14.09.2025
德國足球乙組聯賽 第5週
SV Elversberg - SG Dynamo Dresden
Waldstadion an der Kaiserlinde
賽果：2:2 (1:2)
入場人數：9307 (1600 名作客球迷）
門票：季票

今季第三場主場波迎來德國其中一班癲佬，來自東德既 Dynamo Dresden。三年前喺德丙已經碰過頭，後來我地升班上德乙後兩季佢地都成功追上，啱啱以第二名上德乙。佢地上次黎作客既時候，球場擴建計劃先啱啱開始，作客看台加左幾行臨時座位同無上蓋；睇返之前既相已經覺得有一陣歷史味。

完全無諗過我地今季竟然利華古遜上身，定唔知喺附加賽輸得太慘，連續第三場主場喺最尾幾分鐘入波。今日我地開波唔夠兩分鐘就因為後防個人犯錯送咗個單刀機會比人極早領先；但老實講咁早失波我反而無咁驚，總係覺得隊波會有足夠時間去應對。 呢個時候睇住作客看台班友，下半層食正個大太陽既球迷全部半裸上身好多鮮肉睇～～ 呢啲通常係得啲東德球迷先可以咁齊心整靚個畫面 xD 有肉睇又有靚聲聽；唔知點解對佢地既聲勢有啲失望，有人甚至話佢地完全無氣勢。 佢地的確有好多動作，一齊舉手拍手，一齊坐低跳起；每次頭兩三 round 係幾應聲，但好快就得返「正常」聲量。

幾分鐘後我地喺對面禁區外有個罰球，由 Ebnoutalib 接應頭鎚頂去遠柱碌入！！！！上場作客柏林時佢入兩球場，今日又再建功；唔通我地真係又再成功培育新星？ 佢地我地上年由地區聯賽買過黎，來自法蘭克福有德國同摩洛哥血統，多年來都搵唔到機會突然，早兩年一度無球隊落班；完全唔知我地既球探點樣發現到佢？？？ 上季佢只係以後備落場踢過好短時間，喺柏林先第一次正選；希望佢可以保持水準成為我地既新 Asllani！？

上半場有攻有守時間過得好快，去到近完半場時又一個個人犯錯送個波比人，再次落後。 我地只好重整心情接受鬥唔過升班馬既事實。。。半場時個太陽唔再射中作客看台，原來對面都係正常人會怕凍個個著返件衫～ 突然見到佢地喺看台前掛咗條寫住 Block C 既黑白頸巾， 但我地完全睇唔出係邊條頸巾，一啲都唔似係球隊或者球迷組織既產品，可能係有人自製頸巾？ anyway，呢個舉動係對方展示佢地喺街上搶返黎既球迷物品，如果係死敵就會放火燒咗佢；今日我地唔見有火／煙，唔知佢地會點處理？

下半場初段對方有唔少機會，但後來一直都係我地搶住黎攻；去到補時階段 Ebnoutalib 再次梅開二度為我地追和！！！！！！！真係完全無諗過我地又再一次成功扭轉命運。 五場波有十分，保持到呢個水準就可以唔洗擔心降班～～～ Block C 今日既氣氛好奇怪，可以長期落後好多人都無咩動力？ 去到後來追和我地絕殺贏波咁慶祝，等到啲球員黎到看台前，我地好似例行公事咁同佢地叫幾下就完咗？

喺新領隊 Wagner 既帶領下，每場波完場後，班球員都會喺球場中間圍一個圈由教練做一個總結；佢地圍緊圈時主看台嗰邊突然有好多人喺度歡呼，原來 Asllani 黎咗睇波！！！！！ 佢早一日先喺首都作客完柏林聯仲入咗兩球波，今日竟然走黎鄉下睇波？？ 佢到底有幾中意呢度？？？ 我地講笑話下年九千萬放 Ebnoutalib 然後買佢返黎 xD 即係咁，今日發生一切之後喺電視睇返賽事精華，最無諗過既係出現 Asllani 訪問！！ 嗚，希望有其他球隊快啲買走佢，我想可以支持佢入波！！