09.08.2025
荷蘭足球甲組聯賽第1週
PSV Eindhoven 對 Sparta Rotterdam
Philips Stadion
賽果：6:1 (3:0)
入場人數： 34.300 （約 400 名作客球迷）
門票： 50€

今個週末我地星期日作客波琴，而荷蘭新一季就今個星期開始。我地睇中左應屆聯賽冠軍燕豪芬，當地離德國邊境少於一個鐘程，離波琴亦只需個半鐘！買到波飛後就好快訂埋酒店。

由法蘭克福出發到燕豪芬市只係三個幾鐘車程，星期六可以訓夠先出發，十點出門口連埋中途休息最後三點前到達位於中央火車站前既 Social Hub 酒店。 呢間酒店本來主要做學生單人住宅，而家就有啲房撥咗出黎做酒店房或者比人長租，大樓入面有唔少公共設施，個 concept 聽落係去，但入到去住就覺得入面好混雜。啲 shared place 同餐廳我地都無去到，淨係講間房入面啲傢私都好 cheap，沖完涼個浴室又會全濕，又唔算特別乾淨。 除左位置好同啲員工勁友善之外完全無其他可讚既地方！

放低啲野之後就行去市中心行街，我地張波飛係專賣比外國人既捆綁式銷售套票，波飛加廿歐現金卷咁賣，總共 70歐，即係我地喺 fanshop 要買到 40€ 野先唔會蝕！ 果然係一間由大公司經營既球隊，好識做生意！買條頸巾先十幾歐，搵到條減價泳褲同買咗一隻印有燕豪芬舊燈炮 logo 既杯，最後只需比多3€ 。之後就喺廣場搵間餐廳坐低飲兩杯啤酒，再去一間叫新世界既茶樓叫咗三碟餸做晚飯～ 食飽又返去酒店放低啲手信又行去球場。

下午喺市內已經見到好多人著住波衫，周圍都好多足球氣息！ 我地出發時應該有班火車啱啱到站，好多著住紅白波衫既人由火車出黎一齊向球場方向行去。唔洗十分鐘就已經到達菲利浦球場既門前！

荷蘭出名既除咗草之外仲有 techno，場外有個大台 DJ 喺度玩 techno ，啲球迷全部都勁受落！ 到我地爬咗五層樓梯去到山頂層時，迎接我地既同樣係 techno. 每首聽過下既歌都會有 techno 版，就連 Allez allez allez 都有！ 好容易就推高場波既氣氛～

PSV 燕豪芬既全寫係菲利浦足球會燕豪芬，就係家傳戶曉以電燈炮起家既菲利浦公司！有人會叫佢地做荷蘭版既利華古遜，由一間大公司既員工成立既足球隊！有財團喺背後支持所以足隊既基建都好先進，同利華古遜唔一樣既係，雖然佢地唔係荷蘭最成功既球隊，但都唔係 2024 年先第一次喺聯賽稱王！ 上季佢地啱啱第 26 次聯賽冠軍～所以班核心球迷準備咗一個塊好靚既大海報，回憶下近年成為冠軍既時刻！上層就係一個好醜既 choreo，無睇錯就應該係兩粒星同中間係 26。 （喺荷蘭每贏得十次聯賽冠軍先可以喺會章上加一粒星，即係燕豪芬要贏多四次先可以有第三粒星）

荷蘭既球迷文化唔係特別出名，今日我地都唔抱啲咩期望。 主隊既球迷組織叫 Lighttown Madness， logo 係一個燈泡！ 佢地集中喺龍門後一半人著白，另一半人著紅，睇得出佢地係全場有出力打氣既，但聲勢就真係好一般！ 間唔中帶得起啲普通球迷先叫有啲氣氛，其餘時間就好似喺酒樓咁。場内又唔係靜到好似圖書館咁，但啲人好似好多野講，個背景好多嘈雜聲！

客隊係來鹿特丹第二大既球隊，球迷人數絕對唔可以同飛燕諾相比，但佢地都仍然有核心球迷到場～ 喺上層角頭頭掛好啲旗就間唔中隱約聽到佢地既聲音。 就算之後佢地被大炒都仍然無停過！

主隊一開始就喺左路窄位射入靚波，由燕豪芬同拜仁名宿 Mark van Bommel 個仔 Ruben van Bommel 射入！荷蘭足球青訓一直都做得唔錯，去前阿積士就好出名輸出自家青訓球員，而燕豪芬都出產過唔少球星。佢地入波既音樂當然又係 techno 然後中間一齊大叫燕！豪！芬！ 哈哈；燕豪芬作為應屆冠軍喺呢場波完全無留手，喺上半場就已經領先三球，最後總共射入六球，仲要球球都係靚波，靚到要嘩出黎！！！

客隊球迷就算知道改變唔到輸波既事實，佢地都無停過打氣。下半場追得 4:1 時仲可以見到佢地超開心咁慶祝！！ 而主隊既球員由第一分鐘攻到最後一分鐘，場波好快上快落好好睇。 有好波同咁多入球睇，張波飛係貴但都總共回到本。

去到補時階段喺主隊球迷看台前有意外發生，場內既救傷隊要衝過去幫一位球迷急救；場波都停咗一陣。 估唔到場波會喺一個反高潮既時刻完場，我地都無留太耐慢慢行返去酒店，準備卜迎接明天返德國去睇作客波！