02.08.2025
德國足球乙組聯賽 第 1 週
SV Elversberg - 1. FC Nürnberg
Waldstadion an der Kaiserlinde
賽果：1:0 (0:0)
入場人數：9307（1500 名作客球迷）
門票：季票
五月升班幻想破滅後就即刻飛咗去日本旅行，嗰陣完全唔想睇同球隊相關既新聞，集中去旅行吃喝玩樂。但係球隊發生完全係意料之外既突變，好在有日本分下心…
第一件事係喺次回合對海登咸賽前突然有傳聞話領隊 Horst Steffen 同德甲既不萊梅有聯絡，盛傳佢來季會換會去德甲執教，而 Steffen 既回應全部都係不予置評。我地當時亦都無特別理會呢啲傳聞，亦都覺得 Steffen 當時要集中場波所以唔特別回應係正常，體育總監 Ole Book 都指佢無同任何球隊接觸同傾領隊既事。 升班失敗後呢件事就愈傳愈勁，就喺我地到埗日本嗰晚得知 Steffen 正式離隊同加盟。 當時球迷圈大亂，大家最擔心既係一個合作咗五年幾既領隊，我地有既成就真係可以話由佢帶領出黎，佢既離去會唔會令到我地打回完形？會唔會失去佢我地就會得返地區聯賽實力？黎緊係咪要準備降班？
睇波多年我地亦知球員來來去去十分正常，但領隊離隊好似真係失去一個核心靈魂咁。我地就好在喺日本唔太得閒理太多，反正一切都已成事實，我地應該要對班球員本身既實力有信心，同來緊會加盟既球員同領隊同樣要有信心。所有離隊既球員我地都衷心祝福佢地有更好既前途，我地都為佢地搵到更好既球隊而覺得開心；喺領隊正式離隊後，大家先慌張咗一兩日，接受咗現實就覺得，其實佢要離隊想去教德甲我地其實都會祝福佢，但點解佢要走得咁突然？ 由多方面既消息睇得出，體育總監同班球員係完全唔知情。 有傳最後我地無論升班與否佢都已經決定咗會走，咁點解佢唔一早講出黎然後同大家正式道別？ 突然間，Horst Steffen 變咗大家心入面既一條刺，我地係好感激佢為球隊所做既一切，但係我地喺佢心入面到底係咩？只係一塊踏腳石？ 佢加盟之前連續帶領過兩隊波降班，係得到 Ole Book 既信任佢先有機會表現自己既風格，點解會連 Ole Book 都唔通知一聲或者傾下？？？ 而家佢就好似佛地魔咁成為一個不能被提起既名字，好處就係間接迫使大家去迎接新既將來。
我地呢隊鄉下隊會搵到咩人去接任新領隊呢？ 有經驗既領隊唔會甘心屈就係呢度，淨係講人工都未必啱佢地心水。 最後我地搵咗執教賀芬咸二隊既 Vincent Wagner 黎執教。 佢啱啱帶領隊波由地區聯賽升班丙組，個樣睇落老老實實四十歲都未夠。 聽講佢好親民，喺熱身賽賽後逐一同到場睇波既球迷握手同自我介紹；呢啲咁貼地既領隊睇黎真係幾啱住鄉下～～
除咗佛地魔同埋本來已經既球員既離去，暑假間期我地仲失去咗兩位同我地由地區聯賽打上黎既核心球員，Sahin 傳會到凱莎羅頓；上年先續完約既隊長 Fellhauer 加盟德甲既奧格斯堡。 其實真係同失去 Neubauer 一樣好唔捨得，但理智話我地知，我地能夠將班球員由地區聯賽質素去到被傳統球隊賞識，甚至可以加盟德甲球隊；我地係要為自己自豪，亦都要為佢地開心。 上季既愛將 Asllani 被盛傳會去不萊梅，最後佢㨂咗同賀芬威續約，大大力打咗佛地魔一巴～ 呵呵
賽前熱身賽我地全部都贏唔到，不過我地熱身賽年年都係咁；輸哂好過贏哂，唔好比太大期望。好多人好認真對待熱身賽，輸咗呢幾場就講到我地黎緊要降班架。 唔通贏哂又就可以升班咩。。。講完球員離隊，就講下球員加盟。 我就一路都唔太注意加盟既球員，無論個個講到佢地幾勁幾勁，最後都係要落場同夾到隊波先可以下定論。 總之就簽咗好多個後生仔啦～ 當中有一個係挪威泰國混血球員，佢係為泰國踢國家隊，SVE 而家每次 post d 同佢有關既新聞都會有勁多泰文留言 ._. 我地係咪要向世界出發？
黎到八月新一季終於來臨，我地既週本終於可以做返啲有意義既事。今季有基爾同波琴降班落黎，下面就有 Bielefeld 同 Dresden 升上黎，除咗北部既基爾其他都係吸引既對手～ 頭場我地喺主場迎戰高路斯帶領既紐倫堡。 我地喺五月先喺佢地主場慶祝 125 週年正日打殘佢地，今日我地又再次相見～
呢個星期有朋友由香港黎，我就帶佢去睇佢人生第一場足球比賽。 早一晚喺電視睇開 league 戰史浩克對哈化柏林，prep 下佢第二日要 expect d 咩。 我發現好多野都係唔可以口講就解釋到，去到球場先可以慢慢逐樣同佢講下球隊呢幾年既發展，場內球迷文化，地區相關既歷史等等，但最重要既係希望佢可以好好享受今日場內發生既一切。 上半場我就掉低佢自己一個睇波，我要去主看台嗰邊影相～
客隊今日帶咗千五人到場，個個著住紅衫入場，仲有幾個來自史浩克既藍衫同藍旗。 賽前熱身嗰陣望住兩邊看台即刻覺得原來兩個月既暑假過得好快，上季好似啱啱先完咁。 一如以往喺賽前宣讀比賽陣容，當中有好多新球員大家都唔係好知個名，去到最後一個球員由凱莎羅頓加盟既 Jan Gyamerah，無人知佢叫咩名所以讀到佢個名時靜咗落黎，而我就勁清楚咁聽到作客區傳出 Arschloch~~ 既叫聲，大家都笑咗出黎 sosad
開波心亦都唔覺得賽上有咩變化， 一樣都係十一條友想幫 SVE 入場。 睇落就覺得係有少少唔同…. 有幾下個波去到前面覺得會有 Asllani 背住龍門接應然後轉身起腳。 呢啲 moment 今日未必會再見到，可能班球員要啲時間去適應同搵到自己既風格，但暫時黎睇前線係爭咁少少，仲未搵到走位既默契。 下半場我接返朋友一齊落看台底，我同佢呢個位睇波角度唔靚，當黎感受下氣氛一齊玩下啦～ 佢雖然唔識啲歌但都有幫手拍下手，幫我地既氣氛 +1!!!
過去兩季既第一場波我地都係和波收場，今日我地都可以接受到和波完場。 去到補時階段我地有個角球，我地就平常心對待，因為大家知自己最廢就係角球，自己既角球係 100％ 浪費率，而對方角球就係對方既入球機會。 點知，點知！點知！！！！！ 我地開出角球後，比 Rohr 接應頭鎚直頂入網。 嘩！！！！！！ 大家慶祝之餘仲係咁大叫 ECKBALL TOR!!!! 角球入波！！！！！！？？！哈哈哈哈，大家都唔敢相信我地過去一季無人球係角球頂入，今季好似破咗魔咒咁第一球波就係角球頂入。 但呢，未完全就唔好慶祝字。。。。。。 半分鐘後，球證喺對面吹十二碼。 仆街，破到角球魔咒但破唔到開季和波魔咒？ 最後 VAR 唔知點樣吹返唔係十二碼， 我地成功守住三分完場。 高路斯三戰 SVE 三戰輸哂～～ 哈哈。
場波整體黎我地仲有好多好多要改善既空間，希望新領隊可以睇到呢啲問題去執～～ 賽後我地同班球員一齊慶祝完之後都特登向 Ole Book 致敬。 領隊係好重要，但球隊既發展方向同㨂人都係來自 Ole， 多謝佢繼續為球隊效力～～
