日本：高知聯 對 奈良

08.06.2025
日本 J3 職業足球聯賽 第 15 週
高知聯 對 奈良
高知縣立春野綜合運動公園陸上競技場
賽果：3:2 (1:1)
入場人數：2315 (90 名作客球迷）
門票：2.610¥

喺四國既第三日我地由高松揸車出發去高知，跟住架車入面既導航南下，離開公路發現高速公路收費比導航計既更加平。上網一查先知原來週末有七折，多得呢七折令到我地買唔到 SEP 都唔會蝕太多！！

第一步我地先去五台山展望台睇下景先，好在就算天陰陰都可以喺山上清楚飽覽到成個高知市！喺上面逗留咗大約十五分鐘就繼續行程去睇波。呢個球場如果無車真係唔知可以點樣黎，個位置係喺一座山前面，附近全部都係農田。呢一區好似一個體育園咁，有幾個唔同用途既場地，而我地既目的地就係一個可以容納超過二萬人既運動場。

到達後我地先喺場外先去買條汗巾做紀念品，途中經過一個菜農攤位派高知青瓜比球迷食；仲有一個攤位好多人排隊，仲有電視台影住啲人同做訪問，就咁睇好似有個抽獎活動所以好多人想黎參與咁。回頭諗住去買野食時拎兩杯青瓜再次經過個菜農，佢地又想塞多一杯比我；第一次遇到可以拎完又拎既免費野食！！！路上又有主辦單位送明治安田既鎖匙扣，買完小食同野飲入場時，門口又派貼紙；好滿載而歸～

入場後求奇搵個位放低啲野開餐先，食飽就出去買埋甜品再入場食。真係好想知點解日本球場啲坐位可以買靚咁乾淨！！？呢個運動場係全露天，正常啲膠座位係會被太陽曬到甩位同埋會有污漬，但呢度啲座位係張張一樣靚色同埋一塵不染？用手指直指抹落去係乾淨既？！喺歐洲通常可以企我都會企，啲座位好多時抹完都唔會想坐落去，但呢度係可以安心就咁坐落去！！！德國可唔可以學下人地點樣保養球場？！

天氣預報今日係會落雨，所以我地都兩手準備帶定把遮入場；臨近開波時真係開始落起毛毛雨，我地就打開把遮。。。唔夠兩分鐘就有保安走埋黎話唔可以開遮。 ok?! 我知日本人好怕麻煩到人，如果開遮擋到人視線就唔好；但今日得二千人入場，我地前後左右都無人，打開拍透明遮都唔得？！後來上網睇下發現原來日職有規定球迷可以帶遮入場，但喺場內係唔可以開遮。即係喺露天球場睇波其實係要自備雨衣，唔係雨傘。喺場內之後都有其他人唔知規矩開遮，啲保安真係九秒九衝去叫佢地收遮。

又未必怪佢地完全唔識變通，高知聯今季係史上第一次踢職業聯賽，所以可能唔想做新豬肉就即刻犯錯搞到比足總罰。佢地叫自己做 United 因為佢地係由兩隊來自高知既球隊合併而成，希望可以統一達成能夠躋身入職業聯賽既目標，成日高知縣之光；只係上到 J3 之後佢地都未試過喺主場贏波…

高知聯既球迷組織自稱 Ultras Bonito，即係柴魚！同讚岐一樣以當地食物為榮！！！！喺上層座位看台下，兩邊龍門後都有一大遍自由座草地，高知嗰邊有三塊大旗上都有一大條柴魚做裝飾，好得意呀！！主客兩隊波都唔多球迷，但同其他球隊一樣，就算輸人都唔輸旗陣，最基本就係每個球員都有自己既旗，仲有啲參考外國既大旗。當地人亦都中意用舊名，例如高知縣以前名為土佐國，佢地就有一塊 Pride of Tosa 既旗。

客隊奈良帶咗大約九十人到場，淨係啲打氣旗都已經有七十塊… 場波一開始佢地都佔上風，仲兩次領先；諗住高知今季未喺主場贏波應該唔會難贏。下半場估唔到高知最後反超前，終於首次喺主場贏到一場波！！！

另外想講下中場期間有個後生仔喺看台前拎咪講野，然後就繞場一週，啲球迷個個好興奮咁走到看台底向佢鼓掌，佢又好開心咁周圍龜波氣功。後來我地留意到有唔少人喺度 fing 寫住小林心既旗，原來場上喺度跑緊既就係小林心。佢喺大學畢業後加盟高知，踢咗三四年一齊升班；今季暫時入咗已經十一球波，終於被大球隊仙台睇中。就係喺剛剛呢個星期佢正式轉會，今日特登返黎同球迷告別，同埋接受球隊向佢頒發本月 MVP 既獎項。突然間，賽前既一切謎團終於解開！！

原本場內其中一個攤位有好多人排隊係因為佢喺度幫手賣野，入場時喺門口派嗰張貼紙喺度龜波氣功就係佢黎，只係我地諗住都唔會識啲球員所以勁快手就放咗入袋。見到啲球迷個個都好開心咁歡送佢，為佢可以向自己既夢想踏前一步而高興，令我地都諗起自己隊波啲球員黎到季尾都被大球隊簽走咗。一方面當然有啲失落，或者擔心我地既好球員被簽走會削弱球隊；令一方面係真心鄧佢地開心可以去大球隊見識一下，亦都甘心成為佢地既踏腳石。

完場後我地返去市中心想去弘人市場稻草燒柴魚飯，好好食～～～食飽後就上高知城行一個圈再去商店街行去搵麵包超人石像～喺佢再次落大雨前就回程。星期一就向西行去松山，可惜呢兩日都落大雨… 本來都應該係無咩特別既走馬看花一日遊，喺道後溫泉留咗大約一個鐘就諗住去松山城，車程大約五分鐘… 泊低架車之後聽到喵喵聲，一開始仲以為出面附近有貓，點知原來係由車頭傳出黎。

喺大雨下打開車頭蓋，喵喵聲勁應聲咁傳出黎，我地喵咗幾下終於見到引擎底下有隻黑色貓仔望出黎。我即刻去咗附近既警署搵幫手，一切溝通都係靠 google translate，我話佢地知車底有隻貓仔，問佢地可唔可以幫我地救貓。好快就有兩個警員出現話同我去睇睇（後來仲出現第三個警員），佢地都確定見到隻貓之後就話可能要搵人黎唧起架車，呢度就有費用要比，但佢地之後同租車公司既聯絡，決定用車尾既迷仔車積（平時用黎爆軚緊急用），搞咗差唔多一個鐘終於成功迫到隻貓仔出黎！！！第一次隻貓見有五個人圍住架車就決定跳返入車 -_- 好在好快成功再次迫到佢跳出黎，佢就勁快跑咗入後面既地盤。

啲警察就叫我地快啲離開個停車場，驚隻貓會無啦啦返黎，我地連忙係咁道謝後佢地就收隊走人。我地都拿拿聲去比錢諗住走，但當啲警察唧起咗架車時，車底個閘亦都升高咗，到佢地放返架車落後之後就壓實咗道閘…. 總之就比咗錢都走唔到。呢個時候好好彩有人經過問我地洗唔洗幫手，向佢解釋咗一輪後佢就幫我地打電話去搵人黎救我地，我地真係好好彩一路上都淨係遇到好人！！！！廿分鐘後有人黎到就手動降低返個閘，然後抄低車牌同拎我地聯絡資料；我擔心佢以為我地想唔比錢走人整壞咗道閘，又再圖文並茂咁同佢講返成個故仔（最重要係想話佢知係警察整壞唔係我地!!) 佢話巡例都要拎呢啲資料，如果有需要先再會再聯絡我地。最後搞掂哂所有野松山城已經關咗… 我地亦淋雨淋到全身濕哂，改變行程去商店街搵間 cafe 坐低食件蛋糕同飲杯咖啡回一回神，真係 what a day…