19.10.2025
德國足球乙組聯賽 第 9 週
SV Elversberg - SpVgg Fürth
Waldstadion an der Kaiserlinde
賽果 6:0（1:0）
入場人數：8483（400 名作客球迷）
門票：季票

趁國際賽程期間好好休息咗兩個星期，今日終於可以返到主場睇下我地會唔會又喺最後一分鐘先入波絕殺！ 只係對手唔太吸引，上季平均作客人數佢地竟然仲低過我地，今日客隊都嘔返啲作客門票比黎我地賣出去；最後佢地只有大約四百人到場。。。可以話係全季唯一一隊真係黎作客既球隊。

多得對方人少又無咩聲氣，我地今日可以盡顯主場霸氣；開波到完場都淨係聽到我地既打氣聲 ._.v 對方今季暫時輸多過嬴，失波仲要係其中一隊最高。 而我地過去幾場好似都只係對住啲廢隊，喺主場都係僅僅贏波。 今日可能係用黎分到底我地之後命運會如何。

上半場一開始唔太睇得出係咪又要等到最後一秒先分到勝負，有兩三次埋門機會我地都把握唔到，Bamba Conté 唔知做咩勁禮讓唔自己起腳，喺小禁區頂有波在腳就射啦！！！浪費左幾次機會後最後都係由佢開齋。 個波由龍門傳出黎比佢，佢傳去左邊既 Günther 帶左兩腳又傳返入禁區比佢一腳接應射入網，勁流暢！！！！ 你睇下，比多啲信心自己咪入到波囉～～～

喺領先得一球絕對唔夠架，兩球先可能會輕鬆少少。 下半場開波後三分鐘，Younes Ebnoutalib 喺禁區內空哂既情況下接應右邊傳中波窩利射入，又一腳靚波！ 佢兩場波無入過波後今日終於歸位啦，有佢入波我地就知唔洗輸，因為佢一定會入夠兩球！

估唔到好快佢真係又迫到對方後防犯錯，搶到個波射入第二球；哈哈！ Block C 勁即興咁 lalala la 咗首歌出黎，最後以 Ebnoutalib Fussballgott 黎完結；睇黎我地真係再次造就一個新球王！！！ 見到佢又再入兩球波同埋我地又領先緊三球，知道唔洗去到尾段食救心已經好開心。 去到 80 分鐘佢射入埋第三球完全帽子戲法！ 但呢場波仲未完場架，佢被換出接受全場球迷既掌聲後，Jason Ceka 喺禁區頂起腳直射，我望住個波覺得個龍會救到，點知入左網？！ 恭喜佢射入加盟後第一球波！！！

話說今季每場主場波都係 90 分鐘先射入重要既入球，今日補時三分鐘終於唔洗祈求入波追和或者絕殺，但最後一分鐘入波既傳統可以繼續 Keep 住既？！ 代表泰國國家隊挪泰混血既 Mickelson 被換入後喺左路傳波去遠柱既後衛 Le Joncour ，佢用鞋底接應送咗個波去另一條柱將比數最後改寫成六比零。 完全無諗過場波喺下半場會變成入球 show!!

對面既球迷喺完場前已經開始收旗執野，完場後好 hea 咁同啲球員拍咗幾下手就離場。 我地係真正既趁人病擺佢命，客隊好多球員都中咗流感而缺陣，而龍門係要搵到第三龍門上陣，唔怪之得好似紙版公仔咁。。。

我地就喺啲球員仲喺老遠時就已經伸出雙手引佢地快啲過黎一齊慶祝，一齊大叫 Spitzenreiter 同埋唱多次 Ebnoutalib Fussballgott！ 當時見到佢喺看台前拎住相機，以為佢係一個淨係識玩電話既人又少少不滿，後來先知原來係球隊比咗部電話佢叫佢拍片。 後來睇返係可以既，見到佢好蠢咁唔洗點做又聽到其他球員9up 下咁。

贏埋今場已經係八場不敗四連勝，下場要作客升班馬 Bielefeld。 佢地開季踢得好好係去到最近既狀態先慢慢下滑，我地仍然只希望可以保持水準，提早儲夠分護級，升班既時就喺護級成功後先再傾吧。