31.10.2025
德國足球乙組聯賽 第 11 週
SV Elversberg - Hannover 96
Waldstadion an der Kaiserlinde
賽果：2:2 (1:1)
入場人數：9307 （1500 名作客球迷）
門票：季票

今週既地獄賽程終於黎到最後一場，七日之內兩次作客，喺星期五晚返到自己主場迎戰其中一場升班熱門漢諾威。對方開季時表現唔錯比人感覺係最有力爭升班嗰隊，但近幾場開始失準失分多過嬴波；暫時作客不敗既佢地（加作客最少入兩球）黎到作客主場不敗既我地，賽前我地話最後應該和波完場。

我地喺德乙成為好多大球隊既「Angstgegner」，意思係對方既剋星或者係最怕既對手。我記得我地德乙既處子之戰作客漢諾威和二比二，上年作客反勝佢地三比一，原來數數下我地對住漢諾威係未輸過！今日我地算係終於遇到排上游既對手，可以比較下到底我地十場拎廿二分係好彩定有實力？

星期五開波即係要提早收工，喺繁忙時間花差唔多兩個鐘南下去主場睇波～ 入場後仲有唔夠一個鐘就開波，當時客隊既球迷組織仲未到場。北部今日係紅日，佢地安排咗特別班次火車由漢諾威直落鄰市有火車站既 Neunkirchen，再轉搭特別安排既穿梳巴士到球場。 喺佢地到場時有幾個球迷嘗試爆閘入場，我估佢地應該帶咗啲 pyro 入場玩，期待開波後可以有野睇～！

對方陣中有兩名前 SVE 球員， Rochelt 上季離隊加盟一直都未能好好表現自己，有段時間仲比自己既球迷狂插表現差；今季就有同我地由地區聯賽踢到上乙組既 Neubauer 加盟。 今日正選陣中只有 Neubauer， 唔知佢地係咪怕 Rochelt 又犯錯送機會比我地所以唔敢放佢正選呢？

作客區今日滿座，就咁睇落陣型氣勢都唔錯，佢地果然全場間唔中放下煙！畫面係靚但聲勢就一般，好少可有一個滿座既作客區係可以比主場既打氣聲蓋過。 唔知離隊既球員係咪有啲咩魔咒， Neubauer 踢咗廿分鐘就自己整傷被換出場，兩分鐘後我地就有個靚機會入波領先。 隔咗兩場終於識得入返波啦！！！！ 今日既組織流暢返，起碼踢返我地應有既水準，但後防仲係麻麻地，去到完半場前又再失烏龍球，又係 Le Joncour！！！？

下半場有好多埋門機會但最後一腳都直送對方龍門懷內，當時覺得 keep 住咁樣攻應該總有一次機會送到個波入網！只係個球證今日廢到喊，無人理解到佢既執法標準，去到八十分鐘 Schmahl 喺禁區比 Rochelt (!) 輕輕撞跌，球證竟然直指十二碼？！！ 當下我地個個都睇到其實唔值得吹罰十二碼，覺得轉頭就會被 VAR 吹返轉頭，點知最後照比十二嗎？ 由 Petkov 操刀我地又話佢實踢失，果然真係比對方救到左下地波，好在擋咗出去有 Conté 執到死雞補踢再次領先！！ 可惜我地保唔到個賽果到完場，五分鐘後對返喺禁區邊罰球入波再次吹和，完全符合我地賽前預測。

賽後班作客球迷同自己既球員慶祝上星期打比戰贏波 （贏死敵重要過贏呢場波～），聽講佢地陣中有個球員跳過廣告版時落地扭傷 ._. 應該要傷山一段時間。 我地等到球員黎到 Block C 前面只能繼續鼓勵佢地同集氣下星期作客史浩克要嬴波！！！！！