10.05.2025
德國足球甲組聯賽 第 33 週
SV Elversberg - Eintracht Braunschweig
Waldstadion an der Kaiserlinde
賽果：3:0 (3:0)
入場人數： 9105 （1400 名作客球迷）
門票：季票

今季黎到最後直路得返兩場波，暫時只有一隊波篤定降班，未有球隊篤定升班。我地喺主場迎戰喺降班附加賽席位既 Braunschweig，佢地近況大勇遇敵殺敵已經連續六場不敗，喺爭升班既球隊身上瘋狂搶分。最強既球隊不嬲都唔係榜首嗰幾隊，而係季尾要護級既球隊，同樣已經六場不敗既我地知道今場唔會易踢。

大家雖然一直都話升唔升到班都唔緊要，但有邊個能夠忍受唔去幻想同期待再創歷史既機會？ 唔知班球員又會唔會受到無形既壓力而失表現？好期待星期六既來臨但同時又好驚要一直發夢… 大家唯一可以做既就係一步步黎；首先就係搞好朝早既季尾巡遊！

上季喺最後一場主場我地第一次搞巡遊由村內既舊市集行去球場去慶祝成功護級，今季我地再次喺最後一場主場賽前想同球迷一齊行去球場～ 比賽一點開波，大家九點半慢慢出現喺市集。 記得上年我地好擔心會無人黎，最後都有幾百人既出現令到巡遊大成功。 今次一早就已經好多人黎到聚集，感覺仲多人過一年一度既音樂節咁。

十點半出發行去球場，路線同上季一樣，有警察封路帶路；佢地今年相對輕鬆亦都保持更多既距離。 去到教堂上斜路既時候終於見到無盡既人潮，加上煙霧瀰漫成個場面都好浪漫～～ 行下停下咆哮下，半個鐘後到達球場後就盡快入場準備陣間既 choreo。 球迷組織準備左一個簡單既大字報配黑白噴紙，Durch Zusammenhalt und Loyalität den saarländischen Fußball geprägt， 大意指我地以凝聚力同忠誠去塑造莎蘭既足球，球迷人數我地係唔夠州首都嗰隊波，但我地會一齊逐少進步！！！

後備席後既臨時看台去到今日已經完成清拆，場外既樹林盡露大家眼前。 老實講呢個畫面上到德甲大電視前其實真係有點醜，不過又有邊個估到隊波會有去到德乙既呢一日，要改建球場絕對唔係一件可以快速解決既事。 去到呢步球場既容納人數得返九千人左右，球隊知道好多人想入場睇波就向球迷組織溝通下可唔可以將看台前既旗掛低啲，等多啲人可以企喺頭幾行可以賣多大約一百張門票。 即刻 Block C 今日夾硬迫多咗百幾人入場，又因為賽前既球迷巡遊好多人同時抵達球場，令到看台一早就迫滿哂。

我都早少少走去主看台去確保無人可以阻到我陣間影 choreo 上演；球員入場時聽到 Block C 一齊由十倒數，然後就一齊向球場噴黑白紙條，同時喺看台底冒出黑白煙。終於，終於有一個成功又好睇既放煙 choreo!!!!!!! 今日暫時黎講一切都好成功～～～

作客球迷賽前號召隨隊既球迷一齊著黃色衫，睇落好靚好搶眼～～ 個個都舉哂手出盡力為自己隊波打氣希望可以拎到三分然後宣布護級成功。 無諗過既係，今日我地以暫時季軍既姿勢輕鬆搞掂喺榜尾掙扎緊既 BTSV. 開波大約十分鐘 Asllani 就先入波帶我領先，幾分鐘後佢助攻比 Damar 射入第二球，唔夠三分鐘後 Damar 再射入一球， 開波 25 分鐘唔夠我地已經領先三球，如果要輸就真係只可以輸自己。

下半場大家已經進入慶祝狀態，一齊唱歌到完場。賽後班球員又可以開開心心咁黎到看台前一齊慶祝，下星期日一齊去作客史浩克希望可以一齊再創歷史！！！！ 後來先知原來我地背後仲有史浩克球迷支持，佢地知道自己隊波無救就唯有祈求我地今日贏波，只要 BTSV 輸波就變相佢地輸波都可以護級成功。 喺網上面好多人黎留言多謝我地幫佢地護級，仲話下星期會送比報答我地，歡迎我地喺佢地主場升班 xD

真係無諗過今日可以一齊順利，可以話完美咁結束呢個比賽日。 夜晚漢堡喺主場贏波終於脫離乙組升返上去德甲，雖然成日恥笑佢地但德甲真係先係屬於佢地既地方～ 同時榜尾既升班馬 Ulm 因為輸波而篤定降班成日升降機。 喺德丙亦都確認咗 Dynamo Dresden 同 Arminia Bielefeld 來季會升上德乙，附加賽席位要等到最後一日先知。

好期待下星期日既來臨，好想知我地既命運會係點。。。 希望足球神會眷顧我地。。。。。。