22.08.2025
德國足球乙組聯賽第3週
SV Elversberg - 1. FC Kaiserslautern
Waldstadion an der Kaiserlinde
賽果：2:1 (1:0)
入場人數：9307 （1600 名作客球迷）
門票：季票

今個星期因為同事放假所以超級忙，星期日去完 Ulm 眨下眼又到星期五既比賽日，雖然準時三點出到門口，但都仲要喺路上執埋公司啲手尾，好期待快啲去到球場可以有放空九十分鐘！

場波六點半開波，因為周圍都塞車最後五點半先去到球瑒，再加排隊排咗大約三個字，入到場得返大半個鐘就開波。今日第三次喺主場迎戰地區大佬凱沙羅頓，Block C 球迷看台當然就無人著紅衫，但去到主看台就完全一家親咁紅黑白相容。黎到作客既唔只係紅魔鬼，仲有暑假捨我地而去加盟對方既 Semih Sahin，有啲人喺佢出場時噓佢，但更多人覺得佢幫我地賺咗過百萬轉會費仲好，我地隊波條中場暫時睇落都仲係唔錯，同上季相比最明顯既落差就係前線真係爭一個把握力高既球員！

又一場鄰市大戰 （對方話我地唔夠呢叫呢場波做打比戰），我地一如以往最唔怕就係對住呢啲大球場，有壓力既係對方怕又再次作客輸波。 作客球迷企滿成個看台，仲有來自史特加同法國 Metz 既兄弟黎助陣，間唔中有幾下咆哮係幾勁，好在今日主場球迷額外出力算係保得住自己既面子。

上半場我地有多次有威脅既埋門，真係就係差最後一腳，呢一刻真係有啲掛住走咗既 Asllani 甚至係 Neubauer. 完全想像到如果係佢左線無啦啦自己爆到入禁區的話佢一定可以送到個波入網… 不過！ 人係要向前望既，今日同對紐倫堡場波相比已經見到大家多咗默契。 過去幾季班球員都係去到季中先成材，我地要有啲耐心～～ 去到完半場前對方突然送大禮，龍門傳波時被我地搵到機會突擊偷到個波，最後 Schnellbacher 成功破網！！！

今場大部份時間都係狂鬧球證，每次 55 波佢都係比對方！仲有對面勁中意跌低碌地，你地黎踢波定表演插水？開波無耐我地射入 2:0 但佢吹返轉頭話我地推人在先，後來睇返重播，就連其他球迷都話所謂推人只係爭波爭身位，絕對係合法碰撞！！！痴線，上場波作客波琴時好多人都話係黑哨，今日又黎黑哨！！！？ 80 分鐘對面仲多得 VAR 而獲得今季第二個十二碼射入今季第二球場，我地都忍唔住要開聲唱無球證既話你地咩機會都無！

唉，和波都收課既，只係輸比球證覺得好唔抵。 補時六分鐘過咗一半我地有一個角球機會，嘩！！！我地又再次借角球機會入到波絕殺對方！！！！ 隊波發生咩事？？？ 對面有黑哨我地都贏到波，呢啲仲唔係冠軍相？ xD

凱活羅頓球員好簡單咁去作客看台拍幾下手就走人。 班球迷又開始發癲話個領隊唔夠班，年年都係咁 loop 話上一個領隊好過而家呢個。。。 我地就開開心心同班球員一齊慶祝，唱出最應景既 In einem kleinen Dorf… 唔好睇小我地蚊型鄉下隊～～