17.08.2025
德國足總盃第一圈
SSV Ulm - SV Elversberg
Donaustadion
賽果：0:1 （0:0）
入場人數： 9531 （約 400 名作客球迷）
門票：16,50€

上咗德乙之後我地就自動獲得新一季足總盃首圈既參戰資格，仲要成為種子隊喺首圈一定要作客低組別聯賽球隊。 喺暑假既抽籤我地係最後一隊被抽中，要作客啱啱喺德乙降班既 Ulm…

雖然有好多隊波我地唔希望抽中，但 Ulm 真係頭三位唔想抽中既球隊囉。 第一遠，第二個球場勁落後（sor 上咗職業聯賽之後嫌尖咗），最重要係對住佢地輸多過贏！點解佢地降咗班都仲要死纏唔放！？

五月尾去海登咸作客又係要行呢條路， 喺公路上 Ulm 就係下一個出口。 傷口都未完全埋口又要走上呢條令人傷心既道路（嗰晚仲要比石仔撞裂咗塊擋風玻璃）。 多年來我地只係去過作客兩次，兩次都係直接去球場睇完波就走。 今日場波被安排喺星期日黃昏開波，我地決定花少少時間睇下呢個城市。 話哂都係愛因斯坦既出生地，同埋有一座全世界最高既教堂！

今個週末係某幾個州份學校暑假最後一日，好多車由南向北咁趕返屋企，路上見到另一邊全部都係車龍。 要南下既我地相對上輕鬆少少，只係去到其中一間公路麥當勞借廁所時，入面全部都係一家大細！好在我地只係諗住去廁所唔係諗住食野，我估等野食最少要等半個鐘。

最後我地一點半到達 Ulm 市中心，泊低架車喺 Fischerviertel 就先搵餐廳醫肚！一開始想食 pizza，但經過一間位於川邊既德國餐廳見到佢地既餐牌吸引好多，pizza 去邊都有得食，但南部茶淨係喺度先食到！！ 啱啱呢個星期有熱浪熱到個人懵懵地，今日終於涼返啲可以坐喺出面食飯，之後仲可以食住雪糕去到 Donau 河旁散步！

波上買張波飛寫住開波時間係 18:30，但其實真正既開波時間係 18:00，好在今日無人比張飛呃咗搞到遲到。我地亦如常開波前個半鐘就去到門口，等埋其他人到場就一齊行去球場。 今日個個都好平和成功入場，隔咗兩星期終於可以再次一齊為球隊打氣。順帶講下上星期既後續，同班牛之間無咩特別跟進，但球隊綜合咗各方既資訊，當中包括波琴嗰邊都指責係班牛唔合理執法；所以球隊喺社交媒體出咗個 po 明顯地暗示佢地會企喺我地呢一邊！

Ulm 上季踢德乙時場場主場爆滿，視覺同聲勢都可以媲美頂級球隊；跌返落丙組後，今日又只係遇上我地呢隊細球隊，即刻有兩個大區吉咗出黎，連主看台都坐唔滿。球迷有時真係好現實既，我估我地如果跌返落德丙既話應該會少最少一半球迷。 不過佢地既 D-Block 仍然企滿人，呢班先係球隊最需要既球迷！

我地今日有件盃賽特別版波衫，唔講唔知原來德足聯（即德甲乙）有條關於波衫既條例係唔容許波衫只喺正面印有間條而背面係淨色，即係如果一隊波想著間條波衫就要前後都有間條，唯一容許係印各同字個位可以淨色。 而今日係德國足總既比賽就唔受呢條條例限制，所以我地先有件前紅黑間條後淨紅色既爾盃賽波衫出現（就咁睇以為係法蘭克福波衫）。

真係好想知點解 Ulm 咁中意㨂先向自己球迷方向進攻，今日佢地又係先㨂向另一邊進攻，上半場我地就向作客區攻，全場都係由我地控制，只係一直都無人射到個波入網。 好在對方都仲係廢廢地，但呢啲先係最怕佢地靠唯一一個負碌機會入一球然後死守。下半場果然先由對方一波，好在係一個越位詐糊救咗我地一命（上季黎作客好似又係有球咁既詐糊）。 去到七十幾分鐘，終於比我地射入全場唯一一球！！！！最後嗰十幾分鐘都唔算難捱，對方喺進攻方面真係廢廢地，全場無一次射中目標？！

我地既新領隊 Vincent Wagner 本來留咗一頭到膊到既長髮，之前訪問話輸波先會剪，今個星期五佢出現賽前訪問時個個都嚇咗一跳，剪完頭髮成個樣都唔同咗，笑死。 賽後慶祝時我地都要笑下佢既新髮型，希望佢黎緊可以做長髮公主。。。

下一圈抽籤會喺月尾舉行，我淨係希望唔好抽中南部球隊，唔想再揸呢條路！！！