29.08.2025
德國足球乙組聯賽 第4週
Hertha BSC - SV Elversberg
Olympiastadion 
賽果：0:2 （0:1）
入場人數：39,680 (310 作客球迷)
門票：18,70€

一年後新一季我地又又又到首都作客，今次無柏林馬拉松拉高火車飛同酒店價錢，可以以正常價喺市中心留幾日，花多少少時間做遊客！但到底點解要安排一場要橫跨全國既比賽喺星期五晚上演？

星期四四點收工搭火車去柏林，車程四個半鐘，夜晚九點半到達位於 Alexanderplatz 既 Motel One check-in。星期五起身如常開電腦工作，喺二樓有個住客可以 24/7 出入既 lounge，有安靜既角落可以專心做野， lunch 都可以喺度食埋然後三點幾熄機去迎接週末既來臨！Alexanderplatz 本身無咩特別好做，但呢個站四通八達去邊度都得，例如有 S-Bahn 可以直接去到柏林西邊既奧林匹克運動場！ 車程大約廿分鐘，同其他人約好四點半喺場外指定地點集合，然後五點一齊行入球場～

今次雖然已經第三次黎作客，但都要再講下呢個球場真係好特別好靚！！！ 每次黎到喺心入面都會嘩嘩聲好感恩可以有機會入場，可以喺一個咁神聖既地方睇波！對面今日創出自 2023 年以來入場人數新低，只有大約 39000 人入場。 呢個數字喺乙組黎講其實已經好多，但放喺一個可容納超過七萬人既球場黎講就覺得好少。

其中一個因素當然同我地有關，今日場波喺星期五晚上演，作客人數只有大約三百人；拉低哂全場入場人數。但對我地黎講，以星期五比賽黎講已經算唔錯。。。我地今日唔會搖旗，唔會阻住普通球迷睇波既視線，希望可以將啲球迷全部集中喺看台上層令視覺會好睇啲！ 雖然都係有人有啲不滿，但最終都算成功～～

堂堂一隊首都球隊又再對鄉下隊，而鄉下隊又再喺開波早段入波領先！！！！ 我地借對面喺自己底線既失誤偷到個波，由 Ebnoutalib 喺底線近柱窄位射入！！ 哈哈！ Ebnoutalib 上季由地區聯賽加盟，今日係佢第一次喺德乙正選上陣就建功！！開季至今佢地仲未贏過一場波，今日仲要開波不久就迫佢地繼續接受現實。。。 其實真係唔知係我地踢得好定對方踢得差，因為成場波哈化柏林真係完全零威脅？！

下半場 Ebnoutalib 射入第二球拉開紀錄！ 好多人睇死我地走咗半隊波，連領隊都無埋，今季會係降班熱門，但暫時睇黎我地仲保持到德乙既水準，仲有唔少流暢既組織～ 希望班前鋒可以快啲成材！！！去到尾段完全 feel 到對面無論場上定看台上都想快啲完場。終於等到球證吹完場雞時，主場球迷勁嬲咁向自己班球員報以噓聲；我地就同班球員一齊慶祝～～ 然後趁對面既球迷仲忙住喺球內鬧球員時快啲閃人。

暫時五戰柏林四勝！ 唯一輸波係第一次喺冬天會面時慘敗過一次～ 而家佢地應該好憎我地成日都落佢地面？！ 返到市中心時已經差唔多十點，難得黎到柏林呢個不夜城一定要出去食宵夜，而且係一定要食柏林限定既 Gemüse kebap。

黎到呢刻寫後記時啱啱完左足總盃第二圈既抽籤，我地將會喺十月尾再次作客哈化柏林。 嗚，我既願望係唔洗再南下，但都唔想又送我地上大西北；今次仲要週中出戰，會唔會得返一百人去作客再次成為全國笑話？？