05.10.2025
德國足球乙組聯賽 第 8 週
1. FC Magdeburg - SV Elversberg
Heinz-Krügel-Stadion
賽果： 0:4 （0:2）
入場人數： 21884（130 名作客球迷）
門票：19,25€
上場作客去完 Braunschweig，兩星期後我地要再經同一條路經過 Braunschweig 去再遠啲既 Magdeburg；唔同既係今次借咗公司架電動車黎試下到底電車適唔適合我地週末既駕駛方式。 今日單程超過 400 公里，每程都要充兩次電，的確由 20% 到 80% 只係廿分鐘左右，但廿分鐘都係時間，又要怕天氣凍會唔會舊電最後其實唔夠用，各種煩惱只係令我覺得簡簡單單揸加油車咪算。。。。
星期日朝早六點半由屋企出發，大約一個鐘後去麥記食早餐同幫架車充第一次電；去到 Magdeburg 前搵另一個充電站充滿少少等我地走嗰陣可以去遠啲先再停低。 主隊話今日係環保日，叫大家踩單車同搭公共交通工具去球場，我地就用電車去響應環保 ._.
入到場後仲有大約一個鐘先開波，當時對面既 Block U 仍然係空無一人。 看台前已經掛起哂所有大旗同橫額，班球迷喺看台後面聚集仲喺出面放煙花；一齊集氣去出盡力為球隊打氣；事關佢地開季至今只係贏過一場波。。。 我地聽到佢地喺場外咆哮咗幾聲之後就見到佢地一窩蜂咁擁上看台，唔洗兩三分鐘成個看台就企滿哂人。 相比之下，我地今日只有大約 120 人到場；同上季相比多咗幾個人咁囉。。。。
主隊球員熱身完畢後去到 Block U 前先向球迷致謝，宣讀埋陣容同唱會歌班球迷就已經開始打氣。 本來好安定諗住等球員入場先拎電話出黎去影低佢地咆哮球隊名，點知佢地突然舉起雙臂開始慢慢拍手，我即劇好慌忙咁拎機影啱啱好趕得切可以留個咆哮紀念。
開波後主隊勁進取，頭十五分鐘我地好多甩漏比對方有多次極有威脅既埋門，當中包括回傳時龍門跣腳，情急之下抱咗個波入心口；第一次咁近距離見禁區內自由球，好在對方把握唔到。 之後有幾次都係勁好彩擋到對方最尾一腳成功保住不失。 捱過咗初段之後我地終於見到希望：角球！
無諗過我地而家真係可以利用角球去造機會，第一球波就係先由 Keidel 開出角球，去到遠柱既 Mickelson 腳下，由佢扭幾下再斬入禁區被 Conte 頭鎚頂入佢加盟後第一個入球！！！大約十分鐘後喺主看台有人需要急救所以主客兩邊都暫停打氣；主場球迷拎咗枝大旗去幫手擋住救急進行既地方。場內氣氛變咗好似去咗英國睇波咁（圖書館），比圖書館更圖書館！ 通常喺呢啲情況下總會有人開始大叫想帶動氣氛，以為咁樣做係熱血既表現；今日真係全場靜咗落黎！！好在我地人少可以容易控制同解釋比啲未見到呢種場面既人知發生緊咩事。
去到完半場前 Zimmerschied 射入第二球波我地忍唔住簡單慶祝一下就安靜咁進入半場休息；場內依然一片寂靜，連音樂同廣告都無。 大電視寫住因為有球迷需要被急救所以取消半場活動。 當時有消息傳出話可能下半場都唔會打氣，因為嗰位球迷暫時生死未卜。 下半場準備開波時，場內開咪話該位球迷送院後情況穩定，大家都鬆一口氣！
我地都要睇下主場球迷既眼色，見到佢地開始打氣我地先再繼續！ 由於已經領先咗兩球大家既心情都好好。 但！唔好忘記上季我地喺主場領先兩球後連失五球反輸！！！！ 我地不嬲最中意對住下游球隊輸波，波琴已經係一大例子。 今日？ 我地好似完全唔怕對方係榜尾球隊。。。。 因為對方真係好似第一日踢波咁，無默契無個人實力成盤散沙咁。
又一次我地將對方既球迷推落絕望既谷底， Block U 眼見無力扭轉局面，成個看台一齊背向草地跳住打氣；然後一齊搭膊頭由左行去右，由右再行去左。後來我地由兩個借將 Stange 同 Malanga 各入一球，大炒四球完場，以一分之差升！上！榜！首！下個週末係國際賽程所以我地會做兩星期榜首！！！用呢個賽果去慶祝體育總監 Ole Book 續約既好消息實在太完美。過去兩三個月一直有傳慕遜加柏想簽走佢，去到週中佢地既體育總監離隊，呢個消息就講到好似已經落實咗咁。 當我地仲試緊説服自己又再一次被拋棄既事實時，球隊宣布 Book 已經續咗約會留隊！！！我地一齊繼續努力去創歷史！！！！！
