04.05.2025
德國足球乙組聯賽 第 32 週
1. FC Nürnberg - SV Elversberg
Max-Morlock-Stadion
賽果：1:3 (1:0)
入場人數： 47.300 （600 名作客球迷）
門票：19,80€

上星期我地錯過左作客柏達邦喺最後一秒追和執返一分，成功扯實升班爭奪戰既尾巴。今個星期又要作客去到紐倫堡，上季我地喺度吞三蛋離場兩戰得零分；今季喺全場喺高路斯隊波度輕易拎到三分，但今日對方喺自己主場難得 full house 有五萬人一齊慶祝球隊 125 創會週年一定會想用三分黎慶祝…

紐倫堡喺年頭就已經宣布球迷組織會喺創會 125 年週年既比賽週準備球會史上最大型既 choreo 既去慶祝；咁啱喺生日正日會喺主場迎戰 SV Elversberg，我地好幸運地被「邀請」到呢個生日 party，好期待可以見識一下呢啲大場面。 紐倫堡於 1900 年 5 月 4 日成立，正正就係 125 年前。 喺生日前一日佢地去左大教堂一齊大合唱，到比賽日賽前同過萬名球迷一齊由市中心巡遊到球場。 喺市內外四周都見到好多唔同既慶祝海報，完全表現到球隊點樣同個城市成為一體。

上年我地搭地區火車慢慢碌去紐倫堡，去到最後一程遇上壞火車要等一個鐘下一班車黎，最後喺開波前廿分鐘趕及到去球場趕頭趕命咁喺入面奔跑。 今年我地自己揸車去起碼可以自己掌握時間，好好彩最後一路暢通到達目的地！ 一入到城邊每牌路牌上既有電子顯示 1.FCN-SVE 既方向，去到球場公園同會展中間既大街又有哂清晰指示作客球迷要跟邊個箭咀去泊車，去到門口啲職員仲識睇車牌黎識別同人手分流我地入去停車場，果然係舉辦過世界盃同其他大型活動既大城市！！！

由停車場出到大衝都仲要穿過公園行大約十分鐘路程先去到球場門口，由於我地只係小球會同對方無咩瓜葛就一切都十分 hea，沿路紅白黑夾雜咁一齊行，間唔中先會有一兩架警車。 紐倫堡既主場可以容納五萬人而佢地長期都坐唔滿，今日係好難得一次售罄，場外都比上年多好多人。

入場後我先同紐倫堡球迷大使會合，佢同上年一樣帶我去去拎龜背然後教我點樣還衫。沿路我話好期待睇個 choreo， 佢好興奮咁同我講呢個係史上最大型既 choreo，班 ultras 喺球迷花左三日不眠不休去安排一切。 我驚會好似漢堡嗰次咁比人話所以我問定我可唔可以影個 choreo，佢話當然可以，但個 choreo 將會出現喺成個球場，佢地有人準備左專業既 360 相機同 drone 去影，所以佢自己都廢事自己影。 同佢一齊行去拎龜背既時候佢每行幾步就同唔同人打招呼，當中有工作人員有普通球迷，有啲球迷一見到佢就走黎分享（或者投訴）一啲小事，然後佢同我講啲球迷對球隊真係好重要，所以佢會聽同搵方法盡量滿足大家既要求；感覺真係一個大家庭咁。

當然離開波仲有超過一個鐘，我就周圍睇下場內布置同準備學下野。 除左作客兩小區，場內每個座位都攝左張紙仔同陣間要用既紅白旗。場內既大電視亦都會間唔中播出 choreo 既步驟，當中包括開波前廿分鐘要埋位，choreo 會有兩步曲，第一部份只需要舉高枝旗 (HALTEN, NUR HALTEN! )，第二部份先出力 fing 旗 (SCHWENKEN)。 呢兩部份既要求重要到周圍都有貼大字布提啲球迷第二部份先 fing 旗。 去到開波前半個鐘左右，對方 capo 拎起球迷枝咪同大家講解多次大家今日既重任。

我地就 99 地發現到一個漏洞，就係平時唔會開售既南看台今日都坐滿人，即係南看台左邊下層係作客區，坐上層既主場球迷應該平時好少入場睇波。。。。所以拎起左枝大聲公（同自己人講） 大家一齊拎起枝旗～～～ 果然上層好多人開始 fing 紅白旗，笑死無啦啦搞串人地個 party。 好在主場球迷組織有安排人手喺各區準備，花左兩三分鐘先成功叫啲人放低返啲旗。

終於等到重要一刻來臨，對方 capo 又拎起枝咪用佢把靚聲簡單講下球隊去到今日既歷史；然後再指揮大家黎緊既步驟，又再一次警告大家淨係舉旗咪 fing 住，然後帶領五萬人一齊叫口號。 喺北看台先展開同大家手上旗仔一樣既球隊會徽，然後手上有紅白旗既就拎高枝旗，手上有金海報就舉金海報。 幾秒之間整個球迷變成紅白色（加我地老鼠屎黑白色），再配上 125 Jahre 1. FC Nürnberg 既金字。 上下層看台之間既大字大意指自球隊成立以黎同球迷一齊走過風雨寫下既時刻，下層展示出唔同歷史重要時刻。 草皮上有好多青訓成員一齊著哂紅衫同拎旗一齊慶祝。 背景有球迷一齊唱既打氣歌同會歌，成個場面都好好好好震撼，好鄧對方開心！！！今日仲有當然唔少得好朋友史浩克黎到慶祝生日，話哂佢地係同月同日生，UGE 畫左塊好靚既海報祝 FCN 125 歲生日，而紐倫堡就寫大字報祝史浩克 121 週年快樂～ 生日快樂呀紐倫堡史浩克～！！！！

除左場外同看台上既慶祝活動，球隊亦都準備左特別版球衣，球員今日著上深紅配白既直間經典球衣；而我地主客波衫係黑同白色都唔可以著，唯有著紅色既第二作客。 當球員入場時大家要花時間先適應到我地先係著紅衫嗰隊。 當 SVE 球員喺開波前跑黎同我地鼓掌時，好多主場球迷以為係自己隊波一齊跟住拍手，令到我地先係主隊既錯覺 ._.

紐倫堡最近既戰績麻麻地，本來仲有少少希望可以爭升班，去到上星期白白地送分比人斷送機會。 而我地上場雖然得一分，但多得其他球隊自爆失分反而執得一分都仲可以逐少拋離其他對手。 無論點都好，計埋今場今季剩返三場波，我地想球迷同球員可以好好享受餘下賽事，拎到九分係最好既結果，但就算拎唔到只要盡咗力就可以～

今日開波時我地都仲覺得贏輸都無咩所謂，去到上半場中段對方先用頭接應再黎個倒掛入波領先，大家反而仲放鬆左，半場時我都返左入看台諗住同大家一齊 9hea 下半場就算。 SVE 喺下半場向住我地攻，角球開出地波傳比禁區頂空哂既 Baum （德文解樹），佢起腳勁射入波追和！！！！ 呢一刻起我地就想可以重演漢諾威反勝賽果，唔想贏輸都無所謂，我地想贏波！！！ 十分鐘後 Baum 喺左邊又吉哂，射入第二球反超前。omgomgomg

作客看台內既幾百人終於有動力出力唱歌，我即刻奔返落去場邊搵位影相拍片。 呢個時候樓上有兩個後生仔喺度搞事，向下層倒啤酒同埋係咁挑釁我地。 大家能夠做既反擊就係集中唱歌。以作客比賽黎講紐倫堡係我最中意既球場～ 好想知點解我地今季可以係咁下半場反彈，係對方既問題定係我地班球員真係可以用十五分鐘反省？ 再過多十分鐘 Zimmerschied 埋齋完全搞串個對方個生日派對！！！ 作客球迷終於忍唔住要唱出對升班既希望，將過去季尾唱既歌詞由目標升乙組去到而家升甲組。

完場後我地以 52 分同較佳得失球差排第三，前面有 55 分既科隆同 56 分既漢堡，今季仲有兩場波，決定權暫時仲喺我地手上，只有贏埋呢兩場就最少可以參與附加賽痴一痴德甲呢個名。 就算最後升唔到班，但大家今季咁樣超額完成已經係一大光榮。 賽後班球員開開心心跳住黎到作客看台前一齊慶祝，我都完全唔得閒理主場嗰邊有咩睇。

離場時有個相熟既阿叔走黎攬住我流住眼淚咁話真係好難以置信，佢跟左隊波咁多年一直只以德丙為目標，無諗過會有份踢得乙，而家仲要有機會去爭取成為德國最佳 18 隊球隊既其中一份子？ 最後結果如何要等兩星期後先知，而家一齊享受可以發夢甚至係實現夢想既時刻，有咩下星期先再講～～