21.09.2025
德國足球丙組聯賽 第 7 週
TSV Havelse - MSV Duisburg
Eilenriedestadion
賽果：1:1 (0:0)
入場人數：3012 （2000 名作客球迷）
門票：28€

星期六作客完 Braunschweig 後我地喺當地過夜，搵咗間 Fachwerkhaus 酒店，見佢平平地又可以入內睇下舊時德式建築。 雖然已經做好哂心理準備，但呢啲地方真係店住一晚就夠。 因為房內無冷氣所以要開大個窗通風，但外面係石頭路，每次有車經過同有人行過都會被嘈醒，呢個就係住市中心既壞處！

瞓下醒下咁到咗第二朝，起身時仲係藍天有太陽，但食完早餐準備走既時候個天開始灰灰地。 原本諗住放低啲野去架車度然後去市中心散個步先再出發，點知去到架車就開始落雨，唯有提出早發去 Hannover。

早到既好處就係喺正球場門口搵到免費泊車位！ 今日我地黎到原屬漢諾威二隊既球場 Eilenriedestadion，但而家借咗比今季升咗上德丙既 TSV Havelse 出賽。 Havelse 本身個球場因為唔附合丙組規則所以佢地要借球場用。 喺球場周圍都搵到好多同漢諾威有關既標誌，佢地就只可以掛大海報扮下係自己地方。主隊本來話開波前兩個鐘會開門，見到作客區開門後諗住主場入口都就黎開，當然喺閘外已經聚集咗好多作客球迷等緊入場。 過咗大約十分鐘有個保安走過黎話想喺呢個門口入場既話就唔可以著作客波衫或者帶相關球迷物品。

今日黎作客既係曾經風光一時來自魯爾區既 MSV Duisburg，我地前面仲有個球迷戴住頂 2011 足總盃決賽既紀念帽，當時就係佢地對史浩克。咁既陣容唔知幾時可以再見。。。。上季佢地降班落地區聯賽後隨即升返上丙組，好多人今日買唔到作客區所以買咗主場區。 Havelse 平時只有一千人咗右入場，今日最後總共有三千人到場，當中最少二千人係作客球迷。。。班藍衫喺閘外同班保安嘈，有啲選擇投降去換衫，有啲就搵辦法過骨。 最後喺主場區內仍然見唔到著住作客波衫既球迷自由走動，有幾個保安好不滿咁想捉走啲人。大佬，你地今日完完全全地被反客為主，想郁手都睇下現實情況先啦。

當客隊球員出場熱身時，身在主看台既作客球迷毫無保留咁跟住對面既作客看台一齊唱歌打氣。直到開波後先間唔中聽到幾個主場球迷叫下球隊名。

今日場波係榜首對榜尾， Duisburg 雖然上季跌咗落地區聯賽，但人腳超哂班輕鬆翻身反而吸引更多球迷入場睇波。 今季開季至今場場贏波，睇黎又想做另一隊直升班！ 諗住今日場波會一面倒有幾個入球睇。 點知…. 期待太大成場波睇到勁激氣。 唔知係德乙水平真係高一班定係 Duisburg 其實好廢 + 其他丙組更廢，兩邊都係無目的咁踢，傳波唔睇係咪有人準備接應，無人走位，想比波又比唔準！ 明明我應該黎食花生但嬲到噴火。

Duisburg 雖然係大隊今日又有二千人作客，但佢地啲打氣歌好悶。 去到最後補時階段終於出現第一個入球，場內既作客球迷超興奮咁慶祝。呢個時候佢地終於有首新歌，連同主看台既作客球迷一齊連埋手勢一齊唱。但佢地無諗過既係場波仲未完。 去到最後一分鐘，主隊喺門前一片混亂中篤咗個波入網追和！！！ 對面即刻靜哂，原來呢度都有唔少主場球迷！ 笑死，無諗過場廢波會喺高潮中既反高潮咁完，見證 MSV 由全勝變不敗。如果佢地每場都係踢成咁仲要升到班既話，我估佢地最後只會能夠成為升降機。