27.09.2025
德國足球乙組聯賽 第 7 週
SV Elversberg - Holstein Kiel
Waldstadion an der Kaiserlinde
賽果：1:0 (0:0)
入場人數：8341 (550 名作客球迷）
門票：季票

絕殺，又再一次絕殺，今季喺主場每場都係喺最尾補時階段射入最重要既球。 唔知係咪個天見我地上季輸得咁慘所以咁樣去彌補我地心靈傷害？

賽前我對呢場波無咩感覺，早兩季係 Kiel 歷史性升班上德甲，我地兩戰都贏唔到；感覺上佢地都唔係容易應付既對手。 總之就用平常心對待，講下笑話再由 Younes 入波打救我地去掩飾下準備接受輸波既心理準備。 朝早去到 Elversberg 喺村口邊界就見到班球客球迷早兩個鐘已經到咗，仲有時間遊街周圍噴字同貼貼紙黎踩場。

雖然有啲唔 gur 但大家決定如常入場就算，賽後先巡村清理啲垃圾。對方上季歷史上首次出戰德甲，不過完全唔夠班只能做升降機跌返落黎。 要記住佢地只係以尾二降班，更廢包尾嗰隊叫波琴。 上到德甲追夢係一件好事，但如果唔夠班場場輸波其實好影響士氣… 佢地落到黎好似仲未重整到心情贏下輸下咁，要啲時間先搵得返前年升班既水準。

作客球迷要由北部橫跨成個德國黎到西南部邊境作客，咁既距離都帶到五六百人真心 respect。 喺賽前佢地仲準備咗一個簡單既 choreo，喺看台兩邊掛起藍深色膠帶去整細個看台去集中所有球迷，然後喺看台前掛起 “eingetragener Verein” 大字同配上 1900 大旗。 e.V. 喺德國足球有好重要既意思，簡單黎講係指非牟利註冊組織，德國球迷好重視呢兩隻字背後既意思：球隊唔係一個商業機構。 等到球員入場時所有作客球迷都舉起手上既頸巾，成個 choreo 真係清晰有力又好睇。

場上兩邊整場波都喺度拉鋸，對方好似偏防守多過進攻，成條後防永遠都好整齊咁集中喺禁區入面；我地又搵唔到破綻，所有射門都比佢地擋哂。 去到尾段我地都算係接受咗和波完場既事實，甚至喺對方有攻勢或者角球時都話「係時候失波啦」。 點知一次又一次比我地成功護住個龍。

真係去到補時階段，老實講真！係！無！諗！過！我地可以又又又又喺完場前入到波。 補到第 94 分鐘球證吹罰十二碼！！！？？ 吹完佢又要等仆街 VAR 去證實吹得啱，好多作客球迷話插水，但我話知你十二碼已成定局，由 18 歲借將 Stange 操刀為我地射入佢加盟後第一球波，再一次絕殺完場！！！！只要贏到波拎三分我唔介意你地場場波喺最後一秒先入波架！！！

七場波我地已經拎咗十六分，已經差唔多達到關鍵四十分既一半，我地要記住目標係護級，過咗護級嗰關先再去睇下有無份爭升班 ._. 賽後大家一齊離場，喺街上搣貼紙，路上見到唔少小學雞已經自發動手，仲爭住話「我去睇嗰條街你地唔洗過黎啦！！」 我就係要呢啲！ 記得十年後去接任護村同打氣既重任 T_T