22.05.2025
德國足球甲／乙升降班附加賽 首回合
1. FC Heidenheim - SV Elversberg
Albstadion
賽果：2:2 (0:2)
入場人數：15000 (1600 名作客球迷）
門票：18,70€
睇完場波返到屋企已經差唔多三點，瞓咗幾個就開始紀錄低昨晚發生既一切－一個離德甲最近既時刻…
星期日作客完史浩克之後，四日後我地就要先去作客 FCH。 球隊都好趕急咁準備賣飛既程序，首先係星期一下午三點先賣作客波飛，到六點就賣主場波飛。第一波只限季票持有人，主要係比主看台啲人可以優先㨂返自己坐開個位，每人只限買一張；第二波就兩日後限會員同樣只限買一張， 一分鐘唔夠就賣哂。 我想幫一搶多一張都搶唔到 ._.
期待咗好耐終於等到星期四既來臨，個感覺好似作客史浩克咁，既緊張又期待但又覺得無咩所謂。 由法蘭克福出發去海登威要大約三個鐘車程，我地提早少少兩點半就出發，愈早避開到放工繁忙時間就愈好。最後六點到達作客球停車場…
其實啲人點解要歧視我地無火車站先，海登咸有火車站但個站喺山腳，條路仲斜過凱莎羅頓唔會行到上去；夜晚開波賽後尾班車又已經開走左， 有＝無！ 然後由作客停車場行去球員要十五分鐘，向球場就向下行，離場時要穿過樹林同向上行，咪一樣係鄉村地方！！！人口多我地幾倍同有個車站就威啲咩～～ 講開火車站，德國火車公司 Deutsche Bahn 喺賽前整左一張得一道門既迷你火車圖話係來往兩個地方既特別班次火車，用黎笑下兩隊蚊型球隊成話熱話。 我地先唔想搭永遠唔會準時到站既火車～～～
去到場外同對方既球迷大使會合，佢要我先去記者區度拎龜背；同紐倫堡一樣我要比身份證做按金去換龜背，著住佢就可以喺場內大部份地區自由通行。要去記者區就要兜球場外圍經過幾度閘，每過一關就問啲保安呢條路啱唔啱，個個都勁友善勁好笑容。呢啲真係得鄉下地方先有！ 出奇地佢地係唯一一隊會比我入記者區既球隊，即係可以喺入面任飲任食，不過入面一堆阿叔好驚佢地會同我講野，一拎左個龜背就即刻走人，等球迷大使帶路比我睇下點解可以出入球場。
估唔到今季可以同兩隊德甲球隊對戰，首先係作客利華古遜，然後就係呢隊。 喺德乙有大把更靚更大型既球場，但呢度的確係一個上演德甲既場地，係我地想成為一份子既地方！！！今場波會喺德國既免費電視台直播播出，過去兩季我地都無被分到星期六八點半開波，估唔到最後以自己既實力爭取到喺全國國民眼前踢波 xD
海登咸成為德甲份子既路程同我地有好多相同之處，十五年前佢地仲係一隊第五級球隊，經過多年穩定發揮慢慢進步最後升上德甲仲喺第一季能到入圍歐洲賽，可惜一隊細球隊要踢兩條戰線唔係一件易事… 佢地既領隊 Frank Schmidt 喺 Heidenheim 出生；喺球員生涯喺唔同球隊打滾過最後喺第五級聯賽 Oberliga 既 FCH 掛靴；之後隨即接任成為領隊。 2007 年到而家，就係佢一手一腳帶住隊波創下今時今日既成績！
喺主場區內仲有一樣係佢地先有既特色：比球場更舊既 Liko’s Kiosk。 球隊喺計劃球場擴建工程時無諗住要迫遷呢間小食亭，反而搵方法比佢成為球場既一份子，因為佢地認為唔可以因為球隊有成績就忘本趕走原本屬於球迷既地方。 呢個咁有人情味既地方暫時都搵唔到啲咩原因去討厭佢地。
今日唔係兩隊波第一次對戰，數返去 2013 年當 SVE 第一次踢德丙既時候就已經遇過 FCH；當時只有大約一百人到場作客，同今日相比近千六人黎到完全係另一個景象。去到季尾佢地作客 SVE 時升班上德乙創歷史，幾個星期後我地就成為升降機降返落地區聯賽。 今日大家再次相遇，又再次同升降班相關…. 我地之前另外睇過佢地首次作客史特加同主場迎戰 Dresden，兩次都比我地唔錯既印象，但同今日比佢地既球迷文化好似又更加成熟，更多人一齊參與打氣，聲量亦都勁左好多。
球員進場前佢地播起球隊會歌，喺球場中間揮動十幾枝大旗，仲有佢地隻吉祥物熊喺球場中心獨自表演勁搶眼。 主場球迷準備咗一個算簡單既 choreo，以球隊顏色為主色將看台變成紅藍，指呢度係一個唔可以被擊破既堡壘。 果然，佢地一開波就係咁搶住黎攻，頭廿分鐘 chur 到我以為德甲乙真係有水平差別叫自己準備好輸波既心情。 呢個時候有個黑衣人射左個波入網！！！！！！？ 我地領先一球！ 完半場前再入多一球拉開比數。 ？？？？！！？！？！ 當時我完全唔記得呢兩個入球係點組織出黎，又唔知到底係邊個入波，只係記得個波點樣入網，睇返分牌先知原來係 Petkov 同 Asllani。 我帶住完全唔敢相信既心情係咁踱步同抖大氣，一直諗起上季附加賽波琴點樣失三球然後追返三球護級成功，一直諗住呢刻既賽果，領先二比零？？？？？ 真係發生緊？？？ 大約一分鐘後對方有個機會埋門追返一粒，呢一刻簡短地先將我拉返黎現實，就係場波未完架，就算完左都仲有一場波要踢。 後來球證睇 VAR 吹返越位詐糊。
半場休息時我入返看台，當時我部相機唔知點解得返一格電；我決定唔諗影相，想喺看台內好好享受下半場。 每次有角球都好緊張，最後都係因為因為死球而失波。 對方喺禁區頂有個罰球直射，Kristof 話佢太遲先見到個波反應唔切，最後將個波送左落對分球員腳下比佢執雞送分。 三分鐘後又係 Kristof 撲波又送落對方球員腳下唔洗出力就追和。 講明先，呢兩球係輸龍門但我地完全無人想怪責佢。 要怪不如怪點解會犯規比人地有罰球機會、不如怪點解會誤傳送個波比人、不如怪前面點解唔把握好啲入多幾球波。 反而慶幸呢兩個入波既出現最終係個別犯錯導致，而唔係因為我地整體屎波，返主場之前仲可以執一執到。
最後嗰廿幾分鐘勁難捱， 個波好似長期都係對面半場，我地睇唔清發生緊咩事；到我地攻過黎既時候又係睇唔到前面條底線，總之就快心臟病發好想快啲完場。 等到球證終於吹雞完場我地都好開心，雖然比人追和，起碼好過輸波然後下場要計下要入幾多球波。而家由零開始，星期一喺主場上演決賽有一個好清晰既目標：贏波！
大家帶住鬆一口氣既心情離場，令大家開心既係覺得雙方都踢左場好波。 網上勁多 meme 話呢場波似歐霸決賽多啲，好睇過尋日兩隊英超球隊對戰。 笑死～ 仲有見到好多人第一次睇我地既比賽都覺得我地有德甲水準，叫啲所謂大球隊好好反省下。 見到呢啲「讚美」最開心既係覺得球員既實力同付出都被肯定！我地係有所謂既金主喺背後，但我地完全無銀彈攻策呢回事，而係要行一個可持續既方式去發展。
而家好期待星期一，完全唔驚今季大結局既來臨，只希望我地可以來季取代海登咸既德甲席位，成為其他有潛力既鄉下隊一個新既指標。 Asllani 你最好同我食飽瞓飽儲夠精力，星期一入多幾球波一齊圓夢！！！
