德乙：Arminia Bielefeld – SV Elversberg

25.10.2025
德國足球乙組聯賽 第 10 週
DSC Arminia Bielefeld - SV Elversberg
Stadion Alm
賽果：2:0 (2:0)
入場人數： 24856（600 名作客球迷）
門票：18,70€

每次接近週末時，啲同事就會開始問週末有咩搞作；而我既答案都係：如常啦～然後佢地就會問咁今個星期去邊睇波呀？一開始同非德國同事講：去唔存在既城市。佢就滿頭問號咁，我就話係 Bielefeld。佢就當然即刻問點解話佢唔存在？我話呢個係德國既常識黎，你是但問一個德國人佢地都會咁樣答你。然後我就隨機捉住一個德國同事問佢可唔可以介紹下 Bielefeld? 佢答：下，無野可以介紹喎，呢個城市都唔存在既。其他同事就突然對 Bielefeld 好有興趣係咁問到底喺邊架，到底點解唔存在呀，拎個 Google maps 出黎碌又睇下相咁。

呢個「唔存在」既笑話喺上年去同一個球場睇波時已經講過，而之後每次如果再遇上呢隊波我亦都絕對會講一次呢個笑話；儘管當地人幾唔中意呢個唔好笑既笑話都好，總之呢個城市就係不存在。今日我都好希望佢可以消失一段時間！！！

Bielefeld 位於西北部百無既地方，上年去附近作客就特登留多一日去睇佢地既德丙比賽。每次我地去完一個以為只會去一次去地方後，好快就會有其他機會可以去到。今季佢地就升班上黎德乙，一年後我地喺同一個月又再黎到同一個球場。以前每次見到佢地個作客看台都鬧佢設計好差，係頭三個聯賽其中一個最差既作客區，無諗過入到去其實又唔太差。企啱位係可以睇哂成塊草皮，但企唔啱位就。。。。。例如我喺下半場就完全見唔到呢邊即龍門咁囉。

個作客看台有兩個入口，一個係地下，另一個就要喺場外有條類似防火樓梯既物體去到最頂有另一個入口，喺樓梯頂可以飽覽呢個城市既 skyline，有少少英國盧頓既感覺，因為腳下就係附近居民既後花園。

Bielefeld 上季除咗升班成功外，喺季尾仲以德丙球隊身份去柏林踢足總盃決賽，當時真係全市總動員無論買唔買到飛入場都去哂柏林去爭取存在感！！！今季季初佢地都踢得唔錯贏咗幾場波，只係去到近期先連輸四場跌咗落中游位置。佢地既球迷呢幾年經歷咗唔少大風浪，我地做直升機升班時佢地就直降落丙組，班球迷當然仍然對球隊不離不棄，輸呢四場波又算係啲咩喎。

今日我地呢隊鄉下隊帶咗大約六百人黎到作客，佢地就盡地主之誼比我地睇下佢地既主場威力。佢地用旗海畫出八個方格，先喺上層拉起 AVANTI 大字，幾分鐘後就將塊布向下反出黎，去到下層塊布背面就展示出 ARMINIA。以為咁就完？收起咗呢塊雙面大布之後，喺上層看台中間再拉出球隊既會徽。 Respect!

開波後我地攻咗幾分鐘踢咗一陣好波，突然就好似撞咗邪咁個個變到唔識踢波。主隊迫到我地好近搞到好多甩漏，連條後防都頂唔順。 17 分鐘對方喺右路傳中，本來比得唔算靚，個波明明可以輕鬆清走，點知 Le Joncour 竟然突然漏咗佢，直接送咗個波比後面既唔知乜水單刀入波？！？！呢下真係百思不得其解，有人叫佢漏？？？以為後面好安全？？十分鐘後對方又喺右路傳中，今次 Le Joncour 就唔漏啦，係送個波入網。兩個入波都係我地自己送比人既。後防唔掂都算，中前場都完全發揮唔到水準。

唔係將個波送去人地腳下就係太獨食唔傳波，總之今日佢地做咩都係錯錯錯！連個天都玩我地，落大雨同打風啲雨水全部向住作客看台吹過黎！嗚，明明最初我地看台內氣份好好，個個都好肯出力唱歌。下半場漏哂氣，好多人都好唔忿氣集中唔到打氣。連贏咗四場仲要不失球，今日咁樣輸兩球。