04.06.2025
日本聯賽盃附加賽 首回合
福岡黃蜂 對 廣島三箭
東平尾公園博多之森球技場
賽果：1:0 (0:0)
入場人數：3670 （約 500 名作客球迷）
門票：4.610¥
喺計劃行程時日職既賽程仲未定實，諗住有機會可以星期六日喺九州各睇一場 J1，可惜等到賽程出咗之後福岡、大分連同 J3 既北九州都被安排到同一時間出賽，即係喺我地只可以㨂一場波睇。 後來見到週中有場聯賽盃，只要福岡出線到附加賽呢場波先會上演；最後如願可以星期六去北九州然後星期三先睇福岡！
之前提過最初既行程係諗住租車玩盡北九州；當時諗住會去埋熊本、阿蘇、別府等等既熱門城市，改咗買 JR Pass 同以福岡做落腳地後，我地決定唔好咁貪心，其他城市留返下次先再去～ 所以本來都唔諗住㨂去大分睇波。
星期六去完小倉睇北九州後，星期日就去剪頭髮；上網搵到一間叫 Kepka 既樓上 salon，其中一個髮型師識講英文就約咗佢一早想染髮同剪髮～ 個髮型師畢業後英文都唔識隻就㨂咗去美國學剪頭髮仲成功考咗個牌返黎，後來喺美國住咗幾年，仲去咗法國做一年野，後來㨂咗返黎同朋友一齊自己開舖，自己做老闆就可以自己話事唔洗下下 chur 到盡。 佢英文好流利所以溝通完全無問題～ 技術亦都好好整咗個我地滿意既顏色同髮型～～～ 剪完髮去咗佢推薦既九州烏冬店食午餐，佢講完我先知原來唔同地方有唔同煮法，我以為只係湯水係唔同，九州烏冬係軟身好多，但我食完覺得唔太啱自己口味，我中意 al dente 既感覺多啲！
今個週末喺博多車站有 Pikmin 活動，站外超～～～～～～多人排隊去玩遊戲，超羡慕個個都有一頂 Pikmin 紙帽超得意！！ 佢地自上年年尾開始喺九州各大城市搞巡迴活動，尾站黎到福岡咁啱比我遇上！ 喺車站門口即刻開 App 同人搶菇同種花希望可以執到張靚既特別版 Postcard! 雖然我地無時間排隊玩遊戲拎紙帽，但好在佢有間 Pop-up store 可以買 Pikmin 商品，執咗少少野返去比同事做手信，喺歐洲一定買唔到！！！
星期一去左由布院，好耐之前同屋企人黎過住溫泉旅館之後去咗間好好食既餐廳 Mabushi Shin，我記得當時係咁啱行過見到無人就咁行入去食，間餐廳係食茶漬飯同埋有好好食既和牛；嗰陣覺得係喺日本食過最好食既一餐。 之後間唔中都會諗起呢間餐廳，一直都諗住有機會要返去食；去到武肺我好驚佢會捱唔住執笠，喺 google bookmark 咗間唔中開黎睇下確認佢仲存在；估唔到近年好多人推薦到要排隊先有得食 ._.
今次去由布院主要都係想再去回味一下，我地搭普通既由布號來回，有大約三個鐘喺由布院，當日成個北九州都落雨所以花啲時間搭下火車都好。 冒雨排隊大約廿分鐘就可以入座， P 話係貴咗少少但的確係好好食，佢最開心係可以加湯食飯焦 xD 可惜食得太飽食唔落 shiitakemonster… 呢晚終於可以大瞓一覺同埋差唔多好返哂，訓到十一點先起身然後慢慢出門口去運河城 shopping。 成個行程我地只係預咗福岡今日同星期三睇波前可以行街買野，最主要係想去 Uniqlo 買衫，無印買啲家居用品同去 Donki 買零食，目標好明確咁兩日內做哂～
星期三喺天神繼續行街買野，返去酒店放低啲野食幾件唐揚雞就出發去機場睇波。 日本人起球場好似無諗過交通配套咁，有啲球場就起正喺火車站旁邊（例如京都同鳥栖），有啲就好似福岡咁，由最近既車站係要行兩公里先去到…. 好在搭車去機場唔洗再另外比錢。 由機場站行去球場既路程都幾得意，一開始喺沿住機場外既大路行，可以睇同聽到飛機升降；然後就轉入住宅區同上山；行咗大約廿分鐘後去到球場門口。喺球場外同樣好多小食，仲有炭火串燒！！！ 買咗啲野食喺場外食埋先入場，唔洗坐喺看台曬太陽。
作為一隊 J1 球隊，福岡既入場人數係絕對令人失望。佢地喺聯賽係唯一一隊平均唔夠一萬人入場，今日黎到週中七點開波既賽事就四千人都唔夠；咁都唔怪得啲球迷平日要返工加班，仲點會有時間入場睇波？更加唔明既係呢場咁既波要成 4.610¥！？
個球場同北九州比又有唔同既特別之處，我地既看台可以遠望到福岡機場！！！ 今晚可以見到飛機喺右邊主場球迷看台上降落，然後喺左邊作客看台上起飛；間唔中會被飛機引擎聲轟炸；可以 groundhopping 夾 planespotting 勁啱啲德國毒男。 而球場本身就好似一個只有上層既看港大球場咁，個觀感好得意，好熟悉又好奇怪。
福岡黃蜂本來係一隊以靜岡縣為家既球隊，由一間保安公司職員組成既中央防犯足球隊。 後來日本足球職業化，當地有其他球隊成功冒起（例如清水心跳）；球隊決定搬家到九州同改名做福岡黃蜂。 後來成功上到甲組但因為人腳唔夠經驗不足，多次成為升降機，係去到呢幾年先開始可以喺甲組站穩陣腳；只係好似未能夠吸引到更多既球迷入場。 （我覺得係因為個球場好 qqqq 隔涉囉！） 不過佢地雖然人少，但始終都係日本人，入場既球迷參與度都好高；身邊無論男女老幼唔跟住唱都會跟住拍手。 唔知點解主客球迷今日都有好多停頓位長時間變圖書館，上季我地睇過廣島作客川崎，佢地明明個個都勁好氣好力？
喺場上都無咩特別時刻，雙方都好似唔太認真對待場波；下半場開波大約十分鐘出現全場唯一一個入球，等啲主場球迷可以開心下。 去到臨完場多返少少攻勢，令到氣氛都好咗啲。 我地後面坐左幾個好多野講既後生仔，後生我地叫佢地做日本之恥！！ 佢地離場時竟然無帶走自己既垃圾，我地旁邊既年輕情侶經過時見到啲垃圾又竟然順手執走； 佢地喺啲大賽自帶垃圾袋去清垃圾真係唔係為咗做個靚畫面比傳媒睇。
離場後又要行兩公里返去機場站再返去天神，後來最後一日喺福岡去左太宰府半日，本來想買暢遊票去埋柳川，但我地唔想趕行程所以改成只去一個景點。夜晚既福岡好熱鬧好開心～ 喺歐洲一天黑就會想返入室內咩都唔想做，喺呢度可以用盡一整日都仲有野可以做。 例如去扭蛋機舖頭抽數碼暴龍電影海報，十張入面有三張係 01， 我已經唔求可以抽中我們的戰爭遊戲，只求咩版既 01 都得，最後抽咗六次都無出現過 01。。。。
