07.06.2025
日本 J3 職業足球聯賽 第 15 週
讚岐釜玉海 對 FC 大阪
高松市屋島競技場
賽果： 0:3 (0:0)
入場人數： 2812 （120 名作客球迷）
門票：3610¥
日本第一站九州旅程完結後，我地星期五離開酒店向下一個目的地出發。朝早推住三個行李行去博多站；買咗兩個便當同一個巨型明太子飯糰就去月台等新幹線，搭上山陽新幹線先去岡山站轉車，然後搭 Marine Line 過海去到四國高松。
因為有大件行李，所以搭新幹線時一定要預先訂位㨂車卡內最後一行，呢個位會包埋座位後面既位置可以用黎放行李；理論上如果唔係坐最後一行係唔可以用呢個吉位去放大件行李。 㨂位時見到 Marine Line 都有得訂位就訂埋位先； 到等車時先知原來指定席既車位有上下層，上層係綠色車廂，下層係指定席；其他車廂都係單廂既自由席。
通常搭兩層車廂我地都中意坐上層，今次要坐下層都唔係問題；問題在於拎住大件行李係好難行佢條勁窄既旋轉樓梯；而車廂內只有一小個位置可以放大件行李。 我地好好彩㨂咗最後一行可以夾硬塞喺我地後面，其他遊客都好狼狽咁要搵其他位放行李。 （回程時我地㨂坐自由席仲好，唔洗拎住行李上落同埋位置闊落好多）
本來我對四國無咩認識，亦都唔知佢既英文名叫 Shikoku，然後一直都分唔到高松同松山 Takamatsu vs Matsuyama， 經過今次旅行起碼記得 Matsu 係松， Yama 係山（岡山、和歌山都係 Yama！）。去到高松站先去 Times 拎車； 德國係無國際車牌呢樣野； 拎德國車牌想喺日本揸車就要喺出發前搵認可機構翻譯做日文，可以搵 ADAC 但佢要你寄正本比佢翻譯；我地經 Travel Japan 搵到認可既認上翻譯，花大約 70€ 三個星期後就收到翻譯本；如果無任何資料改動的話，呢份文件就終身有效，唔洗每次去日本都申請一次～
拎車手續完全無問題～ 職員用翻譯機好清晰咁解釋一切，我地有自己本身既保險唔買佢地既保險佢都可以檢查一次確定係無問題。只係黎到先知喺呢間分店係買唔到四國高速公路周遊券，一開始佢唔明我地想買啲咩 Pass； 我上網搵相關資訊比佢睇，佢先話呢間分店搞唔到。 後來先發現原來係要喺指定分店先可以搞到個 pass？ Anyway ，買唔到都無辦法～～
當時仲有大約兩個鐘先有得 check-in，我地先練習下右軚同埋手撥打燈方向相反既分別，慢慢揸車去附近既 Youme 商場行個圈同搵間 cafe 食少少甜品，等到差唔多時間就去三条站附近一間一戶建 Airbnb checkin，然後又返去 Youme 既超市買野返去間屋度煮晚餐。
第二朝先地搭琴電去高松市中心，先去碼頭睇下風景，再去高松城跡玉藻公園散步，然後先再搭琴電去睇波。 讚岐烏冬明時買就買得多，今日終於黎到佢地既發源地，讚岐縣！！！ 只係現時已經改名為香川縣，縣內仲有個城市叫讚岐 （Sanuki），但佢地喺日文係叫 「さぬき市」用黎分別古時讚岐縣。佢地甚至會叫呢度做烏冬縣，好得意～～～ 超中意食烏冬既我覺得呢度係天堂！！！ Airbnb 屋主問洗唔洗介紹啲餐廳，我話可以淨係介紹烏冬店就得，我黎到係想日日餐餐都食烏冬 xD
當我知道有隊讚岐烏冬隊之後就好想黎睇波，佢地連吉祥物都係釜玉烏冬，粒玉仲要係足球玉！好耐無試過咁想去買紀念品！ 讚岐既主場其實係位於高松市以西既龜丸市，要符合足總既球場容納人數要求，佢地就可以走到去鄰市比賽。 賽前有消息指龜丸個場因為有學校要用所以唔可以比讚岐用黎比賽，咁讚岐就諗住可以有借口喺自己真正既鄉下主場出戰；唯一 blocker 就係唔知足總比唔比佢地喺一個唔符合 J3 容納人數既球場出賽； 我地一度擔心場波最後會因為搵唔到合適場波而取消…. 好在最後佢地可以罕有地喺自己家鄉出賽，我地亦好好彩可以去平時唔會用黎踢職業聯賽既運動場睇波打卡！
琴平電車公司今日加咗幾班特別班次去接載球迷來回高松市同琴電屋島站，沿路見到唔少人追住架電車黎影相。。。。 我就分唔出呢架電車同其他黃色線既電車有咩分別… 喺屋島落車後行五分鐘就到達球場。 第一時間就係搵 fanshop 買紀念品，佢地竟然無吉祥物公仔賣！ 最後只係買到件 All for Sanuki 既 tshirt!! 佢地既口號係食烏冬撐讚岐，我絕對會出錢出力去實行！～～～ 不過，喺場內外竟然無攤檔賣烏冬。。。。 我一心仲以為可以捧住碗烏冬睇波 T_T
高松市屋島競技場係上年先完工，喺看台底下有幾條室內跑道，等大家喺落雨天都仲可以繼續跑步。 球隊上年喺球場開幕後踢過一場波，今日係佢地第二次喺度出戰；好多住附近平時唔會去龜丸既球迷今日終於可以喺自己地頭睇一場波。 呢個球場因為太近民居所以唔可以用鼓帶節奏，喺比較少人入場既比賽其實唔用鼓仲好….
主客兩隊人唔多，但看台前既 banner 陣絕對唔輸蝕！！！ 我最中意主隊既 All for Sanki 同埋饂飩蹴団（中間仲有隻食緊烏冬既獅子）橫額，饂飩係烏冬日文漢字既正寫 (? 係咪應該咁解），蹴団係足球隊咁解，即係佢地真係會叫自己做烏冬足球隊！！！ 我覺得可以將食物同足球二合為一真係好夢幻，德國最多都係得東德既戴拿模或者火車頭，或者係啲贊助商名，無食物隊！ 總之如果你問我日本支持邊隊；我既答案會係讚岐～ 客隊作為大阪既第三球隊都有超過一百人黎到四國作客真係好勁，佢地隊波最後入三球向佢地致敬。
離場後我地搭琴電返去高松市中心，諗住由總站向商店街行；誤打誤撞比我地見到當地既啤酒節 Sanuki Beer Meeting！！！ 嘩～～～～ 喺商店街中心廣場有十間酒廠參展，另一邊就有好多小食。 玩法好簡單，去大台用 200YEN 買個膠杯就可以去酒廠攤販度買想飲既啤酒，飲完一杯可以去大會準備既洗水台沖一沖個杯再去買第二杯！ 就係咁喺一個意外行程下完結一日！
