26.05.2025
德國足球甲／乙組升降班附加賽 次回合
SV Elversberg - 1. FC Heidenheim
Waldstadion an der Kaiserlinde
賽果：1:2 (1:1)
入場人數：9105 （1500 名作客球迷）
門票：19€

足球真係令人又愛又恨。

自喺紐倫堡作客反勝之後，我地既終於開始敢去發德甲夢，我地既目標由護級變升班。 諗返轉頭呢三個星期其實好難捱；個個好似人格分裂咁，一時話想升班，一時又話唔想升班，一時又話目標已達成用平常心看待。去到今日開波前個個都話好想可以 skip 咗場波然後淨係知賽果就算，到底邊個發明附加賽！！！！？

由星期四到星期一好似過咗成個星期咁，呢幾日間唔中都會諗下星期一會發生咩事，好想星期一快啲黎快啲完結。 終於等到星期一下午收工可以出發去 Elversberg； 呢場波一票難求，喺第一階段只限季票持有人可以買返自己張飛既時候就已經差唔多賣哂，第二階段比會員唔夠一分鐘就賣哂。 有一個來自東德既熟人想搶都搶唔到，本來我就係留咗我張飛諗住讓比值得入場既人； 呢位朋友雖然係來自東德，但佢唔知點解十幾廿年前已經開始睇 SVE，每季都會跟去睇幾場作客波甚至會黎睇主場；比佢好過比其他人既朋友。

大約六點大家會合之後就一齊行去球場，當時仲有兩個半鐘先開波，但排隊入球場條龍已經勁長。 對上一次見過咁長龍係漢堡第一次黎作客… 我地因為要準備 choreo 就提早入場同埋如常幫人霸位。 半個鐘後球場開口就有幾個阿叔入黎企喺我隔離問我點解可以早過佢地入場，言下之意係我企咗喺佢想企個位，然後借啲意想迫走我。 呢個位我每場都企喺度幫人霸位，邊個企開呢度我自己知；我望住佢問佢想點佢又唔敢叫我走開，問佢平時企開邊度做乜今日要企呢度又講唔出； 淨係係咁比說話我聽有乜理由有人可以早過佢地入黎霸位。 呢啲時候又忍唔住想話踢低組別既時候一切簡單好多。。。。。。

平時我喺開波前半個鐘先會去主看台，今日怕人多混亂就再早多十五分鐘。 去到我平時坐開個位痴咗個名！！！唔通今日我無位坐？？ 我唔理照霸咗我坐開嗰個位先，同時同保安講定如果有人黎既話我要企喺呢度影相，好在過咗一季佢都認得我叫我照坐就得，有人黎先走。 平時坐喺我前面既係球隊 video analyst 同埋負責睇住場邊電子廣告既人； 今日喺我前面既係講波佬，可以偷睇下佢地係點運作。

唔知點解今日時間過得好快，突然間班球員就已經準備入場， Block C 亦都準備好要展示 choreo. 今日個 choreo 好簡單，我地將上次對凱沙羅頓用過嗰塊大布上既 SVE logo 剪左落黎重用；然後喺看台兩邊分派黑白紙，希望可以將看台砌成黑白色，再舉起 Rauf Geht’s 二字。 作客球迷都喺看台前掛起大字報寫住 Alles geben － 搏盡，同時亦舉起藍紅紙；等到球員入場時放埋藍紅煙，幾好睇～～ 我地個看台唔知做乜又有人喺看台放黑煙，希望唔係啲 on9 仔無矇面咁放 （但都要多謝敢犧牲自己去放煙）

球場今日同平時有少少唔同，平時聯賽日子係跟球隊自己簽返黎既廣告，黎到附加賽就要跟返足總自己既廣告，啲顏色完全唔同哂。 仲有啲相機全部係印住 Bundesliga 而唔係 2. Bundesliga，只差一步咋…. 點知開波早段就比對方搵到空位一個直線靚傳就領先， 呢一刻只係覺得我地好似發揮唔到平時既水準應該會好難踢，之後隊長幫我地追和又有返少少希望。

下半場我又入返 Block C 想享受下半場，一開波就見到個波入網個個瘋狂慶祝，點知球證花左幾分鐘去睇 VAR 去判係咪越位； 無論我地受唔受惠於 VAR 都好我一直覺得佢係足球既敵人。 有時喺電視睇丙組開心刺激好多，入波就係入波，誤判係比賽既一部份，好過餵咗你一啖糖之後要嘔返出黎。 仲有如果要花幾分鐘去判斷係咪越位或者犯規既話根本就係破壞緊你自己既專業同埋足球本身，總之就 VAR 食屎啦啦！！！！！

後來我地狂攻左成個半鐘都搵唔到方法入波； 大家唱歌唱到就黎唔夠氣，拍手拍到手都紅哂。。。。 睇住個鐘去到 90 分鐘停左，到補時五分鐘。 我地係咁話唔想加時唔想入十二碼，去到呢個時候慢慢接受現實準備要踢多半個鐘，但現實係被對方絕殺。 成個球場靜哂；只有作客看台傳黎既歡呼聲。

海登咸當年喺呢度升上乙組，今日再次喺呢度護級成功； 我地又再一次喺附加賽升班失敗。 咁多年來我地總共入過四次升班附加賽，第一次係對 1860 II，次回合作客慕尼黑時因為暴雨而改期（當時個個球迷已經入咗場），改期到週中夜晚無人可以突然抽空，變相得幾個球迷喺現場見證升班。 第二三四次都係輸波，睇黎呢個就係我地命運。

被絕殺後同球證吹完場雞時我既心情都仲係幾平淡，係咁同自己講今季終於都完，終於可以真係放鬆一下，唔好唔記得今季既目標本來就係護級，而家只係唔小心企高咗幾位去護級成功；來季我地仲係踢德乙喎，下季開始我地就係呢個聯賽成績最好嗰隊波喎，唔係話升唔升班都唔重要咩？

呢個時候看台內舉起向將會轉會去漢堡威既 Neubauer 舉起大字報： Danke für 5 Jahre, Maurice；多謝佢喺呢五年來由地區聯賽到而家同我地一齊經歷過既一切。 呢排佢有被問到見到 SVE 有機會爭升班，會唔會後悔一早就決定轉會去漢諾威，佢話有諗過下但唔會用後悔黎形容。 雖然我之後話唔 gur 佢喺新球會訪問話好開心可以加盟一間真正既傳統球隊，但喺最後呢幾場見到佢仍然每秒都搏盡就只願佢一切安好。 舉起大字報時見到佢自己一個雙眼紅哂咁企喺看台前接受我地向佢致謝，之後其他球員都黎到一字排開。

離遠都見佢地個個都喺度喊，「被迫」要走黎面對球迷。 見到佢地既慘樣我都終於忍唔住喊左出黎，輸波係一回事，但咁樣比人絕殺，咁樣一齊努力一整季，慢慢將目標由護級變成爭升班。。。。去到最後一刻咁樣反高潮被否定。 呢一刻我都唔知可以點形容，本來我話好可惜佢地今季付出既努力被抹殺，但又唔係喎，我地能夠護級成功都係佢地用佢地既血汗換返黎，一啲都無抹殺到。 只係有邊個會甘心最後咁樣失敗。 Asllani 喺賽後訪問話好對唔住啲球迷，話佢地盡咗力甚至覺得自己應該係贏波升班嗰隊，呢一刻就好似比人一把星落塊面度咁，係佢地喺足球生涯經歷過最痛既時刻。 嗚，個天點解捨得咁樣對班球員？

對面又係護級成功，但佢地慶祝到好似贏左歐聯冠軍咁，印埋 T-shirt 仲喺賽後現左差唔多成個鐘；我地護級成功就個個喊到豬頭咁。 點解人地今季得 29 分有多兩場波去救命，我地有 58 分要受多兩場波既煎熬最後仲要去跌入呢個地獄。。。。點解要有附加賽？點解第三位唔可以直接升班？點解我地無啦啦走去搶呢個第三位返黎？ 點解～～～～

球隊無正式同班球員道別，喺賽後我地叫出將會離隊既球員，包括三位借將：來自法蘭克福既 Elias Baum，法蘭克福已經同佢講明來季會比佢喺德甲上陣；兩位來自賀芬威既 Mo Damar 同 Fisnik Asllani；呢三個球員係我地今季既超重心球員，私心當然希望佢地會留隊，但佢地既潛質係要去更加好既球隊既發揮！ 仲有來自 RB 長傷既 Frederick Jäkel，當然仲有 Maurice Neubauer.

不過最後都想講好感激一眾球迷完場後留低為班球員打氣，等佢地知道我地仍然創下球隊史上最佳成績，升唔到班係另一回事！！雖然好憎呢四隻字，但又真係得呢四隻字先可以形容： 雖敗猶榮。 起碼我地比到全德國人睇咩叫進攻足球，多謝一班球員帶我地走過一個咁精彩既一季；下季我地繼續出戰德乙！！！

結局最後未能如願，但起碼終於完季可以抖一下；而家我地要自閉一下，暑假再見～