18.05.2025
德國足球乙組聯賽 第 34 週
FC Schalke 04 - SV Elversberg
Arena auf Schalke
賽果：1:2 (0:1)
入場人數：62,077 （約 4400 名作客球迷）
門票：19,25€
上季我地大炒 BTSV 之後間接幫史浩克護級成功，賽後佢地好多人話要送三分去答謝我地，覺得好好笑既同時又覺得好可惜一隊大隊竟然淪落到要一隊鄉下隊幫忙護級。今日其他比賽既賽果仲可能會影響到來季足總盃首圈會被分入種子隊定非種子隊… 我地呢面就有三個可能：科隆輸波我地贏波就直接升班、同科隆一齊贏波就入升班附加賽、和波輸波就睇其他對手，最壞情況可以跌落第六位。 我地既目標就好簡單：只顧自己，今日拎三分去決定自己命運！
過去一兩個月大家又唔敢抱希望自己有機會升班，去到而家個個都覺得自己有能力去爭升班，多得班球員喺唔同機會表達佢地既諗法。 佢地一直都話只係集中而家同下一場波，之後既事到時先算。 佢地慢慢開始改口愈黎愈有信心咁話既然自己表現到出黎係有能力去一爭升班席位，點會有得搏都唔搏呢？ 我地好擔心真係會唔小心直接升班，然後無份去慶祝，所以執左一日既衫同帶埋公司電腦去作客，最理想就係完場後會跟大家落 Saarland 等球隊巴士功成歸來，過一晚夜第二朝一齊去市政府慶祝。 其他情況就直接返屋企過一個正常既夜晚～
德乙平時係一點開波，去到最後一週大家一齊用德甲時間三點半開波，唔知係咪想比球迷感受下德甲日程？ 我自己就比較中意德乙開波時間，雖然要早啲起身，但同時又可以早啲返到屋企。好多時候去作客仲可以趕得切返屋企睇星期六晚場波。 今日遲開波好處係可以訓多兩個鐘，每次最怕就係要經北威州啲路，無一次係唔會塞車。
呢場波我地預兩三千人會到場，去到季尾我地愈踢愈順仲有機會爭直接升班就好多人都想黎睇。 睇住作客區一區區咁慢慢開售，去到最尾史浩克倒嘔返啲飛出黎比我地賣…. 最後再次有超過 4500 名作客球迷到場，真係好癲！！！個個都咁講「好緊張呀，但其實結果係點都唔緊要」 成個心情都好矛盾，大家淨係好想快啲知道個結果！！
史浩克球場外有為作客球迷準備既停車場，開波前兩個鐘入閘就免費。 Saarland 係一個又細又窮既州份，有啲人早一日出發同大家分享好多貼士，例如邊段路勁塞車建議大家再預早多一個鐘出發；大家為左慳嗰五歐泊車費就寧願早啲出發。 我地就預十二點半到達，後來因為塞車都差唔多一點先到。 當時已經接近半個停車場已經滿咗！！！ 大家都係諗住早啲到然後喺場外開餐，感覺好似一齊去遠足咁。
去到球場閘口前仲有差唔多廿分鐘先入得場，當時已經有幾百名球迷聚集喺場外。 一如以往女人只有一條隊，當時已經打哂蛇餅。 今次我就跟大家一齊排隊，條龍雖然係長但郁得好快，排咗大約十分鐘就搞掂～ 入閘後就可以見到球場外圍，穿過一條隧道後就入到作客區內，所有欄杆都已經比人霸哂～～
史浩克今日準備左個 choreo，叫坐上層既球迷著藍色衫，下層球迷著白色衫；入到場時見到北看台已經企滿哂白色人，其他看台既球迷都好配合 UGE 著啱色既衫。 同上季一樣我諗住上半場喺主看台影相，今次失策去錯區問錯人～ 我㨂左入去放電視鏡頭嗰區，我問負責嗰區既阿叔我可唔可以搵個無人既位坐低影相，佢話唔得，我問佢咁我可唔可以就咁企喺通道影相，佢話唔得但問我想企幾耐，我話上半場。 佢話「呢度要保持暢通唔企得人架，我唔可以比你企足上半場，你邊度派黎架，無自己個位既咩？」 我話我係作客球迷，佢話「咁你唔係應該喺作客區咩，你黎呢度做咩？」 我話我想由呢個角度影向作客看台。。。 一係我淨係留十分鐘得唔得？ 雖然佢好惡，但佢又好好人咁帶我入去指咗個位比我企，同我講：拿，你話十分鐘架。 佢惡中帶善咁幫我解決咗個問題，但入到去我其實覺得個位麻麻地，雖然喺正中線，但左邊有一大堆機擋住咗視線，唔可以完整咁影到北看台。
當我諗緊走唔走佬好，佢又走黎問我：「你唔係話影相架咩？唔洗相機架？ 」話說好多球場都唔比帶可拆鏡頭既相機，再加上我唔中意揹大袋所以只係用手掌 size 放得入褲袋既相機； 我拎出黎比佢睇我有相機架，係細部咗啲組。。。 佢又再問我邊度（派）黎， 我話 Elversberg，佢就一臉 ” 呀，係喎” 既樣話 ok 就走咗。
賽前史浩克同將會離隊既球員告別，當中包括已經效力史浩克二十年既門將 Ralf Fährmann 告別。佢繞場一週去到北看台前雙腳跪低答謝球迷既支持， 其實我真係唔明史浩克到底想點，要咁樣浪費佢呢幾年既職業生涯。 去到接近開波時就播起礦工之歌，主客球迷都一齊唱～ 同史浩克會歌；choreo 既真面目終於揭開，好簡單幾隻藍底大白字寫出史浩克全名： Fussballclub Gelsenkirchen-Schalke seit 1904 e.V. 北看台隨即就好有動力咁開聲唱歌為球隊打氣。一開始全個球場一齊唱跳勁震撼！！！！
十分鐘過後我去左另一個入口企，個保安見我有證都無理我～ 反正北看台靚相大把人幫手影，我應該集中喺作客看台！！ 唔夠 20 分鐘，有個組織上到前面比對方一腳清走，個波落向禁區頂向既 Sahin，佢凌空抽空窩利笠過龍門射入，嘩！！！！靚到我喺主看台都忍唔住舉手慶祝咗，點知轉頭就話 VAR 越位吹返轉頭，但我好好好好肯定無越位囉。 後來睇電視先知原來入波 18 秒前 Petkov 跪低咗既時候腳尖越位，痴線勁唔合理，超可惜呢球波竟然唔當入，如果唔係一定成為我地今季既金球。
兩分鐘後，Petkov 好似想報仇咁喺禁區頂抽入破網，今次點都計啦卦？？？？我地又再喺史浩克正式領先一球！！ 之後我地仲有多次機會都被對方負碌擋咗，北看台對隊波完全心灰意冷，失左呢球波之後佢地全部背向球場如常打氣，之後仲叫埋上層看台加入。而呢個只係佢地無視球員既開始。
下半場我返咗入作客看台，入面氣氛超好，完全聽唔到北看台唱緊啲咩。 開波後，看台有人要救傷入黎搞到分左心，無啦啦 Neubauer 就對佢母會入咗波幫我地拉開到兩球。 後來睇返原來又係佢喺左路用左腳窩利扯遠柱抽入，又係另一球靚波！！！
呢個時候… 原來對面進入咗平行時空，喺度唱歌話自己將會成為德甲冠軍同贏足總盃。 啲球迷話咁樣比起噓聲同粗口去諷刺同落球員面更加有力。 北看台之後仲帶起人浪，我地都加入埋一分，仲一齊唱 oh wie ist das schön… 呢首歌係通常喺啲重要慶祝既時刻先會唱，呢個時候佢地就好似幫我地慶祝咁。最後廿分鐘，史浩克換入今場既 MVP 前漢堡同哈化柏林球員 Lasogga！現年 33 歲既 Lasogga 早幾年由漢堡去左中東搵食，踢左兩三年淪落到無球會續簽佢失業一年，兩年前加盟史浩克二隊效力踢下衛生波；估唔到突然間佢會有份上返一隊。 個個都話成場波得佢有火去追波踢波。
完場前約十五分鐘，北看台已經執野放棄打氣，喺看台前舉起大字報：「歷史上最差排名（德乙第十四位），暑假玩得開心啲啦你班垃圾」 即使去到最後五分鐘佢地追返一粒都無力回天。 另一邊廂我地創下歷史上最佳排名，完場後場內球迷全部為我地鼓掌，因為我地正式以第三位完成今季賽事，進入升班附加賽對 Heidenheim!!!!!!!!! 同時亦即係話科隆贏波仲要贏埋冠軍，痴線，今季冠軍得 61 分？ 漢堡作客輸下游既 Fürth，另外護級成功既升班馬 Münster 被 Ulm 迫和，Münster 失分先令到史浩克唔洗成為非種子球隊。。。。 你話慘唔慘。喺我地慶祝既同時，北看台個個企喺度等啲球員過去出盡力噓爆佢地。
啲球員喺中場同對方握完手就向我地呢邊奔過黎，大家一齊開心慶祝寫下一個新既里程碑！！！雖然仲有兩場波，而過去幾年既賽果話我地知乙組球隊都升班失敗，但紀錄係用黎破既！！！ 喺賽後訪問隊長 Fellhauer 話「大家都只係想 focus 喺自己盡力做到最好，發揮到自己相信既水準同享受同隊友一齊踢波，我地無野好輸，只有可以贏既目標。我地無必須要完成既事，只有可能完成既事。 」 心態完全正確！！！！！！ 雖然我地係咁話唔想踢多兩場波先知結果，但今日見到班球員咁開心就知大家既願望好簡單，升班只係其次，我地已經超額完成原本既目標，絕對係值得開心慶祝，為自己感到驕傲！！！！
星期四加油！！！！！
