德乙：Eintracht Braunschweig – SV Elversberg

20.09.2025
德國足球乙組聯賽 第 6 週
Eintracht Braunschweig - SV Elversberg
Eintracht-Stadion
賽果：1:4 （1:2）
入場人數：20,085 （175 名作客球迷）
門票：20,90€

第一季踢德乙既時候我地曾經喺度慘吞五蛋，上季嫌去呢個球場既路程太悶所以㨂咗去英國而唔黎睇波，未能喺現場見證嗰三分同埋短暫成為榜首既感覺。

星期四開始夏天突然回歸，下午可以收工之後同同事坐喺街邊飲返杯啤酒先返屋企。黎到週末，今日應該真係夏天最後一日，天氣預報話氣溫可以高達三十度。我地朝早七點出門口時仲係得十三度，想像唔到陣間又要一身臭汗咁睇波？！

今日依然覺得由法蘭克福北上條路真係好悶，下場作客又要行同一條路。。。預計只會有 160 名球迷到場。。。。數字上係令人幾失望，但同上季相比已經多咗幾十人係一個進步黎。。。問心嗰句（亦都講過好多次），寧願得百幾二百人但個個都係用心用力去支持到隊，好過有兩三千人但大部份都只係想食花生投訴呢樣投訴嗰樣。得百幾人最開心係女廁完全唔洗排隊！！！

我地喺開波前兩個鐘就到達球場門口，呢度最好就係可以免費泊正喺作客區門口。今日想點名讚下球場既小食，我就有點㨂就一定會㨂咖哩腸配薯條 Mantaplatte，好好食！另外佢仲有炸雞扒包，塊雞扒皮肉又多汁！！好耐無去過德甲乙球場係可以食得咁開心，係咁推薦其他人一齊食。因為天氣關係，一食飽就隊咗兩杯啤酒都唔覺得消到暑！

等到球員進場前我就入場影下相，個太陽高掛喺頭頂，其他人感受緊 27 度既時候我既體感係 40 度！！點解突然又熱過！！？當我曬到懷疑緊人生時見到個波衝咗入對面龍門，我地領先一球！！！！後來先知原來又係 Younes 入波！！！球證吹停咗一陣要睇有無越位先判定入球有效！唔夠十分鐘就睇住對方喺我眼前頂入追和。

氣氛黎講喺佢地追和時終於有啲氣勢。我雖然企喺只有百六人既作客看台前，但都唔係好聽得清主場球迷既打氣聲，唔係話佢地弱，可能只係我比個太陽曬到懵懵地。對方上季季尾要踢德乙丙附加賽去護級，次回合喺呢度尾段入波成功護級；當時既氣氛同今日相比好似爭少少喎，係咪又要怪我地太唔吸引所以無興趣出力？

又或者可以賴落場波度，咁快追和比咗動力佢地，但我地喺完半場前又再次領先！半場時我返入去看台睇埋下半場，頭十五分鐘主隊好進取想再次追和，我地睇落都危危地；去到對面有個球員兩黃一紅被罰離場都仲未有明顯好轉。同時我地既其中一個新借將 Otto Stange 第一次落場就勁搶鏡。

去到大約七十分鐘我地有球員喺場邊碌地，而班隊友唔知係咪見到唔算嚴重就先喺後場慢慢搓下波先，球證見班球員無反應又無諗住吹停場波。呢個策略其實都幾好，對方唔知我地想點，點解有人受傷都唔踢個波出場；我地反而繼嬻做個波去前面，Stange 喺右路傳中，Younes 再次一腳射入。今日兩球波佢都係一腳接應入波！！！我地終於有一個唔洗用腦，淨係識企啱位同搵啱角度入波既前鋒！！！！