14.06.2025
日本 J3 職業足球聯賽 第 16 週
奈良 對 鳥取飛翔
奈良市鴻ノ池陸上競技場
賽果：1:0 (0:0)
入場人數：1.048 (150 名作客球迷)
門票：2.110¥
離開四國之後我地向關西出發，用關西廣域 pass 可以由高松去岡山轉新幹線到大阪，再轉 JR 到京都。 上年花咗最多時間喺大阪，今年想避開世博人多所以改去京都～
今次我地住喺梅小路京都西站隔離既酒店，係唔近市中心但推住四個行李就好方便，個站有電梯同埋出站後行平地兩分鐘就到酒店；同京都站只係一個站既距離，每十五分鐘有一班車～ 有 JR Pass 就可以任搭。
到埗嗰日 check in 完就行去東寺，當時已經差唔多五點無得入場。 喺出面影咗幾張相就向四条出發感受下大城市既氣氛。 今晚喺京都其實有場天皇盃，但我地㨂咗喺福岡週中睇盃賽就放棄今晚呢場唔洗趕，花多少少時間做遊客。 當時睇返賽事資料得知場波得幾千人入場，同聯賽平時過萬人勁大分別，去咗睇場波既話我地一定會勁失望！
星期四我地全日喺京都做遊客，先去咗二条城，再去京都御所。 去到先知原來京都御所係可以免運入場！ 每日指定時間仲有導遊帶團，唔跟團都要跟指定路線行，喺入面都花咗差唔多一個鐘。 喺嗰度學識咗原來日本既傳統美學係要唔對稱，所以喺門口作會喺兩邊種唔同既樹，呢啲先叫自然！
由御所我地繼續行到去鴨川三角州，呢個位唔多人，可以好安靜咁望住水流二合為一好治癒。由出町柳搭車去祇園，上次因為太熱行咗幾步就調頭走咗，今次都有啲後悔再黎，因為真係超多（無禮貌既）遊客。 之前睇片見過啲西人追住啲藝妓影相，今日算係比我地親眼見識到。 喺祇園見到唔少藝妓都急急腳咁行同入屋，中間見到有兩個日本阿叔拎住堆相，應該係 fans 想送啲相比某藝妓； 個藝妓見到就停低同佢地交流下同多謝佢地啲相。呢個時候有一堆講西文既師奶同阿叔衝埋去係咁影相都算，有個阿嬸仲篤佢膊頭話要自拍！！？ 個藝妓微笑拒絕後就日即刻走入屋，可憐兩個阿叔 fans 咁就比人破壞咗一個溝通機會。
我地一齊向南行落去重回 Kyoto Beer Lab 朝聖，行咗一整日最後返到京都站買啲甜品返酒店食，早啲休息準備第二日去天橋立遠行！由京都站搭天橋立號兩個鐘左右就直達目的地，落車後先去搵餐廳食飯再去智恩寺，然後就搭吊車上山去 Viewland！山上面又係一團團既台灣人，個個排隊企上石凳由跨下望出去睇飛龍在天。 喺上面曬咗一陣太陽後就落山行去沙灘踩下水～
回程時我地㨂咗搭丹後鐵路經所謂千與千尋既過河橋去西舞鶴行個圈先再返京都。 點知原來我睇錯咗係東舞鶴先有野睇。。。 喺西舞鶴我地算係漫無目的咁行去咗一個好似大澳咁既地方，沿路啲小朋友會用英文打招呼 say hi 好得意，唔知係咪學校教佢地要對外國人有善！？ 返到京都好想食拉麵，喺京都站正正就有條拉麵街可滿足願望！
星期六朝早迎來大雨，帶住兩把遮出門去到奈良。 到站時竟然停咗雨，我地諗住把握時間先衝去餵鹿，餵咗大約一個鐘後我地都開始肚餓就回程想去商店街食吉列豬扒。喺最後路段突然開始倒水！！ 好在我地已經餵咗鹿，而家可以安心食飯。問題係食完飯都仲係落緊大會，喺路上預到唔知咩黨既人喺度造勢同派米，勁多老人家企喺雨下聽佢 9up 等收米。 我地就只希望警察唔好封路令到巴士黎唔到。
今日場波又係 J3，兩隊都唔係大隊，但佢地依然有自己忠實球迷，就算落住大雨都繼續喺場邊淋住雨為球隊打氣！ 成個球場得一小區域係有瓦遮頭，仲要有膠帶封起咗唔比普通人入。 我地一開始㨂咗企喺最頂一人擔一把遮（！） 奈良咪識做囉，劃咗上半部份出黎許容喺唔擋住其他人既視線下開遮！ 企咗一陣我決定拎件便利雨衣出黎舖喺凳上面坐（啲座位好超乾淨，只係積哂水），然後兩個人迫埋一齊，一把遮遮腳，一把遮遮頭～ 勉強可以輕鬆少少睇波，但都係半身濕哂。
其實比較吸引既係場外風景同啲雲，場波個勢似係會悶和完場集中唔到，係去到下半場有個角球機會奈良先入到波，唔洗零入球收場。 兩邊球迷因為人少但多架餐，啲鼓聲有時仲響過人聲，即使佢地唱足全場都肯係覺得爭啲野。
完場後我地衝去搭巴士返去奈良 JR 車站返京都，好平靜咁喺京都過最後一晚。黎咗兩個幾星期都只係睇低組別賽事，開始覺得悶，令我地更加期待今次旅程最後一場波。
