15.06.2025
日本 J1 職業足球聯賽 第 20 週
神戶勝利船 對 名古屋鯨魚
御崎公園球技場
賽果： 2:1 (2:0)
入場人數： 22.175 （2.000 名作客球迷）
門票： 4110¥
今次旅行最先諗住會再去大阪，所以㨂咗最後一日搭最早機由伊丹去羽田，然後轉機返德國，計埋時差可以一日內完成； 最後我地喺最後一日全日㨂咗去神戶睇波，令到行程變到有少少難搞，早知由神戶走唔洗突登要去一去大阪就係為咗回程班機。 星期日我地㨂咗朝早離開京都，先搭巴士去伊丹機場入面既酒店放低行李先再搭火車去神戶。
好順利用JR Pass 咁去到大約中午就去到神戶三宮！ 尋日喺奈良暴雨下睇波，得返廿度咗右個身又半濕仲好驚會凍病。 點知梅雨過今日直升上三十度，去到神戶一出站就好似入咗蒸爐咁，係咁同自己講今日係最後一日要好好享受佢。。。
神戶街上好熱鬧，商店行好好行，早知預多幾日黎神戶行街！！ 得一日就必海邊睇阪神大地震紀念公園，遇到有戶外 concert，如果唔係咁熱我地可能會留低聽多一陣歌。 之後去咗 Mosaic 商場搵以前同屋企人黎食過既和牛燒烤！ 喺德國啲人淨係識 Wagyu 同 Kobe beef，黎到神戶就係食返神戶牛威下～ 食飽之後就把握最後機會買野，然後就搭地鐵向球場出發。
搭車去到和田岬就跟啲球迷一齊行去球場，呢個站有 JR 同地鐵可以到，但如果我地無理解錯既話，個 JR 站喺週末唔係全日行駛，因為呢個站係比啲人去三菱工廠返工，所以我地都係要轉搭地鐵入去。
出站後見到好多人都拎住把扇撥下撥下勁羨慕，沿路又唔見有人派扇好想知可以喺邊度拎！！！頭先喺市中心題 fanshop 唔見有得買或者抽獎，一心期待沿路會有人派。。。球場外有數唔哂既小食亭，真係隨時多選擇過去啲地下美食街，但出面真係又曬又熱，我地接受唔到天氣咁樣突變，早少少入場搵個陰涼地方可能會好少少。
原來把扇入場會派！！！ 我仲見到有人派 cap 㡌，即刻走過去問佢拎一頂，點知原來係因為黎緊係兒童節所以只係派比小朋友。 嗚！ 但有扇已經好開心～ 入場後先去廁所洗一洗面涼快一下先，去到上層真係有個位扯風可以吹一吹。 我地個看台係西斜。。好好彩我地個位咁啱喺曬唔到既位置，唔算太難頂。 望去其他看台見到個個都瘋狂撥扇。。。
神戶既主場為咗 2002 年世界盃大翻新，由一個業餘場地變成一個可以上演世界盃分組賽既場地，看台上蓋仲可以因應需要可開可關，世界盃球場既設備係唔同啲！後來因為普通聯賽唔會坐到四萬人就拆咗啲臨時看台，現時可以容納三萬人左右，就算坐唔滿都唔會吉咗出黎。 神戶前年第一次成為 J1 冠軍；上季成功衛冕仲拎埋天皇盃做雙冠王！
埋位後仲有大約半個鐘先開波，兩邊球下已經出緊力唱歌打氣，睇咗幾場得幾千人既比賽之後黎到頂級聯賽個感覺更加震撼。 左邊既神戶球迷突然全部聚埋一齊喺中間唱跳咗接埋十五分鐘就各自埋返位。開波前唱完會歌同宣讀完陣容後就準時開波！
上年我地睇過名古屋作客大阪櫻花，今次唔洗太著重班紅色既看台，但佢地呢個有近二千人既紅海黎到都好吸睛！ 神戶同其他日本球隊都係有同而家完全無關既前身。神戶勝利船前身係川崎製鐵足球隊，位旑卜岡山縣水島。到1995年，球隊先搬到神戶市，並改名做「川崎製鐵神戶」。
當時神戶市想擁有自己嘅 JLeague球隊，去到 1997年直接加入 J1，去到 2003年由樂天接手經營，後來仲識搵過氣球星去造下勢吸引球迷。 最出名既有普度斯基同恩尼斯達，有錢有明星有盃捧～ 對於著重球隊歷史既德國球迷通常都會對呢啲直許經營模式十分反感；但日本呢幾年又好似好認真咁發展足球，更重要既係佢地啲球迷真係好出力，淨係呢九十分鐘見到佢地全程唱跳就可以令人忘記「無歷史」既背景 。
場波既娛樂性比低組別好少少，臨完上半場前主隊連入兩粒領先；下半場客隊中段追返一球。日職同歐洲既球證有交流計劃，每年暑假都會有幾個歐洲球證黎吹幾場，今日係由來自英超既 Robert Jones，呢個名我都係第一次聽，但都睇得出英超球證係鬆手好多～
完場後我想搭地鐵返去三宮站轉 JR 去大阪，突然好想食拉麵，仲要係梅田某條街上年去過去既重口味拉麵店！ 喺大阪站落車後完全唔識行，上到路面又過唔到馬路，上上落落行咗差唔多廿分鐘終於成功到達目的地！！ 嗚，好想留喺度呀！！
喺梅田食埋最後一餐正餐後就搭單軌去伊丹機場，過咗一個好短既夜晚後第二朝準時六點鐘落到去排隊 check in 寄艙。我地班機係 07:05 由伊丹出發，到 06:30 我地前面仲有成十個人，前面啲人唔知點解個個都有問題搞勁耐。 我攝出去搵職員求助之後佢問條隊仲有無人都係搭呢班機，然後捉哂我地出黎去排另一條隊。放低啲行李後秒速過安檢，最後大約 06:45 去到閘口，全機滿座去東京！
落機後有大約兩個鐘轉機，出境轉國際線唔洗拎行李，可以直掛到德國。 只係由國內線落機行去國際線轉機係要行到機場最最最尾，喺一條小路出返去出境大堂再入閘同過安檢。 今年有多啲時間可以最後衝刺買手信，買到朱古力 Royce 同白之戀人！！！ 朝早八點買咗兩杯白之戀人雪糕去告別日本。 唔知幾時可以再見。。。
