既地方，係，我仲想黎睇打比同埋去游擊隊主場…. 但除咗足球（甚至係藍球）之外真係無咩原因要再特登花時間黎。。。覺得今次只係度過咗兩日三夜絕對夠哂。
