德國足總盃：Hertha BSC – SV Elversberg

28.10.2025
德國足總盃 第二圈
Hertha BSC - SV Elversberg
Olympiastadion
賽果：3:0 (1:0)
入場人數：32092 （380 名作客球迷）
門票： 18,70€

八月尾喺聯賽作客完柏林後，返到屋企唔夠兩個鐘就係足總盃第二圈抽籤。當時希望可以主場出戰，或者去啲未去過既球場作客，最大希望係唔洗再南下。最後先抽咗哈化柏林出黎，然後抽中我地，完全唔知可以比咩反應！！！！啱啱先大長征完梳化都未坐暖，你同我講兩個月後又要再去柏林，仲要係週中！！！

等到賽程定咗之後就死死地氣訂火車飛同酒店，星期一晚放工去柏林，住兩晚星期三下午回程。出發之前既星期六要去完 Bielefeld 作客，未抖返夠又要搭長途車！星期一去到柏林時覺得好似無走過咁，又係天黑到中央火車站，又係去 Alexanderplatz 落腳。

第二朝一早起身如常開電腦返工開會，午餐難得可以喺大城市去商場食晏，落住大雨唔可以抽少少時間去河邊散步，到三點半咗右就熄機出發去球場！由 Alexanderplatz 可以搭 S-bahn 直達球場，車程大約廿分鐘。上車之後佢遲遲唔閂門，突然宣布話前面路軌有人所以開唔到車。喺法蘭克福呢啲情況通常會搞一兩個鐘。。。我地以為自己好聰明轉搭地鐵，行到老遠先知原來 U2 維修緊。咁改搭 U5 去中央車站先再改搭火車，咁啱搭到架去球場既 S-bahn!

最後比原定到達時間遲咗半個鐘，但都趕得切同其他人喺場外會合再一齊入場。場內已經準備咗好多鐵欄去為黎緊週未做準備， Dynamo Dresden 將會帶超過二萬人黎作客。我地黎到完全無任何主客分隔，但星期六呢度會做好哂必要措施去分開班作客癲佬。佢地無得用球場既靚廁所，只可以用為佢地準備既臨時廁所，盡力保護呢個受保護既文物建築 xD 見到其他球迷成日被當成狗咁看待，有時反而慶幸我地因為毫無威脅而長期被無視。

今日我都利用被無視既好處喺場外行咗一個圈，經過東看台食下花生拎啲傳單黎學下野。之後發現北邊主場區有炭火燒烤，即刻衝去買咗件豬扒包再拎返去作客區曬命。到差唔多時候我就去場內拎龜背留喺場邊影相。

八月黎作客時都係六點半開波，但當時仲係夏天所以下半場先慢慢天黑。今日當我地入場時個天都已經差唔多黑哂。主場球迷仲喺場外放煙花迎接球員大巴來臨為佢地打氣，到宣讀陣容時熄哂場內射燈，留返屋頂既藍燈，成個氣氛都好浪漫！只係我部相機天黑時好難影到靚相 T_T

係馬後炮但自己今日完全不在狀態，對呢場波毫無感覺，「預見」唔到自己今日會有份慶祝。淨係覺得如果贏到波就可以繼續恥笑柏林，對出線第三圈真係無特別期望。果然唔夠 15 分鐘對方就入波領先。今日只有三萬二人入場，同聯賽近四萬人相比，東看台今日既氣勢反而仲勁過八月。就算我企喺作客看台前都唔係成日聽到班自己友唱緊咩歌。