31.05.2025
日本 J3 職業足球聯賽 第 14 週
北九州向日葵 對 宮崎棒牛鳥
北九州競技場
賽果：1:1 (0:0)
入場人數：4722 （300 名作客球迷）
門票：2610¥
上年去完日本覺得完全唔夠喉，加上佢地下季就會轉制跟歐洲賽季時間會有休冬天同夏天，今次可能係我地最後一次可以暑假去日本玩時又可以睇波，所以返到黎就已經決定咗今年暑假要再去日本。上年我地六月尾先出發熱到就死，今年我地早一個月出發；淨係睇啲開波時間就知五月尾六月頭既天氣都仲 ok。
上年去咗大阪、京都同東京，今次我地㨂咗福岡入留一個星期，然後去四國幾日，最後去京都喺伊丹機場走；中間啲行程細節都大改咗幾次，本來諗住喺九州住市郊仲租埋車諗住可以去北九州大部份地方。揸車黎講我地喺歐洲都慣咗揸長途車所以覺得單程兩三個鐘完全唔係問題；到真係計劃點對點既行程時發現揸車好浪費時間同好貴。例如 100 公里既路程要預差唔多兩個鐘加 2000JPY 公路費，之後就將行程簡化咗，索性以福岡市做據點然後搭火車去其他地方，反正日本火車對德國人黎講仲吸引過啲車（除非係 JDM），咁我地兩個都可以兩手 fingfing 咁享受火車旅程。 最後買埋山陽山陰北九州 JR Pass，每人 26000JPY 可以用七日，用到我地由福岡去四國高松既火車～
今季德乙突然多咗兩場波，雖然我地一早係有計好哂先定下出發日期，但都無諗過最後真係會份踢附加賽；結果最後未能如願，兩日後都未傷心完喺我地星期三晚收工就出發，幫我地分心唔洗再諗返場波。但惡運好似死追我地唔放，由屋企出發就已經出事… 我地喺原定出門口時間前大半個鐘已經準備可以出發，睇下 S-Bahn 對多次時間時發現法蘭克福又出事，多班班次唔係取消就大 delay，我地拿拿聲出門口，最後雖然早咗大半個鐘出門口，但係以原定計劃既時間到達機場。 將兩件行李寄艙後我地就如常去 T2 間麥當勞食野同睇景，上咗架 SkyLine 架車準備關門出發時睇住有一家人啱啱趕到門口想入又唔敢入，其中一個申咗隻腳出黎整壞咗道門，我地又喺度等咗近十分鐘先搭到另一架車…. 食飽返到 T1 去過安檢，好黑仔咁排中條隊係幾乎全部行李都要打開被檢查。 前面有一家人應該剛由日本返黎轉機，四個手提行李都要打開然後啲手信全部都要拆袋被檢查；呢度又企咗廿分鐘，當然我個袋都要被檢查，但佢打開望咗兩眼就放我走？？
終於入到禁區上埋機，諗住終於可以完結麻煩既一日，點知機長話要等另一班機既 cargo 定唔知乜所以要大約 45 分鐘先可以走。 嗚，呢下我地就開始擔心，因為我地喺羽田得大約兩個半鐘轉機；班機準時到達既話應該無咩問題，但如果得返個半鐘就好有可能 miss 下一班機。 喺羽田由國際線轉國內線係要搞入境手續同拎寄艙行李清關（好似普通入境咁），出到去再搵國內線轉機櫃枱再次寄艙… 最後我地好好彩入境時幾乎係直行直過，搞咗 QR Code 既話可以用機自己搞入境手續（Scan 護照同影大頭相），然後去櫃枱有人貼入境貼紙；行李就快就出現，清關時用人臉識別通過，唔洗再拎護照出黎。我地係 T2 轉 T2 所以唔洗搭車，出到去行幾步就係轉機櫃枱，有職員 scan 我地行李 bar code 放低比佢就可以再次過安檢入禁區。
好在上年搭過內陸機知道國內線係超有效率，佢地只要求要寄艙的話就起飛前廿分鐘要完成寄艙手續，然後起飛前十分鐘到達登機閘口；過埋安檢之後我地仲有大約四十分鐘剩，仲有時間可以買個新鮮飯糰先再行去閘口。 喺福岡我地都有少少趕，因為酒店要十點前 check-in，之前有同佢地講過話如無意外可以十點前到，而佢地都有提過如果趕唔切就要提早通知佢地，等佢地可以另作安排。 再次好好彩兩件行李好快就出咗黎，喺國內線可以搭地鐵去天神南，再行大約幾分鐘終於喺九點半到達酒店，睇黎我地成功將惡運留喺德國！
放低行李就去左食吉野家，平時喺歐洲過咗八點就唔會再想食野，到底點度點解有魔力可以令人十點都仲可以食到一碗飯同甜品！！？！一覺瞓之後第二日就喺福岡周圍行下，最重要係去博多拎 JR Pass。喺博多有分 JR 九州同 JR 西日本，我地張 Pass 係經 JR West 買就去咗 JR West 嗰面諗住排隊拎，但職員教我地可以用機拎快好多，拎完仲可以繼續用部機預訂埋黎緊幾日行程既座位！
去到星期六我地張 Pass 可以搭新幹線由博多去小倉（北九州 Pass 唔可以），車程只需十五分鐘；搭普通火車就要差唔多一個鐘。 咁短一程我地無訂位，直接去自由座，咁就搭咗人生第一次新幹線～～ 德國高鐵同新幹線既最快車速一樣，但新幹線係全程都可以以最高速行駛，相比德國全國其實只有極少路段係可以行到咁高速；所以對鐵路有興趣既德國人先會覺得新幹線好吸引。 十五分鐘後喺小倉落車轉單軌鐵路南下行下景點：旦過市場同小倉城。 旦過市場係一條街仔咁無咩特別，小倉城因為無咩時間，只可以喺出面望下… 去到魚町銀天商店街食埋午餐先返去小倉站。 五月尾黎到日本既天氣真係同上年完全唔同，今日雖然有太陽但長期有陣風反而覺得有啲凍。
北九州向日葵既主場可以由小倉站行大約十分鐘就到達，沿路好多指示絕對唔會行錯。呢個球場特別之處係直接建於海旁，我地唯一去過差唔多既球場係威尼斯，喺威尼斯球場四邊都係高牆，要真係望到海就要喺作客看台嗰邊向後望先會見到；喺北九州呢度係可以喺三邊看台都可以望到個海！！！ 喺海邊既矮小看台當然擰轉頭都可以望到海 ^^
入到看台已經見到兩邊球迷都熱緊身，逐個球員名都唱一次；同樣黎自九州既宮崎都有唔少人黎到作客，我地坐得比較近主場球迷看台就要等到佢地收聲先聽到宮崎球迷既打氣聲。 北九州同宮崎相距大約 350 公里，但無論揸車定搭火車都要近花五個鐘，喺丙組賽事有 300 人黎到已經好勁。 喺日本要上到職業聯賽就要符合足總既規則，例如球場容納人數同財政證明；有一項比較得意既就係入場人數。 想升上 J3 既球隊就要證明到自己隊波有平均二千人入場，所以啲想升班就要出盡法寶去吸引球迷入場…
我地今日黎到都唔係想去講邊個打氣勁啲定乜，只係想好好享受下日本既球迷文化；而北九州既球迷既表現完全係100 分！！！ 佢地叫 Ki-ta-kyu-shu 既 beat 全部都好正，仲有用到幾首我地好中意既打氣歌。客隊喺下半場開波不久就先入波，去到最後一分鐘被主隊追和令場波喺氣氛最高既時候完結～
離場時我地兜咗去海邊既看台影幾張相，然後就跟啲人潮行返去火車站。 呢個時候開始多雲無咩太陽就開始涼涼地，當時著咗件薄身既風褸都還可以，但都開始諗我地洗唔洗去買件厚少少既外衣黎著。今日我地仲有一個行程就係去皿倉山展望台，諗住完場後慢慢過去可能可以睇到日落。
由小倉搭 JR 去到八幡後，喺站外有免費穿梭巴士去到皿倉山纜車站；第一班纜車每 20－30 分鐘一班，我地去到既時候啱啱走咗一班要等 30 分鐘；咁就係個站食風食咗半個鐘。 上到半山要轉搭一架迷你單軌列車先上到山頂，當時睇住架車滿咗然後龜速開走，喺山上面又要食住風等車；嗰陣得返大約 16 度好凍～～～ 最後終於上到山頂都唔想喺上面久留，花咗大約半個鐘喺上面行左一陣，恥笑下啲人玩條超長既滑梯飛落地同影咗陣相就等車落山。 由八幡站返福岡只有 JR 可以搭，要差唔多成個鐘； 我地㨂咗搭車返去小倉食埋晚飯先搭新幹線返去。
